1. Israelitacuna na cazujpica ¿maijan mushun organizaciondata Jehová Diosca callarichirca? (Callari dibujota ricupangui.)

JEHOVÁ DIOSCA apostolcunapa punllacunapimi Jesusta catij congregacionda callarichirca. Cutin cunanbica paita aliguta adoranatami yachachishca. Imashinami ñaupa temapi ricuparcanchi, israelitacuna na cazujpimi Jehová Diosca shuj mushuj organizacionda callarichirca. Cai mushuj organizacionga Jesuspa yachachishcacunatami catijurca. Ashtahuangarin, romano soldadocuna Jerusalenda tucuchijpica Jehová Diosca paipa mushuj organizacionda tucuchichunga na saquircachu (Luc. 21:​20, 21). Chai punllacunaca cunan punllacunapi ima pasanatami ricuchijurca. Ñallami Diablopa nali mundoca tucuringa. Shinapash ‘cai tucuri punllacunapica’ Jehová Diospa organizacionga na chingaringachu (2 Tim. 3:1) ¿Imashinata chaitaca yachanchi?

2. a) ‘Ninan Manllanai Llaqui Punllacunamanda’ parlashpaca ¿imatata Jesusca nirca? b) ‘Ninan Manllanai Llaqui Punllacunaca’ ¿imashinata callaringa?

² Tucuri punllacunapi ima pasanata parlashpami Jesusca nirca: “Chai punllacunapica, ninan manllanayai llaquimi tianga. Cai pacha tiai callarishca punllamandapacha cunangaman, chashna jatun llaquica nara tiarcachu, jipamambash na tiangachu” nishpa  (Mat. 24:​3, 21). ‘Ninan Manllanai Llaqui Punllacunaca’ ‘Babilonia Shuti Jatun Pueblota’ o tucuilla panda religiongunata Jehová Dios tucuchijpimi callaringa. Jehová Diosca gobiernocunatami utilizanga tucuilla panda religiongunata tucuchichun (Apoc. 17:​3-5, 16). Chai jipaca ¿imata pasanga?

3. Panda religionguna tucurishca jipaca ¿ Jehovata sirvijcunaca ima llaquipita canga?

³ Panda religionguna tucurishca jipaca, paipa catijcunandimi Diabloca Jehovata sirvijcunata atacai callaringa. Diablomanda o ‘Magog llactata mandaj Gog shutimanda’ parlashpaca Bibliaca ninmi: ‘Can vichai shamushpaca ninan huairahuan tamiashnami shamungui. Canbash, canba tucui soldadocunapash, canhuan tandanajushca ashtaca runacunapash, fuyushnami chai llactataca quilpanguichi’ nishpa. Paicunapa ñavipica Testigocunaca pipash yangata llaquichinashnallami ricuringa. Shinapash pandarinajungami (Ezeq. 38:​1, 2, 9-12.)

4, 5. Paipa sirvijcunata contracuna tucuchingapaj munajpica ¿imatata Jehová Diosca ruranga?

⁴ Paipa sirvijcunata tucuchingapaj munajujta ricushpaca Jehová Diosca paitapacha tucuchingapaj munajujpishnami culiranga. Tucuilla contracunamanmi pailla Jatun Mandaj Dios cashcata ricuchinga (Zacarías 2:​8, liingui). Paipa sirvijucunata atacai callarijpica ñapashmi Jehová Diosca paipa sirvijcunata salvanga. Chaipaca Armagedón nishca jatun macanajuipimi Diablopa nali mundota tucuchinga (Apoc. 16:​14, 16).

⁵ Armagedonmanda parlashpaca Bibliaca ninmi: ‘ “Mandaj Diosca, tucui cai pachapi causajcunapa Juez cashpami, tucui llactacunapi causajcuna imatalla rurashcata ricushpa llaquichinga. Paita na manllajcunataca espadahuan huañuchijcunamanmi cunga” ninmi. Tucuita Mandaj Diosca nircapashmi: “Ricuichi, llactan, llactanmi ninanda llaquichishpa risha. Cai pacha tucuri manñacunamandami, ninan huairahuan tamia jataringa. Chai punllapica, Mandaj Dios ñuca huañuchishcacunaca, tucui cai pachapimi shuj lado manñamanda caishuj ladocaman shitashca sirinajunga. Chai huañushcacunamandaca, pipash na yarishpa huacangachu. Paicunataca pipash na tandachingachu, pipash na pambangachu. Huanushnami alpa jahuapi shitashca sirinajunga”’ nishpa (Jer. 25:​31-33). Armagedonbimi Diablopa nali mundoca tucuritapacha tucuringa. Shinapash Jehová Diospa cai Alpapi organizacionga na tucuringachu, salvaringami.

6, 7. a) Pipash na cuentai ushanalla ashtaca gentecunaca ¿maimandata tandanajunajun? b) Jehová Dios viñachijushcamandaca ¿imashinata miranajupashcanchi?

⁶ Jehová Diospa organizacionman alita ruraj gentecuna shamujpimi ashtahuan mirajun. Bibliaca ninmi: ‘Taita Diosca [alita] rurajcunatami ricuriajun. Paicunapa mañashcacunatapash aligutami uyajun’ nishpa (1 Ped. 3:12). Ashtahuangarin ninmi, alita ruraj gentecunami ‘Ninan Manllanai Llaqui Punllacunamanda’ salvaringa. Paicunatami ‘pipash na cuentai ushanalla ashtaca gentecuna’ ninga nishpa (Apoc. 7:​9, 14). ¿Nachu ñucanchicunapash chai ashtaca gentecunahuan igual salvaringapaj munanchiman?

⁷ Pipash na cuentai ushanalla ashtaca gentecunaca ¿maimandata tandanajunajun? Paicunaca tucui llactacunamandami tandanajun. Mateo 24:14​pica Jesusca nircami: ‘Taita Diospa [Reinomanda] cai ali villaitaca, cai pachapi tucui llactacunapi causajcuna yachachunmi villanajunga. Chai jipami, tucurimuica  chayamunga’ nishpa. Diospa organización ali villaicunata villachijujpimi cai último huatacunapica ashtaca ashtaca gentecuna Taita Diosmanda aliguta yachajushpa, Taita Dios cushca espíritu yarichishca shina adoranajun (Juan 4:​23, 24). Chaimandami septiembre de 2003manda 2012camanga 2.707.000 yali gentecuna Jehová Diosman mingarishpa bautizarishca. Cunan punllacunapicarin ñami 7 millón 900 mil yali testigo de Jehovacuna canchi. Chai jahuapash ashtaca millón gentecunami tandanajuicunaman o Jesús Huañushcata Yarina Tandanajuicunamanbash shamunajun. Chai tucui gentecunaca shuj plantagutashna Jehová Dios ‘viñachijpimi’ ñapash miranajun (1 Cor. 3:​5-7). Shinaca ¿nachu ashtaca gentecuna mirajujta ricushpaca ninanda cushijunchi?

8. ¿Imamandata Jehová Diospa organizacionga ashtahuan mirajushca?

⁸ Jehová Diosllata paipa sirvijcuna villachichun ayudajujpimi ashtaca gentecuna miranajushca (Isaías 43:​10-12, liingui). Bibliapica nircami: ‘Shuj uchillagumandaca huaranga huarangashnami tucunga. Ashallagumandaca ninan shinlli llactashnami tucunga. Mandaj Dios ñucallatami chashna tucuna punllacunataca ucha pactachisha’ nishpa (Is. 60:22). Callaripica cai Alpapi puchushca ungidocunaca ashallami carca. Shinapash Jehová Diospa bendicionhuanga ashtahuan ungidocunami mirashpa catirca (Gál. 6:16). Pipash na cuentai ushanalla ashtaca gentecunata tandachishpa catijpicarin ashtahuan ashtahuanmi Jehová Diospa organizacionga mirajushca.

9. Shamuj punllacunapi ashtaca bendiciongunata charingapaca ¿imatata rurana capanchi?

⁹ Bibliapica ninmi, ungidocuna cashpa o na ungidocuna cashpapash shamuj punllacunapica ashtaca bendiciongunatami charinga nishpa. Shinapash chai bendiciongunata charingapaca Jehová Diospa mandashcacunatami cazuna canchi (Is. 48:​17, 18). Israelitacunata yaripashunchi. Moisesman cushca Leypica nijurcami, cazarashca jahua na shujta japinachu can, na umachishpa jatunachu can, huahuacunataca aligutami viñachina can, shuj gentecunataca alimi tratana can nishpa (Éx. 20:14; Lev. 19:​18, 35-37; Deut. 6:​6-9). Chai leycunata cazushpaca israelitacunaca alimi causana carca. Cunan punllacunapipash Jehová Diospa leycunata, consejocunata cazushpaca ñucanchillatami ali causashun. Jehová Diospa mandashcacunaca na ñucanchita llaquichingapachu can (1 Juan 5:​3, liingui). Jehová Diosta cazushpaca cushillami causashun, shinallata shinlli fetami charishun (Tito 1:13).

10. ¿Imamandata Bibliata estudiangapaj, Familiahuan Adorana Tutata charingapaca tiempota llujchina capanchi?

¹⁰ Jehová Diospa organizacionga ashtahuan ashtahuanmi ñaupaman catijun. Shuj ejemplota ricupashun. Ñucanchi organizacionga, cada punllami Bibliapi yachachishcacunata ashtahuan ali intindijun. Bibliapi nishca shinaca, alita rurashpa causajpa ñanga, ashtahuan ashtahuan yurajlla punllayashpami alipacha punllayan (Prov. 4:18). Shinaca tucuicuna tapuripashunchi: “Mushuj entendimientocuna llujshijpica ¿chaicunata intindingapaj esforzarinichu? ¿Bibliataca cada punllachu liini? ¿Mushuj revistacuna, folletocuna, librocuna llujshijpica ansiachu liingapaj munani? ¿Familiahuan Adorana Tutataca cada semanachu charini? nishpa. Caicunata pactachinaca na shinllichu can. Aliguta organizarishpa tiempota llujchinallami minishtirin. Ninan Manllanai Llaqui Punllacunaca ñami chayamujun. Chaimandami Bibliata estudiashpa catina canchi. Imata yachajushcatapash pactachinami canchi. Jehovapa organizacionhuan  igual ñaupaman catinapash minishtirishcapachami can.

11. Tandanajuicunaman rishpaca ¿imashinata Jehovata sirvijcunaca beneficiarishca?

¹¹ Jehová Diospa organizacionga ñucanchicuna ali causachun munashpami apóstol Pablopa consejotaca cutin cutin yarichijushca. Apóstol Pabloca nircami: ‘Caishujhuan chaishujhuan ashtahuan juyarishpa, imata cashpapash alita ruranata yarichirishunchi. Tandanajunataca na saquinachu canchi. Shujcunaca tandanajunata saquinllami. Jesús tigramuna punlla ña chayamujujta yachashpacarin, ashtahuanmi yarichirina canchi’ nishpa (Heb. 10:​24, 25). Jehová Diosta adorangapaj israelitacuna tandanajushpaca Jehová yachachijpimi cushilla tigran carca. Nehemiaspa punllacunapipash Chujllacunapa Fiestata o Fiesta de las Cabañas nishcata rurashpaca ninandami cushijurca (Éx. 23:​15, 16; Neh. 8:​9-18). Cunan punllacunapipash tucui tandanajuicunaman rishpami Jehová Diosman ashtahuan quimirinchi, ashtahuan cushijushpa paita sirvinchi (Tito 2:2).

12. Ali villaicunata villanataca ¿imashinata ricuna capanchi?

¹² Jehová Diospa organizacionbi caimandami ali villaicunata villai ushanchi. Ali villaicunaca ima mapapash illaj, limpiomi can (Rom. 15:​16, NM). Ali villaicunata villashpami “jucha illaj” Taita Diosta ‘ayudanajunchi’ (1 Cor. 3:9; 1 Ped. 1:15). Ashtahuangarin ali villaicunata villashpami Jehová Diospa shutita santificanajunchi. Shinaca ¿nachu ‘cushilla Taita Diospa’ ali villaicunata villanaca shuj jatun bendición cashca? (1 Tim. 1:​11, NM)

13. Espiritualmente shinlli cangapaj, causashpa catingapaj munashpaca ¿imatata rurana capanchi?

¹³ Jehová Diosca paiman ashtahuan quimirishpa, paipa organizacionda apoyachunmi munan. Shina rurashpallami espiritualmente shinlli caita ushashun. Moisesca israelitacunataca nircami: ‘Causaitapash, huañuitapash, bendiciai tucunatapash, ninanda nalicachi tucunatapash, cangunapa ñaupajpimi churani. Canbash, canba miraicunapash causangapaca, causaita agllaichiyari. Cangunata Mandaj Taita Diosta juyashpa, pai rimashca shimicunata uyashpa, paita cazunguichiyari. Shinami, unai causaita charinguichi. Abrahanman, Isaacman, Jacobman carashami nishpa juramentushca llactapi causangapami, cazuna canguichi’ nishpa (Deut. 30:​19, 20). Imashinami ricunchi, causashpa catingapaj munashpaca Jehová Diostami juyana, cazuna canchi. Paimanmi ashtahuan ashtahuan quimirina canchi.

14. Jehovapa organizacionmanda parlashpaca ¿imatata shuj huauquica nirca?

¹⁴ Pryce Hughes shuti huauquica nara 1914 huata tucujpillatami Bibliata yachajui callarirca. Paipa tucui causaipimi Jehová Diosta cazurca, paipa organizaciondapash apoyajurca. Paica ninmi: “Gentecunapa pensamientocunapi confianapa randica Jehová Diospa organizacionman ashtahuan quimirina cashcatami yachajurcani. Jehovapa organizacionman quimirinami llaquicuna ricurijpipash Jehovata sirvishpa catichun ayudahuarca. Paipa organizacionbi instrucciongunata catishpallami paipa ñaupajpi ali ricurita ushanchi” nirca.

15. Mushuj entedimientocunata chasquingapaca ¿picunapa ejemplotata yarina capanchi?

¹⁵ Jehová Dios bendiciachun munashpaca paipa organizacionda apoyashpami Bibliapa mushuj entendimientocuna llujchijpica chasquina canchi. Ñaupa punllacunapi ima pasashcata ricupashun. Jesús huañushca jipaca ashtaca huaranga judiocunami Jesusta catirca. Shinapash Moisesman cushca Leyta pactachishpa catingapami munarca (Hech. 21:​ 17-20). Shina pandarinajujpimi apóstol Pabloca cashna intindichirca, animalcunata huañuchishpa Jehová Diosman carashpapash juchacunamandaca na salvarita ushanguichichu, Jesuspa yahuarmandallami juchacunamandaca salvarita ushanguichi nishpa (Heb. 10:​5-10). Shina ayudajpimi ashtaca judiocunaca pandarijushcata intindishpa chai mushuj entendimientota chasquirca. Shinaca ¿imatata paicunapa ejemplomandaca yachajunchi? Ñucanchicunaca aligutami Bibliataca yachajuna canchi. Mushuj entendimientocuna tiajpi o villachinacunapi cambiocuna tiajpica cazunami canchi.

16. a)¿Imamandata Paraisopi causanaca juyailla, ali canga? b) Paraisopi pactarina bendiciongunamandaca ¿maijandata tucui shunguhuan shuyajupangui?

¹⁶ Jehová Diosta tucuipi cazushpa, paipa organizacionda apoyashpaca ashtaca bendiciongunatami charishun. Ungidocunaca Jesushuan jahua cielopi mandashpami ashtaca bendiciongunata charinga (Rom. 8:​16, 17). Cutin cai Alpapi causana esperanzata charijcunaca shuj juyailla paraíso Alpapimi causanga. Juyailla Alpatami Taita Diosca caranga nishpa villanaca shuj jatun bendicionmi can (2 Ped. 3:13). Chaipica ali gentecunallami causanga. ‘Casilla ali causaihuanmi ninanda cushijushpa’ causanajunga (Sal. 37:11). ‘Huasicunatapash shayachishpami, chaipi causanajunga’. ‘Paicunapa maquihuan imatalla rurashcahuanmi cushijushpa causanajunga’ (Is. 65:​21, 22). Pipash na llaquichingachu, pipash na yarjachingachu (Sal. 72:​13-16). Tucuilla panda religionguna tucurishcamandaca ñana pitapash pandachinajungachu (Apoc. 18:​8, 21). Huañushcacunapash causarishpami, cai Alpapi unai unaicaman causaita ushanga (Is. 25:8; Hech. 24:15). Shinaca Jehová Diosman ashtahuan quimirishpa, paipa organizacionhuan igual ñaupaman catishpaca chai juyailla paraíso Alpapimi causashun.

17. Jehová Diosta adoranamanda, paipa organizacionmandaca ¿imashinata sintirina capanchi?

¹⁷ Diablopa nali mundoca ñallami tucuringa. Salvaringapaj munashpaca shinlli fetami charina canchi. Shinallata Jehová Diostapash aliguta adorashpami paipa organizaciondapash apoyashpa catina canchi. Rey Davidpa ejemplota catishpa ñucanchipash nipashunchi: ‘Shuj mañanagutallami Mandaj Diostaca mañarcani. Chaitami mascasha. Tucui ñuca causaipi, Mandaj Diospa huasipi cashpa, Mandaj Dios juyaillagu cajta ricungapaj, paipa huasipi yachajungapami mañarcani’ nishpa (Sal. 27:4). Shinaca cada uno Jehová Diosman quimirishpa, paipa organizacionhuan igual ñaupaman catipashunchi.