Karabo ya Bibele

 Mohanyetsi wa Kreste ha se motho a le mong feela kapa mokgatlo, hobane Bibele e re ho na le “bahanyetsi ba Kreste ba bangata.” (1 Johanne 2:​18) Ho ena le hoo, polelo “mohanyetsi wa Kreste,” e tswang lentsweng la Segerike le bolelang “kgahlanong le (kapa ho ena le) Kreste,” le bua ka motho le ha e le ofe ya etsang dintho tse latelang:

•   Ya latolang hore Jesu ke Kreste (Mesia) kapa ke Mora Modimo.​—⁠1 Johanne 2:⁠22.

•   Ya latolang hore Kreste ke Motlotsuwa wa Modimo.​—⁠Pesaleme ya 2:​1, 2; Luka 11:⁠23.

•   Ya iketsang eka ke Kreste.​—⁠Matheu 24:⁠24.

•   Ya hlorisang balatedi ba Kreste, bao Jesu a nkang hore se etswang ho bona se etswa ho yena.​—⁠Diketso 9:⁠5.

•   Eo ka leshano a bolelang hore ke Mokreste empa a etsa tlolo ya molao kapa bolotsana.​—⁠Matheu 7:​22, 23; 2 Bakorinthe 11:⁠13.

 Bibele e re batho ba etsang dintho tseo, ke bahanyetsi ba Kreste hape ha e ba akaretsa e ba bitsa “mohanyetsi wa Kreste.” (2 Johanne 7) Mohanyetsi wa Kreste o qadile ho ba teng nakong ya baapostola mme o ntse a le teng le kajeno. Bibele e ile ya bolela esale pele ka seo.​—⁠1 Johanne 4:⁠3.

O ka tseba bahanyetsi ba Kreste jwang?

•   Ba ruta dithuto tse fosahetseng ka Jesu. (Matheu 24:​9, 11) Ka mohlala, batho ba rutang thuto ya Boraro bo Bong kapa ya hore Jesu ke Modimo ya Matla Ohle, ba hanyetsa dithuto tsa Jesu, ya ileng a re: “Ntate o moholo ho nna.”​—⁠Johanne 14:⁠28.

•   Bahanyetsi ba Kreste ba latola seo Jesu a ileng a se bolela mabapi le tsela eo Mmuso wa Modimo o sebetsang ka yona. Ka mohlala, baetapele ba bang ba bodumedi ba re Kreste o sebedisa mebuso ya batho. Empa thuto ena e hanyetsana le seo Jesu a ileng a se bua ha a re: “Mmuso wa ka ha se karolo ya lefatshe lena.”​—⁠Johanne 18:⁠36.

•   Ba re Jesu ke Morena wa bona, empa ha ba mamele ditaelo tsa hae, tse akarelletsang e reng ho bolelwe ditaba tse molemo tsa Mmuso.​—⁠Matheu 28:​19, 20; Luka 6:​46; Diketso 10:⁠42.