1, 2. ¿Imamandata Salmo 45​ta yachajuna capanchi?

SALMO 45​pica shuj rey caballopi tiarishpa na llullaj shimita, alita ruranata difindingapaj llujshishcatami parlan. Shinallata, contracunata mishashpa, shuj juyailla noviahuan cazarajpi chai reyta unai unaicaman yarishpa alabajtami parlan.

² Salmo 45​pi ali cosascunamanda parlajpipash ¿imamandata chai Salmomanda yachajuna canchi? Chai Salmopi parlashcacunaca cunan punllacunapipash shamuj punllacunapipash ñucanchitaca afectanmi. Shinaca Salmo 45​ta aliguta yachajupashunchi.

3, 4. a) ¿Ima ‘juyailla shimicunata’ ñucanchipaca importante can? b) Chai shimicunata uyashpaca ¿imashinata ñucanchicunaca sintirinchi? c) ¿Imatata ‘jatun mandajmanda’ o reymandaca parlanajunchi? d) ¿Ima horata ñucanchicunaca ‘ñapash escribij runapa plumashna’ capanchi?

³ (Salmo 45:​1, liingui.) Reymanda parlashpaca ‘juyailla shimicunami’ salmistapa shungumandaca llujshirca. Hebreo shimipi Salmo 45​manda parlashpaca ninmi, salmistapa shunguca imapash ali noticiacunamandami timbujuj cuenda carca nishpa. Chai ali noticiacunamandami salmistaca ninanda cushijun, jallupash  ‘ñapash escribij runapa plumashna’ tucun.

⁴ Jehová Diosca Jesustami paipa Reinopi Rey cachun churashca. Chai ali villaicunami ‘juyailla shimicuna’ cuenda ñucanchi shungutaca cushichin. Huata 1914manda Diospa Reinopi Jesús ña mandai callarishcata yachanami ñucanchipaca ashtahuan ‘juyailla shimicuna’ can. Cai ali villaicunatami ‘tucui llactacunapi causajcunaman’ villachinajunchi (Mat. 24:14). Shinaca ¿cushijushpachu Diospa Reinomandaca villachinajunchi? Ñucanchicunaca salmista cuendami ‘jatun mandajmanda’ o reymanda parlanajunchi. Jesusca ñami Diospa Reinopi mandajun nishpami gobiernocunamanbash shuj gentecunamanbash Taita Diospa Reinota cazuichi nishpa villachinchi (Sal. 2:​1, 2, 4-12). Ashtahuangarin Bibliahuan villachishpami ‘ñapash escribij runapa plumashna’ canchi.

5. a) ¿Imamandata ninchi, Jesusca tucuicunata ‘yali juyaillami’ carca nishpa? b) ¿Imamandata ninchi, Jesusca ‘uyanai’ shimicunahuanmi parlan carian nishpa? c) ¿Imashinata Jesuspa ejemplota cati ushapanchi?

⁵ (Salmo 45:​2, liingui.) Bibliapica Jesús imashina ñavi cashcataca na villanllu. Shinapash na juchayu cashcamandaca tucui gentecunamanda ‘yali juyaillami’ cashcanga. Ashtahuanbachaca Jehová Diosta tucuipi cazuimandami Jesusca juyailla ricurijurca. Jesusca gentecunapa shunguman chayajta parlashpami ‘uyanai’ shimicunahuan parlan carian (Luc. 4:22; Juan 7:46). Shinaca ¿ñucanchicunapash Jesuspa ejemplota catishpa villachingapaj esforzarinajupanchichu? (Col. 4:⁠6.)

6. Jehová Diosca ¿imashinata Jesustaca ‘tucui causaipa’ o para siempre bendiciarca?

⁶ Jesús tucuipi cazujpimi cai Alpapi villachijujpipash huañushca jipapash Jehová Diosca Jesusta bendiciarca. Chaimandami apóstol Pabloca escribirca: Jesusca ‘ashtahuan yangallagu tucushpami causajurca. Diosta cazuj cashpami pinganaita huañuchi tucurcalla. Shina cajpimi Taita Diosca, tucuita yali ashtahuan alicachishpa paitaca jatumbi churarca. Shinallata tucuicunapaj shuticunata yali ashtahuan ali shutigutami cararca. Chaimandami, Jesuspa shutita uyashpaca jahua pachapi tiajcunapash, cai pachapi tiajcunapash, alpa ucupi tiajcunapash, tucui ima tiashcapash cunguringa. Taita Diosca punchapambagumari cangui ni tucuchunmi, tucuicunapa shimihuanbacha Jesucristotaca, Mandajmari cangui ninajunga’ nishpa (Filip. 2:​8-11). Jehová Diosca Jesusta causachishpa, na tucurij causaita cushpami ‘tucui causaipa’ o para siempre bendiciarca (Rom. 6:9).

7. Taita Diosca ¿imashinata Jesustaca paipa ‘cumbacunatapash’ yali agllarca?

⁷ (Salmo 45:​6, 7, liingui.) Jesusca alita ruranata o justiciataca ninandami juyan. Cutin, Taita Diospa shutita imapash mapayachichunga nimamanda na munanllu. Chaimandami Jehová Diosca Jesusta agllarca, paipa Reinopi Rey cachun. Jesustaca paipa ‘cumbacunata’ o Davidpa familiatapash yalimi ‘cushichina aceitehuan’ javinshna agllarca. Jesustaca Jehová Diosllatami Rey cachun, Sumo Sacerdote chachunbash agllarca (Sal. 2:2;  Heb. 5:​5, 6). Ashtahuangarin espíritu santota cushpami Jehová Diosca jahua cielopi Rey shina mandachun Jesustaca agllarca.

8. a) ¿Imamandata Jesusca alimi mandanga ninchi? b) ¿Imamandata Jesusca mandana derechota charin?

⁸ Jehová Diosca 1914​pimi Jesustaca paipa Reinopi mandachun churarca. Jesusca ‘[alita] rurana varahuami’ mandanga. Jehová Diosllata mandachun churajpimi Jesusca mandana derechota charin. Ashtahuangarin ‘tucui causaipami’ Jesusca mandanga. Shinaca, Jehová Dios agllashca Rey mandajujpimi Jehová Diostaca cushijushpa sirvingapaj munanchi.

9, 10. a) Jesusca ¿ima horata espadata cinturaspi huatarirca? b) ¿Imapata shina huatarirca? c) Shamuj punllacunapica ¿imapata espadataca utilizanga?

⁹ (Salmo 45:​3, liingui.) Jehová Diosca ¿imamandata Jesustaca nin, espadata cinturaspi huatari nishpa? Contracunahuan macanacungapaj, rishpa paicunata tucuchigri nishpami espadata cinturaspi huatari nin (Sal. 110:2). Pipash na mishai ushajpimi Jesustaca ‘ninan shinlli’ nin. Jesusca 1914 huatapimi Diablotapash demoniocunatapash cai Alpaman shitamungapaj espadata cinturaspi huatarirca (Apoc. 12:​7-9).

¹⁰ Shinapash Jesusca ‘ashtahuan mishanarami’ can (Apoc. 6:2). Taita Diospa munaita pactachishpami Jesusca Diablotapash demoniocunatapash tucuchinga. Pundapica Babilonia nishca jatun pueblota o tucuilla panda religiongunatami tucuchina can. Taita Diosca tucuilla panda religiongunata tucuchina munaita gobiernocunapa shungupi churashpami panda religiongunataca tucuchinga (Apoc. 17:​16, 17). Jipamanga tucuilla gobiernocunatami Rey Jesusca tucuchitapacha tucuchinga. Jesustaca ‘manllanayai ucu ucu utujuta mandaj ángel’ nishpapashmi rijsin. Jesusca Diablotapash demoniocunatapash ucu ucu utujuman shitashpami paipa macanajuitaca mishanga (Apoc. 9:​1, 11; 20:​1-3). Chaita ashtahuan intindingapaca Salmo 45ta yachajushpa catipashun.

11. ¿Imashinata Jesusca ‘na llullaj shimimanda’ macanajun?

¹¹ (Salmo 45:​4, liingui.) Rey Jesusca na llactacunata mishangapachu macanajungapaj rin. Jesusca ‘na llullaj shimipi, na jariyashca canapi, [alita] ruranapimi caballopi tiarishna’ rin. ‘Na llullaj shimimanda’ macanajun nishpaca, Jehová Dioslla tucuita mandana derechota ricuchingapaj llujshijushcatami ricuchin. Diabloca, Diosca nali mandajmi can nishpami Diospa contra tucurca. Chaimandami demoniocunapash gentecunapash shinallata pensashpa Diablopa lado tucushca. Diablopa shimicuna llulla cashcata ricuchingapami Rey Jesusca caballopi tiarishpa, Jehová Dioslla mandana derechota charishcata ricuchinga.

12. ¿Imamandata nin, Jesusca ‘na jariyashca canamandapashmi’ macanajun nishpa?

¹² Rey Jesusca ‘na jariyashca canamandapashmi’ macanajun. ¿Imamandata shina nin? Jesusca Taita Diospa shujlla Churi cashpapash na jariyashca o humilde caimandami Taita Diostaca tucuipi cazushca (Is. 50:​4, 5; Juan 5:19). Jesusta ali catijcunapash Jesuspa ejemplota catishpami humildecuna cana can, Taita Diostaca tucuipimi cazuna can. Chaita pactachij gentecunallami Paraíso Alpagupi causanga (Zac. 14:​16, 17).

13. ¿Imashinata Jesusca ‘[alita] ruranamandapash’ macanajungapaj rin?

¹³ Ashtahuanbash Rey Jesusca ‘[alita] ruranamandapashmi’  macanajun. Shinapash ¿imamandata shina nin? Taita Diospa justiciata difindishpa macanajujpimi shina nin (Rom. 3:21; Deut. 32:4). Rey Jesusmanda parlashpaca Isaiasca nircami: ‘Jipa punllacunapica [alita] ruraj jatun mandajmi mandanga’ nishpa (Is. 32:1). Jesús mandashpami ‘jahua pachatapash cai pachatapash mushujta ruranga’. Chaipimi tucuicuna alita ruranajunga (2 Ped. 3:13). Chaipi causajcunaca Jehová Diospa tucui mandashcata cazushpami causanga (Is. 11:​1-5).

14. Jesusca ¿ima ‘jatun manllarinacunatata ruranga’? (Callari dibujota ricupangui.)

¹⁴ Salmistaca ninmi, caballopi tiajuj Reyca shuj espadatami paipa cinturaspi charijun nishpa (Sal. 45:3). Shinapash ñallami Reyca paipa ali lado maquihuan espadataca shinllita japinga. Salmistaca Jesusmanda parlashpaca nircami, ‘jatun manllarinacunatami ruranga’ nishpa (Sal. 45:4). Diablopa nali mundota Armagedonbi tucuchishpaca, Jesusca ‘jatun manllarinacunata rurashpami’ contracunataca tucuchinga. Diablota tucuchina horaspi ima cosascunalla pasanataca na cabal yachanchichu. Shinapash Taita Diospa mandashcacunata na cazujcuna, Rey Jesusta na cazujcunaca jatun manllarinacunata ricushpami ninanda manllarinajunga (Salmo 2:​11, 12, liingui). Tucurimui punllacunamanda parlashpaca Jesusca nircami: ‘Cai pachapica manllanai llaquicuna ashtahuan tiajpimi gentecunaca ña huañugrijunshna tucunajunga. Ninan ushaihuan jahua pachapi tiajcunapash ninandami cuyunga. Chai jipallami Runa Aichayu tucushca ñucataca fuyupi shamujujta tucuicuna ricunga. Ninan ushaihuan punchapamba shamujujtami ricunga’ nishpa (Luc. 21:​26, 27).

15. Apóstol Juanga ¿imatata ricurca?

¹⁵ ‘Ninan ushaihuan punchapamba’ Rey shamunamanda parlashpaca, apóstol Juanga nircami: ‘Chai jipami jahua pacha pascarijta ricurcani. Chaipimi shuj yuraj caballota ñapash ricurcani. Chai caballopi tiajuj runaca imatapash Pactachij, Na Llullaj shutitami charirca. Tucuicuna imatalla rurashcata ricuchishpami, paica [alita] rurashpa macanajun. Paitaca jahua pachapi causanajuj soldadocunami, yuraj caballocunapi tiarishpa catinajurca. Paicunaca ali, juyailla linota rurashca, na mapayashca yuraj churajunata churajushcami carca. Paipa shimimandaca, shuj filo filo espadami cai pachapi causajcunata chugrichingapaj llujshijurca. Paica jirru varahuanmi mandajunga. Shinallata uvasta cutana pushtupi cutashca vinota ufiachinshnami, paica ninanda llaquichijunga. Chaitaca Tucui Ushaita Charij Taita Dios ninanda fiñashcatami ricuchijun’ nishpa (Apoc. 19:​11, 14, 15).

16. Jesuspa macanajuna horas chayajpica ¿picunata soldadocunashna cumbanga?

¹⁶ ¿Picunata Jesusta cumbashpa macanajungapaj rij ‘soldadocunashna’ can? Angelcunami can. Paicunami Diablohuan demoniocunahuan Jesús macanajujpica Jesusta cumbashpa rirca (Apoc. 12:​7-9). Shinaca Armagedonbi Jesús macanajungapaj rijpica paipa angelcunami cumbanga. Shinapash ¿picunapashta soldadocuna cuenda can? Ungido huauquicunataca Jesusca nircami: ‘Tucurimui punllacaman ñuca munashcatalla rurashpa, nalita mishajmanmi, llactacunata mandai ushachun carasha. Ñuca mandajuchun Taita Dios ñucaman ushaita carashcashnallatami, chai mishajpash llactacunapi causajcunataca, alpa mangata jirru varahuan ñutunshna mandanga’ nishpa (Apoc. 2:​26, 27). Imashinami ricunchi, Armagedón punlla chayajpica ungidocunaca  ñami jahua cielopi canga. Shinaca ‘jatun manllarinacunata rurashpa’ llactacunata Jesús tucuchi horasca ungidocunapashmi Jesustaca cumbanga.

17. a) Yuraj caballoca ¿imatata ricuchin? b) Espadapash flechapash ¿imatata ricuchin?

¹⁷ (Salmo 45:​5, liingui.) Reyca shuj yuraj caballopimi tiajun llujshin. Apocalipsis 6:2​ca ninmi: ‘Ñapashmi shuj yuraj caballota ricurcani. Chai caballopi tiajujca shuj flechatami charijurca. Paimanmi shuj coronatapash curca. Paica ña mishashcami carca. Ashtahuan mishangapami llujshijurca’ nishpa. Chai yuraj caballoca Diospa ñaupajpi limpio, ali macanajui cashcatami ricuchin (Apoc. 19:11). Ashtahuanbash Reyca shuj espadatapash flechatapashmi charijun. Espadapash flechapash paipa contracunata Jesús imashina tucuchinatami ricuchin.

18. Armagedonbica ¿imashinata flechacunapa puntacunaca filo filo canga?

¹⁸ Salmistaca nircami, Reypa ‘flechacunaca filo filomi’ canga, contracunapa shungu ucucaman yaicushpami tucuchinga nishpa. Chai llaquica muyundi Alpapimi tianga. Profeta Jeremiasca nircami: ‘Chai punllapica Mandaj Dios ñuca huañuchishcacunaca, tucui cai pachapimi shuj lado manñamanda caishuj ladocaman shitashca sirinajunga’ nishpa (Jer. 25:33). Apóstol Juanbash nircami: ‘Chai jipami shuj ángel indipi shayajujta ricurcani. Chai angelca jahuata rij alasyu animalcunatami, cashna nishpa ninanda caparijurca: “Shamuichi, Taita Dios ninanda carajujta micungapaj tandanajumuichi. Jatun mandajcuna, soldadocunata mandajcuna, ninan ushaita charijcuna, caballocuna, chai caballocunapi tiarishcacuna, gañanguna, na gañanguna, uchillacuna, jatungunapash huañuchi tucushcami aichacunata micungapaj shamuichi” ’ nishpa (Apoc. 19:​17, 18).

19. ¿Imashinata Rey Jesusca ‘tucui ali llujshichun’ mishashpa catinga?

¹⁹ Diablopa nali mundota tucuchishca jipaca, Rey Jesusca ‘tucui ali llujshichunmi’ mishashpa catinga (Sal. 45:4). Ashtahuangarin Rey Jesusca Diablotapash demoniocunatapash huaranga huatacunatami ucu ucu utujuman shitanga. Shinami Jesusca huaranga huatacunata mandanga (Apoc. 20:​2, 3). Ucu ucu utujupi cashpaca Diablopash demoniocunapash pitapash na pandachi ushangachu. Shinami tucuilla gentecuna Reyta cazunga. Shinapash cai Alpa nara shuj juyailla Paraíso cajpillatami Jesusta catijcunaca, Reyhuanbash ungidocunahuabash cushijunajunga. ¿Imamandashi cushijunajunga? Chaitaca cati temapimi yachajupashun.