Hi malembe ya ku tala swinene, a ku nga na lweyi a a yi tiva hi ku khanya nhlamulo ya xivutiso lexo, nakone mintungu ya mavabyi yi dlaye magidigidi ya vhanu. Hi ku famba ka nkama, vativi va siyensa va gungule ntiyiso wa kone. Va kume leswaku mintungu leyo ya mavabyi hakanyingi yi vangiwa hi switsrongwa-tsrongwana. Ku tiva ntiyiso lowo wa wun’we swi pfuna vhanu ku tivhikela ni ku daha mavabyi ya ku tala, ku nga ntxhumu lowu yentxaka leswaku vhanu va ntsrandzra-vahlayi va hanya malembe ya ku tala na va nga na mavabyi.

Swi li yini hi swivutiso swin’wana swa lisima? U vona leswaku ku djuletela ntiyiso mayelanu ni swivutiso leswi landzrelaka swi nga byi khumbisa kuyini wutomi byaku?

• I mani Xikwembu Nkulukumba?

• I mani Yesu Kriste?

• I yini Mfumu wa Xikwembu Nkulukumba?

• Xana wutomi byi ta va hi ndlela yini a nkameni lowu taka?

Vhanu vanyingi swinene va kume tinhlamulo ta swivutiso leswo nakone va yampswise wutomi byavu. Na wene u nga pfuneka hi ku tiva tinhlamulo ta swivutiso leswo.

U nga ha tivutisa: ‘Xana swa koteka ku tiva ntiyiso mayelanu ni ntxhumu wa kukazri?’ Nakunene, ku tiva ntiyiso mayelanu ni mintxhumu yinyingi namunhla swi tikomba na swi ya swi kazrata swinene. Ha yini?

Vhanu vanyingi a va swi dumbi leswi vafumi, tikomponi, kumbe va ku haxa madzrungula va va byelaka swone. Va swi vona na swi kazrata ku tiva leswaku leswi va va byelaka swone i ntiyiso kumbe i mavonela ntsena, neswaku vo va tlhotela swa kukazri kumbe vo va hembela. Ka xiyimu lexi xa ku kala ku dumbanana ni lexi taliki hi madzrungula ya madzrimi, vhanu va ni mavonela lama hambaniki mayelanu ni leswi ntiyiso wu nga swone ni ndlela leyi wone wu nga byi khumbisaka xiswone wutomi byavu.

Nambi leswi ku nga ni swikazratu leswo, swa koteka ku kuma tinhlamulo leti dumbekaka ta swivutiso swa lisima swinene a wuton’wini. Xana hi nga ti kumisa kuyini? Hi ku tizrisa mayentxela lawa u ma tizrisaka ka mintxhumu yin’wana ya wutomi bya siku ni siku.

Siku ni siku wa wu djuletela ntiyiso hi mpimu wa kukazri. Vona xikombiso xa mamana wa kukazri va liki hi Jessica. A li: “Ndlela leyi xin’hwanyatana xanga xi vabyaka ha yone loko xi da mazrumana ya txhavisa swinene. Nambi ku da swizrumatana switsrongo ntsena swi nga ha xi dlaya.” Swi sindzrisa leswaku Jessica a swi tiva ha hombe swakuda leswi a swi xavaka akuva swi nga ti xi vabya. A tlhele a ku: “Ntxhumu wa ku sungula lowu ni wu yentxaka i ku dondzra ha hombe leswi va swi hambisiki xiswone. Ntsrhaku ka leswo, ni djula ku tiva leswi yengetelekiki nambi hi ku fonela muhambi akuva ni tiyiseka leswaku a ku zanga ku petiwa mazrumana hi mphazamu. Handle ka leswo, ni kambela ka swihlovo swin’wana leswi dumbekaka akuva ni tiva leswi yengetelekiki hi ndhuma leyi muhambi wa kone a nga na yone hi swakuda leswi a swi hambaka.”

Swi nga ha yentxeka ndlela leyi u djuletelaka ntiyiso ha yone siku ni siku yi nga fani ni ya Jessica, kambe ku fana na yene, u nga ha tizrisa mayentxela lama landzrelaka akuva u kuma tinhlamulo ta swivutiso leswi u nga na swone:

• Djula ku tiva leswi mhaka yi tsrhamisiki xiswone.

• Yentxa wusetxhisisi lebyi yengetelekiki.

• Tiyiseka leswaku swihlovo swa kone swa dumbeka.

Mayentxela wolawo ma nga ku pfuna ku kuma tinhlamulo ta ntiyiso mayelanu ni swivutiso swa lisima swinene a wuton’wini. Hi ndlela yini?

Loko a setxhisisa ntiyiso a Bibeleni, Jessica a tizrise mayentxela lama fanaka ni loko a setxhisisa hi swakuda leswi kalaka swi nga ti vabya xin’hwanyatana xakwe. A li: “Ku dondzra hi wunyaminyami ni ku setxhisisa hi wuyenti swi ni pfune ku kuma ntiyiso lowu nga a Bibeleni.” Ku fana na Jessica, magidigidi ya vhanu namunhla va dondzra leswi Bibele dzri swi hlayaka mayelanu ni swivutiso leswi landzrelaka:

• Hi wini nkongometo wa wutomi?

• Xana vafi va le ka xiyimu xini?

• Ha yini hi xaniseka?

• I yini leswi Xikwembu Nkulukumba a swi yentxaka akuva a helisa ku xaniseka hinkwaku?

• Xana hi nga ku kumisa kuyini ku nyonxa a ndangwini?

U nga kuma tinhlamulo leti nga ntiyiso ta swivutiso leswo ni swin’wana hi ku dondzra Bibele ni ku yentxa wusetxhisisi lebyi yengetelekiki ka www.jw.org.