1-2. Со ка дикха ки акаја статија?

ПОНЕКОГАШ размислинаја ко адава кај о живото тано кратко хем кај тано пхердо неволје (Јов 14:1). Адалеске понекогаш адава керела амен те осетина амен обесхрабриме. Бут слуге е Јеховаскере ко пурано време осетинѓе пе аѓаар. Несаве чак мангле те мерен (1. Цар. 19:2-4; Јов 3:1-3, 11; 7:15, 16). Ама секогаш о Јехова — о Девел колесте со сине лен доверба — утешинѓа лен хем денѓа лен сила. Ленгере искуствија сине пишиме те шај те утешинен амен хем те сикљова лендар (Рим. 15:4).

² Ки акаја статија ка дикха несаве примерија таро е Јеховаскере слуге со издржинѓе џикоте сине обесхрабриме, сар сој е Јаковескоро чхаво о Јосиф, и удовица и Ноемина хем лакири бори и Рут, о левити со пишинѓа о Псалм 73 хем о апостол Петар. Сар о Јехова денѓа лен сила, хем со шај те сикљова амен таро ленгере примерија? О одговорија ко акала пучиба уверинена амен кај „о Јехова тано паше узо адала сој пхаге вилеа“ хем спасинела адален сој тане обесхрабриме (Пс. 34:18).

3-4. Со уло е Јосифеске кеда сине терно?

³ Е Јосифе сине ле 17 берш кеда дикхља дуј суне кола со сине таро Девел. Адала суне сикавѓе кај о Јосиф јекх диве ка овел важно мануш касте со и фамилија ка поштујнел (1. Мој. 37:5-10). Ама, кратко откеда дикхља акала суне, ко живото случинѓе пе леске лошна буќа. Ко адава време, лескере пхраља на поштујнена ле сине ни хари. Адалеске, бикинѓе ле хем ов уло робо ко Египет ко јекх службенико со викинела пе сине Петефри (1. Мој.  37:21-28). Е Јосифескоро живото целосно менинѓа пе башо кратко време. На сине више кхере пле дадеа кова со бут мангела ле сине. Уло јекх робо ко Египет, кова со керела сине бути ко јекх мануш со на пенџарела сине е Јехова (1. Мој. 39:1).

⁴ Ама, е Јосифескере проблемија уле чак полошна. Е Петефријаскири ромни обвининѓа е Јосифе кај ов мангља те силујнел ла. О Петефри на трудинѓа пе те дознајнел дали адава тано чаче. Наместо адава, фрдинѓа е Јосифе ко затвор коте со сине пханло ко синџирија (1. Мој. 39:14-20; Пс. 105:17, 18). Замислин туке сар осетинѓа пе о терно Јосиф адалеске со сине обвинимо кај мангља те силујнел ла. О мануша шај керена сине лошно лафи башо е Јосифескоро Девел, о Јехова, кеда шунѓе башо акава. Сигурно е Јосифе сине ле причина те осетинел пе обесхрабримо!

5. Со поможинѓа е Јосифеске те на овел обесхрабримо?

⁵ Адалеске со сине робо, а покасно затворенико, о Јосиф нашти сине те менинел пли ситуација. Сар ачхило урамнотежено? Наместо те концентриринел пе ко адава со нашти те керел, трудинела пе сине те керел адава со сине леске дендо. Ко е Јосифескоро живото, о Јехова сине леске и најважно личност. Хем адалеске о Јехова денѓа ле берекети ко са со керѓа (1. Мој. 39:21-23).

6. Сар е Јосифескере суне шај охрабринѓе ле?

⁶ О Јосиф шај охрабринѓа пе адалеа со размислинела сине башо суне со сине таро Јехова некобор берша англедер. Адала суне шај сине доказ кај ка шај палем те дикхел пле фамилија хем кај лескири ситуација ка овел пошукар. Хем баш адава уло. Кеда е Јосифе сине ле 37 берш, лескере суне почминѓе те исполнинен пе ко јекх чудесно начин! (1. Мој. 37:7, 9, 10; 42:6, 9).

7. Спрема 1. Петрово 5:10, со ка поможинел аменге те издржина кеда иси амен неволје?

⁷ Поуке аменге. Адава со уло е Јосифеске сетинкерела амен кај акава свето тано сурово хем кај о мануша ка постапинен аменцар  неправедно. Чак о пхраља хем о пхења таро собрание шај те дукхавен амен. Ама, ако дикхаја е Јехова сар амари Карпа, или тхан коте со гараваја амен, нане те ова бут разочариме хем нане те чхинава те служина леске. (Пс. 62:6, 7; читин 1. Петрово 5:10.) Исто аѓаар, ма бистре кај е Јосифе шај сине ле 17 берш кеда о Јехова денѓа ле те дикхел адала суне. Значи, е Јехова иси ле доверба ко пле терне слуге. Авдиве бут терне тане сар о Јосиф. Лен да иси лен вера ко Јехова. Несаве лендар сине неправедно пханле ко затвор адалеске со ачхиле верна е Девлеске (Пс. 110:3).

8. Со уло е Ноеминаја хем е Рутаја?

⁸ Адалеске со сине баро бокхалипе, и Ноемина хем лакири фамилија мукхле пумаро кхер ки Јуда хем селинѓе пе ки јавер пхув Моав. Адари е Ноеминакоро ром, о Елимелех, муло хем ој ачхили пле дује чхавенцар. Пало несаво време лакере солдуј чхаве женинѓе пе Моавкенцар, и Рут хем и Орфа. Пало деш берш, е Ноеминакере чхаве исто аѓаар муле, бизо те овел лен чхаве (Рут 1:1-5). Замислин туке кобор сине тажна акала трин џувља! И Рут хем и Орфа шај сине палем те кхувен ко брако јаверенцар. Ама, кој ка грижинел пе сине е пхуре Ноеминаке? И Ноемина сине добором обесхрабрими со вакерѓа: „Ма викинен ман Ноемина. Викинен ман Мара, соске о Семоќно керѓа мло живото бут керко“. Пало са акала тажна буќа со доживинѓа, и Ноемина иранѓа пе ко Витлеем, хем лаја гели и Рут (Рут 1:7, 18-20).

9. Спрема Рут 1:16, 17, 22, сар и Рут охрабринѓа е Ноемина?

⁹ Со поможинѓа е Ноеминаке? Адава со сине лаке сикавдо верно мангипе. На пример, и Рут сикавѓа верно мангипе е Ноеминаке адалеа со ачхили лаја. (Читин Рут 1:16, 17, 22.) Ко Витлеем и Рут керела сине бут бути, те кхедел гив песке хем е Ноеминаке. Адалеске, акаја терни џувли керѓа песке шукар анав (Рут 3:11; 4:15).

10. Сар о Јехова сикавѓа мангипе е чороленге сар со сине и Ноемина хем и Рут?

¹⁰ О Јехова денѓа е Израелцонге јекх закони со сикавела кај тано сочувствително спрема о чороле, сар со сине и Ноемина хем и Рут. Ов вакерѓа пле народоске кеда кхедена и жетва, ола ваљани те мукхен о стране таро поле те шај о чороле те кхеден (3. Мој. 19:9, 10). Аѓаар и Ноемина хем и Рут на ваљани сине те молинен е јаверен башо хајбе.

11-12. Сар о Вооз керѓа бахтале е Ноемина хем е Рута?

¹¹ И нива коте со и Рут кхедела сине гив сине јекхе барвале манушескири со викинела пе сине Вооз. Ов сине воодушевимо кеда дикхља кобор сине верно и Рут е Ноеминаке хем кобор мангела ла сине. Адалеске о Вооз женинѓа пе е Рутаја хем кинѓа о ниве со порано припадинена сине е Ноеминакере фамилијаке (Рут 4:9-13). Олен сине лен чхаво колеске со чхивѓе анав Овид, кова со сине о папо е Давидескоро (Рут 4:17).

¹² Замислин кобор бахтали сине и Ноемина кеда икерѓа ко васта е тикне Овиде хем благодаринѓа пе е Јеховаске ки молитва! Ама, и Ноемина хем и Рут ка доживинен нешто панда пошукар ки иднина. Кеда ка воскреснинен, ола ка овен бут бахтале кеда ка дознајнен кај о ветимо Месија, о Исус Христос, ало тари е Овидескири лоза!

13. Кола важна поуке шај те сикљова таро извештај баши Ноемина хем и Рут?

¹³ Поуке аменге. Кеда иси амен неволје шај осетинаја амен обесхрабриме, па чак разочариме. Шај мислинаја кај амаре проблемија нашти те решинен пе. Кеда осетинаја амен аѓаар, ваљани те овел амен целосно доверба ко амаро небесно Дад хем те ачхова паше амаре пхраленцар хем пхењенцар таро собрание.  Џанѓола пе о Јехова шај нане те цидел амендар и неволја. На пример, ов на воскреснинѓа е Ноеминакере роме хем е чхавен. Ама ов ка поможинел аменге, понекогаш преку о постапке хем о верно мангипе со сикавена амаре пхраља хем пхења (Изр. 17:17).

14. Соске јекх левити бут обесхрабринѓа пе?

¹⁴ О Псалм 73 пишинѓа ле јекх левити. Адалеске со сине левити сине ле бари чест те служинел ко тхан коте со обожавинела пе сине о Јехова. Ама ко јекх периоди таро пло живото ов обесхрабринѓа пе. Соске? Ов почминѓа те завидинел е лошна манушенге хем е чалмџиенге, на адалеске со керена сине лошна буќа, него башо адава со изглединела сине кај ленгоро живото тано пошукар таро лескоро (Пс. 73:2-9, 11-14). Изглединела сине сар те пхене иси лен са — барвалипе, шукар живото хем на сине лен секирацие. Кеда о левити дикхља акава, сине бут обесхрабримо хем вакерѓа: „Чаче, џабе трудинѓум ман мо вило те ачховел чисто“. Јасно, акава шај те анел сине џи ко адава ов те чхинавел те служинел е Јеховаске.

15. Спрема Псалм 73:16-19, 22-25, сар о левити кова со пишинѓа акава псалм накхавѓа о обесхрабрување?

¹⁵ Читин Псалм 73:16-19, 22-25. О левити кхувѓа „ко баро светилиште е Девлескоро“. Џикоте сине ко е Девлескоро кхер е јаверенцар со служинена сине е Јеховаске, ов шај сине те овел смиримо, јасно те размислинел хем те молинел пе баши пли ситуација. Аѓаар шај сине те дикхел кај лескоро размислибе на сине мудро хем кај шај сине те нашавел пло амалипе е Јеховаја. Ов исто аѓаар халило кај о лошна тане ко „лизгаво тхан“ хем кај ка овел лен „страшно крајо“. Те шај те цидел пестар и завист хем о обесхрабрување, о левити кова со пишинѓа акава псалм ваљани сине те дикхел ко буќа сар со дикхела о Јехова. Кеда керѓа адава, ов више на сине обесхрабримо, него сине бахтало. Ов вакерѓа: „Освен [о Јехова], ништо јавер на ваљани манге ки Пхув“.

16. Со шај те сикљова таро акава левити?

¹⁶ Поуке аменге. На ваљани никогаш те завидина е лошна манушенге адалеске со изглединела кај иси лен бахтало живото.  Ленгоро бахталипе ка нашавѓовел хем нане те живинен вечно (Проп. 8:12, 13). Ако завидинаја ленге, ка ова обесхрабриме хем ка нашава амаро амалипе е Јеховаја. Адалеске ако ту да некогаш почминеа те осетине тут сар о левити, кер адава со ов керѓа. Шун е Девлескоро љубезно совет хем дружин тут околенцар со керена е Јеховаскири волја. Кеда мангеа е Јехова највише таро са, тегани ка аракхе чачутно бахталипе хем ка ачхове ко друмо кова со ингарела ко „чачутно живото“ (1. Тим. 6:19).

17. Кола причине сине е Петаре те овел обесхрабримо?

¹⁷ О Петар сине темпераментно мануш. Ама, понекогаш ов вакерела сине или керела сине буќа бизо те размислинел хем покасно перела сине пишмани башо адава. На пример, кеда о Исус вакерѓа пле апостоленге кај ка овел мучимо хем ка мерел, о Петар вакерѓа леске: „Адава никогаш нане те случинел пе туке“ (Мат. 16:21-23). Тегани о Исус исправинѓа е Петаре. Кеда о мануша але те астарен е Исусе, о Петар бизо те размислинел чхинѓа о кан јекхе манушескоро со сине е првосвештеникоскоро робо (Јован 18:10, 11). О Исус палем исправинѓа е апостоле. Освен адава, о Петар вакерѓа кај чак ако о јавера апостолија откажинена пе е Исусестар, ов никогаш нане те керел адава! (Мат. 26:33). Ама о Петар на сине добором силно сар со мислинѓа. Покасно ки исто рат, откажинѓа пе е Исусестар трин пути. О Петар сине бут обесхрабримо, ов „иклило аври хем бут рунѓа“ (Мат. 26:69-75). Шај пучела пе сине дали о Исус некогаш ка простинел леске.

18. Сар о Исус поможинѓа е Петареске те на овел више обесхрабримо?

¹⁸ Сепак, о Петар на дозволинѓа те овел претерано обесхрабримо. Пали адаја грешка, ов понадари да служинела сине е Јеховаске е јавере апостоленцар (Јован 21:1-3; Дела 1:15, 16). Со поможинѓа леске палем те осетинел  пе шукар? О Петар сетинѓа пе кај о Исус поангле молинѓа пе леске те на откажинел пе тари пли вера, а исто аѓаар о Исус поттикнинѓа е Петаре те иранел пе ко пле пхраља хем те охрабринел лен. О Јехова одговоринѓа ки адаја молитва со авела сине таро вило. Покасно, о Исус лично појавинѓа пе е Петареске, веројатно те шај те охрабринел ле (Лука 22:32; 24:33, 34; 1. Кор. 15:5). О Исус исто аѓаар појавинѓа пе са е апостоленге откеда ола цело рат геле те астарен мачхе ама на астарѓе ништо. Ки адаја прилика, о Исус денѓа е Петареске шанса те сикавел кобор мангела е Исусе. О Исус простинѓа пле мангле амалеске хем денѓа ле повише одговорностија (Јован 21:15-17).

19. Сар о Псалм 103:13, 14, поможинела аменге те хаљова сар дикхела о Јехова ки аменде кеда грешинаја?

¹⁹ Поуке аменге. Адава сар о Исус постапинѓа е Петареа сикавела кобор тано милостиво, исто сар пло небесно Дад. Адалеске кеда амен кераја грешке, на ваљани те мислина кај о Јехова никогаш нане те простинел аменге. Ваљани те овел амен ки годи кај о Сатана мангела те мислина аѓаар. Наместо адава, ваљани те трудина амен те дикха коркори амен хем е јаверен со грешинѓе аменге аѓаар сар со дикхела амен амаро небесно Дад, кова со сикавела аменге сочувство хем мангипе. (Читин Псалм 103:13, 14.)

20. Со ка дикха ки следно статија?

²⁰ О примерија таро Јосиф, и Ноемина хем и Рут, о левити хем о Петар уверинена мен кај „о Јехова тано паше узо адала сој пхаге вилеа“ (Пс. 34:18). Ов понекогаш дозволинела те доживина неволје хем те ова обесхрабриме. Ама, кеда издржинаја о неволје адалеске со о Јехова поможинела аменге, амари вера овела позорали (1. Пет. 1:6, 7). Ки следно статија, понадари да ка дикха сар о Јехова поддржинела пле верна слуген кола сој обесхрабриме адалеске сој тане несовршена или адалеске со иси лен пхаре околностија.