„О ШУКАРИПЕ е пхраленгоро хем е пхењенгоро сине адава со привлечинѓа ман“ вакерѓа и Лиса. * Ој керѓа лафи башо адава со највише привлечинѓа ла ко почеток ко чачипе. Нешто слично вакерѓа и Ен: „Ко почеток повише привлечинѓа ман адава со е Јеховаскере сведокија понашинѓе пе манцар шукар, него адава со шунава сине“. Адалеске со о шукар постапке бут влијајнѓе упри ленде, о солдуј уживинена акана те читинен и Библија хем хор те размислинен баши лате.

Сар шај те сикава шукарипе кова со ка охрабринел е јаверен? Ка кера лафи башо дуј начинија: амаре лафенцар хем амаре постапкенцар. А пало адава ка дикха каске ваљани те сикава шукарипе.

И ромни сој опишими ко Изреки 31 поглавје иси ла ки пли чхиб „о закони е шукарипаскоро“ (Изр. 31:26). Ој дозволинела акава „закони“ те влијајнел упро адава со вакерела хем сар вакерела адава. Е даден исто аѓаар ваљани те овел лен акава „закони“ ки чхиб. Бут родителија тане свесна кај кеда керена ко грубо начин лафи пле чхавенцар адава шај те влијајнел негативно упри ленде. О чхаве шај бут полокхе те овен послушна пумаре родителенге кеда о родителија керена лафи ко јекх љубезно начин.

Бизи разлика дали сиан родители или на, сар шај те сикљове те кере лафи ко љубезно начин? О прво дело таро Изреки 31:26 шај те поможинел тут ко адава. Атхе пишинела: „Кеда керела лафи, керела лафи ко мудро начин“. Ко адава тано вклучимо мудро те бирина амаре лафија хем сар вакераја адава. Ка овел шукар те пуча амен: „Дали адава со вакерава ка хољанкерел околе со шунела ман или ка смиринел и ситуација?“ (Изр. 15:1). Оја, мудро тано те размислина англедер те кера лафи.

Јекх јавер изрека вакерела: „О лафија сој вакерде бизо те мислинел пе посавена сар мачи“ (Изр. 12:18). Кеда размислинаја башо адава сар амаре лафија хем о начин сар вакераја лен влијајнена упро јавера, тегани веројатно ка пазина со икљола таро амаро муј. Кеда применинаја „о закони е шукарипаскоро“ нане те користина лафија коленцар со шај те повредина е јаверен хем ка пазина сар кераја лафи (Еф. 4:31, 32). Адава ка поможинел амен те чхинава те размислина хем те кера лафи ко негативно начин хем ка почмина те кера позитивно хем љубезно лафи. О Јехова постапинѓа аѓаар кеда охрабринѓа пле слуга е Илија кова со дарала сине. О ангели кова со претставинела сине е Јехова керѓа „смирено хем љубезно“ лафи (1. Цар. 19:12). Те овел пе шукар тано нешто повише него само те керел пе љубезно лафи. Амен мора исто аѓаар амаре постапкенцар те сикава шукарипе. Сар?

Џаја пало е Јеховаскоро пример, аѓаар со кераја љубезно лафи хем постапинаја шукар (Еф. 4:32; 5:1, 2). И Лиса кола со спомнинѓем ла англедер, вакерела кобор шукарипе сикавѓе лаке е Јеховаскере сведокија: „Кеда ме хем ми фамилија мора сине сигате те  селина амен, дуј брачна парија таро собрание ослободинѓе пе тари бути те шај те поможинен амен те кхеда амаре буќа. Ко адава време ни на проучинава сине и Библија!“ Адаја шукар постапка поттикнинѓа е Лиса те дознајнел нешто повише башо чачипе.

И Ен кола со спомнинѓем ла ко почеток, исто аѓаар сине благодарно башо шукарипе со сикавѓе лаке о Сведокија. Ој вакерела: „О начин сар постапинена о мануша ко свето, керѓа те на дикхав шукар ко јавера. Пхаро сине манге те овел ман доверба ко мануша“. Ој понадари вакерела: „Кеда запознајнѓум е Јеховаскере сведокон, ко почеток на верујнава лен сине. Пучава ман сине соске тане љубезна манцар? Ама о шукарипе со сикавѓа манге и пхен со проучинела сине манцар поттикнинѓа ман те овел ман доверба ки лате. Адалеске, пало несаво време почминѓум повише те концентриринав ман ко адава со сикљовава сине“.

Шај те приметина кај упри и Лиса хем и Ен бут влијајнѓа адава со несаве таро собрание постапинѓе ленцар шукар хем адава поттикнинѓа лен те манген те сикљовен повише башо чачипе. О шукарипе со сикавѓе  ленге о пхраља хем о пхења, поможинѓа ленге те овел лен доверба ко Јехова хем ко лескоро народо.

О начин сар сине воспитиме или коте бариле влијајнѓа упро несаве те шај те овел ленге полокхе те керен љубезно лафи или те асан. Шукар тано кеда несаве мануша тане природно љубезна или тари култура керена адава, ама ако мангаја те сикава е Девлескоро шукарипе нане доволно те ова љубезна само адалеске со адава тано културно или соске природно авела аменге те кера адава. (Споредин Дела 28:2.)

Е Девлескоро шукарипе тани особина со авела таро свети дух (Гал. 5:22, 23). Значи, те шај те ова чаче шукар ваљани те дозволина е Девлескоро свети дух те влијајнел упро амаро размислување хем постапке. Кеда ка кера адава, ка џа пало е Јеховаскоро хем е Исусескоро пример. Хем сар христијања сикаваја интерес е јаверенге. Ко адава поттикнинела амен о мангипе со иси амен спрема о Јехова хем о мангипе спрема амаре пхраља. Аѓаар, амаро шукарипе овела јекх силно особина која со авела таро вило хем керела е Девле бахтало.

Шај тано локхо те сикава шукарипе околенге сој тане љубезна аменцар или околенге со џанаја лен (2. Сам. 2:6). Јекх начин сар шај те кера адава тано ако сием благодарна (Кол. 3:15). Ама со ако мислинаја кај некој на заслужинела те ова леа шукар?

Размислин башо акава: о Јехова тано о најбаро пример со сикавела шукарипе со на заслужинела пе хем преку пло Лафи сикавела амен кобор тано важно те сикава адаја особина. О израз „шукарипе со на заслужинела пе“ тано бут пути користимо ко Христијанска грчка списија. Сар сикавела аменге о Девел шукарипе?

О Јехова сикавела са е манушенге шукарипе аѓаар со дела амен са сој аменге потребно те шај те ачхова ко живото (Мат. 5:45). Уствари ов сикавѓа аменге шукарипе панда англедер те џана ле (Еф. 2:4, 5, 8). На пример, ов денѓа пло најскапоцено са е манушенге — пле најмангле Чхаве. О апостол Павле пишинѓа кај о Јехова обезбединѓа и откупнина соске лескоро шукарипе тано бут баро (Еф. 1:7). Иако грешинаја хем разочаринаја е Јехова, ов понадари да водинела амен хем сикавела амен. Лескере поуке хем лафија тане сар „ситно бршим“ (5. Мој. 32:2). Амен нашти целосно те ирана леске о шукарипе со сикавела ле аменге. Уствари, ако о Јехова на би сикавела аменге сине шукарипе со на заслужинела пе, нане те овел амен сине надеж баши пошукар иднина. (Споредин 1. Петрово 1:13.)

Чаче, е Јеховаскоро шукарипе тано привлечно хем охрабрувачко. Адалеске, наместо те бирина каске ка сикава шукарипе ваљани те џа пало е Јеховаскоро пример аѓаар со ка сикава шукарипе секова диве (1. Сол. 5:15). Ако на чхинаваја те сикава шукарипе, тегани ка ова сар јаг со таќарела амен ко шудро диве. Адалеа ка кера шукарипе амаре фамилијаке, е пхраленге хем е пхењенге, амаре колегенге, е соучениконге хем е комшиенге.

Размислин ки некасте тари тли фамилија или таро собрание коле со ка овел ле корист ако кереа лафи хем постапинеа ко љубезно начин. Шај иси некој ко собрание каске со ваљани посебно помош околу пло кхер, дворо или пазарибе. Или кеда дикхеа некас ки служба каске со ваљани помош, дали ко несаво начин шај те поможине леске?

Адалеске те ова сар о Јехова, амаре лафија хем постапке секогаш нека овен водиме таро „закони е шукарипаскоро“.