О Ноё лэ ереса, ай кадяжэ и животни зажылэ андо ковчеӷо. О Иегова заԥандадя пала лэндэ и двэри и ля тэ жал брышын. О паи сас кадя бут, кай о ковчеӷо вазгляпэ и ля тэ плавуий. И акэ о паи зашутя вся и ԥув. Всаворэ мануша, савэ на зажылэ андо ковчеӷо, мулинэ. Ай о Ноё и лэско ери ашэлэпэ жундэ. Сар же вонэ сас ради, кай канглэ лэ Иеговас!

О брышын жалас 40 деса и 40 рятя, ай тоди парашэля. По набут о паи ля тэ ужал. И акэ о ковчеӷо терделя андэ плая. О паи инке сас фартэ бут, важ када о Ноё и лэско ери на вижанас анда ковчеӷо.

По набут о паи ужыля па ԥув. О Ноё и лэско ери слинэ андо ковчеӷо май бут бэршэстар. Сар же вонэ слинэ ради, кала о Иегова ԥэндя лэнди тэ вижан анда ковчеӷо! Кала вонэ вижылэ, важ лэндэ када сас кацаво раимос, ԥэнэса нэви жизня! Кадэла восемь мануш анда вся оди ԥэндэ «наис» лэ Иеговасти, важ кода кай вонэ ашэлэпэ жундэ, и важ када андэ́ лэсти жертва.

Лэ Иеговасти фартэ чалеля кадэя жертва, сави вонэ андэ́. Во дя алав, кай будэр никала лэ паеса на лэла тэ тасавэл вся, со исин пэ ԥув. Во сыкадя, кай зритярэла пэско алав. Сар? Во стердя по нэбо пэрво радуӷа. Ту варикала диқлян и радуӷа?

Ай инке о Иегова ԥэндя лэ Ноёстирэ ерести, кай лэндэ тэ авэн бэятцэ, и кай лэндар тэ жан мануша па вся ԥув.