Yachashpa ali sintiringapaj munashpami tucuicuna nishcanchi: “Ñuca huahuacunaca ¿imashinashi jipa punllacunapica causanga? ¿Cai Alpaca tucuringacha? Ali causangapaca ¿imatata rurana cani?” nishpa. Jipa punllacunapi ima pasanata yachashpaca tranquilo, alimi sintirinchiman.

Shinaca jipa punllacunapi ima pasanataca ¿pita yachan? Taucacunaca jipa punllacunapi cashnami o chashnami pasanga ninajushpash ashtacatami pandarishca. Cutin Taita Diosca tucuitami cabalta villan. Chaimandami Bibliapica nin: “Jipa punllacuna ima tucunatapash, ñucami callarimandapacha villani. Nara imapash tiajpillatami, pundamandapacha villarcani” nishpa (Isaías 46:10). Taita Diospa nishcacunaca ¿imashinata pactarishca?

¿Imamandata Taita Diospa nishcacuna imashina pactarishcataca yachajuna capanchi? Pensaripashunchi: Ima hora tamianata estudiajcuna ña tauca huatacunata cabalta villajujpica ¿nachu paica cabaltami nin nishpa cayapa imata villajujtaca uyangapaj munanchiman? Taita Diospa nishcacunapash tucuillami pactarishca. Shinaca ¿nachu jipa punllacunapi Taita Dios imata ashtahuan ruranata yachangapaj munanchiman?

JATUN LLACTAMI TUCURINA CARCA.

Shuj jatun llactami tucuringa nishca jipalla chai llacta  tucurijpica ¿nachu manllarinchiman? Taita Diospash Nínive llactaca tucuringami nishpami paipa profetamanga villarca (Sofonías 2:​13-15). Historiadorcunaca ninmi, Nínive tucuringami nishcamandaca 15 huatacuna jipami babiloniocuna, medo nishca gentecunaca Nínive llactata tucuchirca nishpa. Taita Diosca nircami: ‘Nínive pueblotaca llaquinaita tucuchishpami, jichushca pambatashna saquinga’ nishpa. Nínive llacta jatun jatun cajpipash contracunaca tucuchishpami saquirca. Shinaca pensaripai, politicamanda yachaj gentecunaca ¿Nínive llacta tucurinataca yachi ushanmanllu carca?

‘RUNACUNAPA TULLUCUNATAPASH CANBA JAHUAPILLATAMI RUPACHINAJUNGA.’

¿Pita 300 huatacunata ñaupashpa nita ushanman, cai shuti runami o cai familiamanda runami gentecunapa tullucunataca shuj altarpi rupachinga? ¿Pita chai altar maijan llactapi canatapash villai ushaman? Villashca jipa tucuilla nishcacuna pactarijpica ¿nachu tucuicuna paita rijsinman? Taita Diospa profetaca nircami, rey Davidpa familiamanda, rey Josiasmi Betel llactapa altarpi gentecunapa tullucunataca rupachinga nishpa (1 Reyes 13:​1, 2). Chai shimicunaca 300 huatacuna jipami pactarirca. Taita Dios villashca shinaca, rey Davidpa familia rey Josiasmi ‘pambashca tullucunata llujchigrichun cachashpa, [Betel llactapa] altarcunapi rupachirca’ (2 Reyes 23:​14-16). Shinaca pensaripai, Taita Dios na ayudajpica ¿pita tucuilla ima pasanata villai ushaman carca?

BABILONIA JATUN LLACTAMI TUCURIRCA.

Pensaripashunchi, ashtaca huatacunata ñaupashpa villashcanman, shuj jatun llactata pi tucuchinata, imashina tucuchinatapash. ¿Nachu chai shimicuna pactarijpica manllarinchiman? Taita Diosca nircami: Ciro shuti reymi Babilonia llactata tucuchishpa israelitacunataca paicunapa templota cutin shayachichun cachanga nishpa. Ashtahuangarin nircami: Chai reyca  yacucunata chaquichishpami Babiloniata tucuchinga. Llactapa pungucunapash pascariami quedanga nishpa (Isaías 44:27–45:2). Historiadorcunaca ninmi, Taita Diospa nishcacuna tucuilla pactarijpimi Babilonia jatun llactaca tucurirca nishpa. Rey Ciroca Babilonia llactata muyujuj yacucunatapash chaquichishpami Babilonia llactapa pungucunapash pascaria quedajpi paipa soldadocunandi chai llactaman yaicurca. Jipamanga Taita Diosta na sirvijushpapash rey Ciroca israelitacunataca mandarcami, Jerusalenman tigrashpa Taita Diospa templota cutin shayachigrichi nishpa (Esdras 1:​1-3). Chashna pasanataca ¿nachu Taita Dioslla villaita ushana carca?

Imashinami cai quimsa ejemplocunapi ricupanchi, Taita Diospa nishcacunaca pactarinmi. Josueca israelitacunataca nircami: ‘Cangunata Mandaj Taita Diosca tucuitami pactachishca. Tucuita pactachishcamandaca tucui shunguhuan, tucui almahuanmi pagui nina canguichi. Tucuitami cangunaman pactachishca, imatallapash na saquishcachu’ nishpa (Josué 23:​1, 2, 14). Israelitacunapash Taita Diospa nishcacuna pactarijtaca alimi yacharca. Taita Diospa nishcacunaca siempremi pactarin. Jipa punllacunapipash Taita Diospa nishcacuna pactarishpaca ñucanchi causaica para siempremi cambianga.

Gentecunaca cientificocuna nishcata uyashpa, gentecuna imashina causajushcata ricushpa, imapash poderta charini nij gentecunapi crishpami cashna o chashnami pasanga nin. Shinapash chaita nishca jipaca na imatapash rurai ushanllu (Proverbios 27:1).

Cutin Taita Diosca gentecuna imashina cashcata, imata pensajushcataca tucuitami ali yachan. Chaimandami gentecunahuan o llactacunahuan ima pasanataca ña yachan. Ashtahuangarin paipa munaita pactachingapaca poderta charinmi. Taita Diosca ninmi: ‘Ñuca shimimanda llujshishca shimicunaca na chushaj tigramungachu. Ñuca munashcatami ruranga’ nishpa (Isaías 55:11). Taita Diosca jipa punllacunapi imata ruranata villashpami paipa tucui nishcacunata pactachin.

Jipa punllacunapica ¿imashinashi causashun? Ñucanchi familiaca ¿imashi tucunga? Pensaripashunchi. Shuj jatun acapana chayamujujta yachashpaca ¿nachu chai acapana ama japichunga uchalla imatapash ruranchiman? Taita Diospash jipa punllacuna ima pasanataca villajunmi. Shinaca ¿nachu chai punllacunapapash segurarina capanchi? (“ Jipa punllacunapica ¿imatata Taita Diosca ruranga?” nishca recuadrotapash ricupangui.)

Taita Diosca ninmi: ‘Jipa punllacuna ima tucunataca ñucami callarimandapacha villani. Ñuca munashcataca tucuitami rurasha’ nishpa (Isaías 46:10). Imashinami ricunchi, jipa punllacunapi gentecuna imashina causanataca Taita Diosllami yachan. Jipa punllacunapica tucuicunami cushilla, ali causashun. Chai ali causaimanda ashtahuan yachangapaj munashpaca testigo de Jehovacunata tapunallami capangui. Paicunaca na imapash poderta charinllu. Paicunaca Bibliata yachajuimandami jipa punllacunapi Taita Dios imata ruranata villan.