LEKCIJA 19
Hine čačikane kresťana le Jehovaskere svedki?
Amen le Jehovaskere svedki paťas, hoj sam čačikane kresťana. Soske oda šaj phenas? Džanes, khatar las oda, so paťas? Soske pes avka vičinas? Savo kamiben presikavas jekh avreske?
1) Khatar le Jehovaskere svedki len oda, so sikhľaren?
O Ježiš phenďa: „[le Devleskero] lav hin o čačipen.“ (Ján 17:17 NZ) Avka sar o Ježiš, the le Jehovaskere svedki zathoven sa, so sikhľaren pro Devleskero lav. Le tuke avka. Khatar o berš 1870 parudžene chudle te rodel, so sikhľarel e Biblija. Oda, so pes latar dodžanle, sas aver sar oda, so vakeren rašaja. Aľe on the avka paťanas oleske, so arakhle andre Biblija. A mek pal ola čačipena denas duma the aver manušenca. a
2) Soske pes vičinas le Jehovaskere svedki?
O Jehovas vičinel peskere manušen svedki, bo pal leste vakeren čačipen. (Hebrejom 11:4–12:1) Imar anglo but berša o Jehovas phenďa peskere ľudoske: „San mire svedki.“ (Pregen Izaiáš 43:10) Pal o Ježiš hin tiš phendo, hoj hino „verno svedkos“. (Zjavenie 1:5) Vašoda pes beršestar 1931 vičinas le Jehovaskere svedki. Sam igen barikane, hoj šaj phiravas (hordinas) le Devleskero nav.
3) Andre soste presikaven le Jehovaskere svedki ajso kamiben sar o Ježiš?
O Ježiš avka rado dikhelas peskere učeňiken, hoj sas leske sar fameľija. (Pregen Marek 3:35) The le Jehovaskere svedki hine pal calo svetos sar jekh bari fameľija. Vašoda jekh avreske phenas: Phrala! Pheňije! (Filemonovi 1, 2) Dživas pal o lava: „Kamen savore phralen.“ (1. Petra 2:17) Le Jehovaskere svedki sikaven ajso kamiben the akor, sar pes lengere phralenge, save len hin pal calo svetos, vareso ačhel a kampel varesoha te pomožinel.
DODŽAN TUT BUTER
Khatar pes ile le Jehovaskere svedki? So sikavel, hoj sam čačikane kresťana?
Čačikane kresťana zathoven oda, so paťan pre Biblija u vakeren pal oda avrenca
4) Oda, so sikhľaras, zathovas pre Biblija
O Jehovas phenďa anglal, hoj avela o časos, kana o manuša furt feder a feder achaľona o čačipena andal e Biblija. Pregen Daniel 12:4 the poznamka a paľis vakeren jekhetane:
-
Ke soste oda ľidžalas, kana le Devleskere manuša rodenas o čačipen andre Biblija?
Dikh, sar vajkeci (paru) manuša rodenas čačipen andre Biblija. Jekh lendar sas Charles Russel [čárlz rasl]. Mukh o VIDEJO a paľis vakeren jekhetane.
-
Sar o Charles Russel [čárlz rasl] the ola, so sas leha, rodenas o čačipen andre Biblija?
Džanehas?
Varekana kampelas te prikerel vareso, so paťas. Soske? Kana hin tosarutno kham, na dičhol minďar savoro. Čim buter o kham džal upre, buter dičhol savoro. Avka kerďa the o Del le čačipnaha andal e Biblija. Andro peskero časos sikavel, sar leske feder te achaľol. (Pregen Príslovia 4:18) E Biblija hiňi furt odi isto. Ča feder achaľuvas, so hin andre late.
5) Oda, sar pes vičinas, sikavel, so keras
Soske pes vičinas le Jehovaskere svedki? Mukh o VIDEJO a paľis vakeren jekhetane.
-
Soske nane ňič nalačho pre oda, hoj pes vičinas le Jehovaskere svedki?
O Jehovas peske kidňa avri le manušen, kaj pes vaš leske te zaačhen a kaj pal leste te vakeren čačipen. Soske? Bo pro Del pes phenen igen but klamišagi. Las amenge ajse duj klamišagi.
But vjeri sikhľaren, hoj o Del kamel, kaj pes te modľinas ko svata obrazki the soški. Čačes hin oda avka? Pregen 3. Mojžišova 26:1 a paľis vakeren jekhetane:
-
Savo čačipen adaj arakhľal? Sar o Jehovas dikhel pro svata obrazki the soški?
But rašaja the pastora sikhľaren, hoj o Ježiš hino o Del. Čačes hin oda avka? Pregen Ján 20:17 a paľis vakeren jekhetane:
-
Savo čačipen adaj arakhľal? Hin o Del the o Ježiš oda isto dženo?
-
Sar tu dikhes pre oda, hoj le Jehovas hin adaj svedki, so vakeren čačipen pal leste the pal leskero Čhavo?
6) Rado dikhas jekh avres
E Biblija phenel, hoj kresťana hine sphandle sar kotora andro ťelos. Pregen 1. Korinťanom 12:25, 26 a paľis vakeren jekhetane:
-
So keren čačikane kresťana, te aver kresťanos cerpinel?
-
Tu zadžiďiľal oda, sar peske le Jehovaskere svedki presikaven o kamiben?
Kana le Jehovaskere svedki predživen varesavi bibacht, o svedki andal aver krajini lenge so neksigeder aven te pomožinel. Dikh sar ada hin. Mukh o VIDEJO. Paľis vakeren jekhetane.
-
Savo baro kamiben presikade le Jehovaskere svedki, sar avle te pomožinel peskere phralenge?
Duj Jehovaskere svedki presikaven kamiben jekha dake le čhavoreha
VAREKO ŠAJ PHENEL: „Le Jehovaskere svedki hine ča nevi vjera.“
-
Kanastar vičinel o Jehovas peskere manušen svedki?
SO SIKHĽIĽAM
Le Jehovaskere svedki hine čačikane kresťana. Sam sar jekh fameľija pal calo svetos. Sa, so sikhľaras hino zathodo pre Biblija u vakeras avrenge čačipen pal o Jehovas.
So bi phenehas
-
Soske pes vičinas le Jehovaskere svedki?
-
Sar jekh avreske presikavas kamiben?
-
Tu so phenes, hine čačikane kresťana le Jehovaskere svedki?
DIKH TUKE BUTER
Dikh tuke pal amari vjera.
Jehovovi svedkovia – ľudia so živou vierou, 1. časť: Z tmy do svetla (1:00:53)
Dikh, sar le Jehovaskere svedki odučharde čačipen.
Kames vareso te džanel pal o Jehovaskere svedki? Adaj tut oda dodžanes.
Stephen [stývn] našťi avri ačhelas le manušen, saven sas aver cipa u marelas len. Pregen tuke, so ajso dikhľa pro Jehovaskere svedki, hoj ačhiľa aver.
„Môj život bol stále viac naplnený násilím“ (Strážna veža z 1. júla 2015)
a Beršestar 1879 le Jehovaskere svedki den avri o časopisos E Stražno veža, savo sikavel, so phenel e Biblija.
Dikh the pre ada
SO O MANUŠA KAMEN TE DŽANEL
So oda hin te sikhľol la Biblijatar?
Te kavka sikhľona la Biblijatar le Jehovaskere svedkenca, šaj genen andal e Biblija, savi tumen kamen. Šaj vičinen la fajta, le kamaraten abo kas kamen.
