“Apocalipsis” shimita uyashpaca ¿imatata yuyapangui? ¿Manllanai llaquicuna shamushpa cai Alpapi causaita tucuchinatachu yuyapangui? Huaquin gentecunaca manllanai llaquicuna shamushpami cai Alpapi causaitaca tucuchinga nishpami crin. Ashtahuangarin nali noticiacunata liishpami chashna crin.

•   Boletín de Científicos Atómicos nishcaca cashnami nin: “Pipash callarichijpi o por accidentemi shuj guerraca callaringa”.

•   National Geographic nishcaca cashnami nin: “Cai último 10 huatacunapica mundo enteropimi shuj shuj llaquicuna tiashca. Por ejemplo jatun bosquecunami rupashca, na tamiashca, yapata indishca, yapa tamiamanda yacu jundashca, mar yacu ucupi tiashca coralcunapash yurajmanmi tigrashca”.

•   The Associated Press nishcaca cashnami nin: “África llactapi langosta jurucunaca jatun jatunmi can. Shinallata chai llactapi tiashca micunacunataca tucuillatami tucuchin”.

 ¿Mundo enteropi llaquicuna tiashpachu cai Alpaca tucuringa? Bibliaca ¿imatata yachachin?

 Na. Taita Diospa shimi Bibliapica cai Alpaca para siempremi tianga ninmi (Eclesiastés 1:4). Cai Alpata tucuchingapaj randica Taita Diosca “cai Alpata tucuchijcunatami” tucuchinga (Apocalipsis 11:18).

 Bibliapica, cai “Alpa” tucuringa nishpaca Taita Diospa mandashcacunata na cazungapaj munajcuna, paicunapa munashcata ruraj gentecuna tucurinatami ningapaj munan. Noepa punllacunapishnami Taita Diosca ‘paita na manllaj runacunataca’ tucuchinga (2 Pedro 2:5; 3:7).

 1 Juan 2:17​pi nishcashnaca “cai pachaca, tucui imapash nali munaicunandimi tucurijun”. Bibliapi nishcashnaca Taita Diosca cai Alpataca na tucuchingachu, sino cai Alpapi nali cosascunata ruraj gentecunatami tucuchinga.

 Bibliaca ima horapacha chayamunataca na nijunllu (Mateo 24:36). Shinapash Bibliapica tucurimui punllaca ñami chayamujun ninmi. Chaitaca ¿imashinata yachanchi? Bibliapi tucurimui punllacunapi ima pasanata ricupashun:

•   Guerracuna, yarjaicuna, terremotocuna unguicunapash “shuj shuj llactacunapimi tianga” nin (Mateo 24:3, 7, 14; Lucas 21:10, 11; Apocalipsis 6:1-8).

•   Gentecunaca charishca jahua ashtahuan charijyangapaj munaj gentecunami canga. Por ejemplo culquita juyajcuna, pagui ninatapash na yachajcuna, ima munashcata ruraj gentecunami tianga ninmi (2 Timoteo 3:1-5).

 Ashtaca gentecunaca 1914 huatamandapachami Bibliapi nishcashnaca pactarijun ninmi. Chaimi tucurimui punllacunapi causajushcataca crin. Caimanda ashtahuan yachangapaj munashpaca “¿Qué indica la cronología bíblica sobre el año 1914?” y “¿Cuál es la señal de ‘los últimos días’ o de ‘los tiempos finales’?” nishca temacunatami ricuita ushapangui.

 Griego shimimanda “apocalipsista” traducishpaca “imatapash tapashcata anchuchina” o “telahuan tapashcata anchuchinatami” ningapaj munan. Shinallata imapash pacashcata villanatami ningapaj munan. Bibliapica Jesús cai Alpaman tigramujpica, pai cai Alpapi tiashca llaquicunata tucuchingapaj poderta charishcata, shinallata Diosta adorajcunatapash bendiciangapaj poderta charishcatami villan (2 Tesalonicenses 1:6, 7; 1 Pedro 1:7, 13).

 Shamuj punllacunapi ima pasanata villaimandami Bibliapa último libroca Apokálypsis o Revelación can (Apocalipsis 1:1). Apocalipsis o Revelación libropimi ali noticiacunata, shinallata shamuj punllapi ali causaigu tianatapash villan (Apocalipsis 1:3). Shinallata Taita Diosca tucui llaquicunata tucuchishpami cai Alpatapash shuj juyailla paraisotami ruranga ninmi. Taita Dios chaicunata pactachijpimi gentecunaca llaquicuna illaj, nanaicunapash illaj causanga. Huañuipashmi tucuringa (Apocalipsis 21:3, 4).

 ¿Bibliapa promesacunamanda ashtahuan yachangapaj munapanguimanllu? Testigo de Jehovacunaca Bibliamandaca gratismi yachachin. Paicunahuan yachajungapami mascaita ushapangui.