Sheexaanu kiiꞌlattoranna ayyaana layiꞌrattora hasiꞌranno. Batinyu manni kaayyo bushshannonke yite waajjite annaho xorshidhannonna ayyaannate kakkalo shiqishshanno. Konne assitannohu tini ayyaanna gawajjitannonke yite waajjiteeti. Kiilsiisidhe cuuichonna gume wodhitanno, hattono hursitanno wolqa noonsa yite ammantanno xagga aggannonna buudhitanno. Mitootu bushurinni agarannonke yite minensa woy boosaallonsa babbaxxinore waantanno. Wolootu kayinni daddalinsa qinaawara, rosu fonqolo saꞌꞌatenna dancha galte afiꞌrate yite kiilsiisidhe “xagga” horoonsidhanno.

Duuchunku aleenni Sheexaanu gawajjonni agarannonkehu Yihowa jaalanke assiꞌrate. Yihowanna sokkaanosi Sheexaanunna durriissasi wolqanni aliidi wolqa afidhino. (Yaaqoobi 2:19; Ajuuja 12:9) Yihowa iso coꞌo yino wodaninni ammantannore jaallasi agarate qixxaawinohonna wolqasi halaꞌladote.—2 Zeena 16:9.

Maganu Qaali, “Horonta ayyaana laꞌootinna kiiꞌlitooti” yaanno. Ayyaana layiꞌranna kiilu, mitto mancho Sheexaanu borojjicho assitannohura Yihowa giwannoreeti.—Zelewaawuyaani 19:26.