1. Ashtaca jovengunaca ¿ima ali experienciacunatata charin?

CUNANBICA ashtaca cambiocunami tian. Ashtaca llactacunamanda ashtaca ashtaca gentecunami Jehová Diosta sirvi callarinajun (Apoc. 7:​9, 10). Ashtaca jovengunaca gentecunaman Bibliata aliguta intindichishpa, salvarichun ayudashpami ashtaca ali experienciacunata charin (Apoc. 22:17). Huaquingunaca gentecunaman Bibliamanda yachachishpa aliguta causachunmi ayudan. Cutin shuj jovengunaca shuj shuj shimicunata yachajushpami chai shimicunapi villachinajun (Sal. 110:3; Is. 52:7). Jovenguna ¿nachu quiquingunapash cushijushpa astahuan sirvingapaj munapanguichiman?

2. Timoteopa ejemplopi ricushca shinaca ¿imashinata Jehová Diosca jovengunamanbash responsabilidadcunata cun? (Cai paginapi dibujota ricupangui.)

² Cunanllata ali ñanda agllashpami shamuj punllacunapipash Jehová Diosta ashtahuan sirvina oportunidadcunata chari ushanguichi. Timoteota yaripashun. Paica Listra llactamandami carca. Paica uchilamandallatami ali ñanda agllarca. Shinami casi 20 huatacunata charishpaca misionero tucurca (Hech. 16:​1-3). Apóstol Pabloca gentecuna ninanda llaquichijpimi huaquin quillacuna jipaca, Tesalónica llactapi chairalla tiai callarishca congregaciondaca saquina tucurca. Chaimandami apóstol Pabloca chai congregacionbi  huauquipanicunata animachun Timoteota cacharca (Hech. 17:​5-15; 1 Tes. 3:​1, 2, 6). Tesalonicapi congregacionda animagripai nijpica ¿imashinashi Timoteoca sintirishcanga?

3. a) ¿Maijan decisionda canba causaipica ashtahuan importante can? b) ¿Ima horata chai decisiondaca agllana cangui?

³ Joven cashpaca ashtaca decisiongunatami agllana can. Shinapash Jehovata sirvina decisionmi ashtahuan importante can. Shinaca ¿ima horata chai decisiondaca agllana can? Jehová Diosca ninmi: “Canda Ruraj Diostaca, chairalla viñai cashpallata yaringui” nishpa (Ecl. 12:1). ¿Imamanda yaringui nin? Jehovata tucui shunguhuan sirvingui nishpami yaringui nin (Deut. 10:12). Jehová Diosta sirvina decisionmi ashtahuan importante can. Chai decisionmi maijan ñanda rinata ricuchinga (Sal. 71:5).

4. Jehovata aliguta sirvingapaca ¿ima decisiongunatata ali agllana cangui?

⁴ Shamuj punllacunapica ashtaca decisiongunatami rurana cangui. Pihuan cazaranata, imapi trabajanatami agllana cangui. Shinapash Jehovata tucui shunguhuan sirvinatami primero agllana cangui (Deut. 30:​19, 20). Pihuan cazaranata, imapi trabajanata aliguta agllashpaca Jehovata tucui shunguhuan sirvita ushanguimi (Luc. 14:​16-20​huan chimbapurapangui). Cutin Jehovata tucui shunguhuan sirvinatara pundapi churashpaca pihuan cazaranata, imapi trabajanataca alimi agllai ushangui. Chaimandami quiquinba causaipi ashtahuan importante decisiondara ali agllana cangui (Filip. 1:10 NM).

5, 6. ¿Imashinata ali decisiongunata agllanaca jipa punllacunapi ashtahuan sirvichun ayudan? Shuj experienciata parlapai.

⁵ Jehová Diosta sirvinata agllashca jipaca tapurinami cangui: “Jehová Diosca imata rurachunda munan?” nishpa. Chai jipami Jehovata imashina sirvinata ricuna cangui. Japonmanda Yuichiro shuti huauquiguca nircami: “14 huatacunata charishpaca congregacionmanda ancianohuanmi villachingapaj llujshircani. Paica ñuca quilla quilla villachijujta ricushpami nirca: ‘Yuichiro, mejor huasiman rilla. Huasiman chayashpa Jehová Dios canman imacunatalla cushcapi pensaripai’” nishpa. Pai nishca shinami pensarircani, tauca punllacunatami Jehovata mañajurcani. Shinami asha asha cambiarcani, Jehovata sirvina munaitapash chari callarircani. Misionerocunapa experienciacunata liinatami ninanda gushtarcani. Chaicunami Jehovata ashtahuan sirvi callarichun ayudahuarca.

⁶ “Shinallata shuj llactapi sirvingapaj munashpami inglesta yachajurcani. Colegiota tucuchishca jipaca, precursor shina sirvingapami semanapi huaquin horascunatalla inglesta yachachishpa trabajai callarircani. 20 huatacunata charishpaca mongol shimitami yachajui callarircani. Shinallata chai shimita parlaj publicadorcunatami visitarcani. Ishcai huatacuna jipa, 2007pica Mongolia llactaman rishpami huaquin precursorcunahuan villachingapaj llujshircani. Ashtaca gentecunami Bibliata yachajungapaj munanajurca. Chaimandami chai llactapi causangapaj munashpa tucuita segurangapaj Japonman tigrarcani. Abril de 2008mandami precursor shina Mongolia llactapi sirvijuni. Chaipi causanaca shinllimi can. Shinapash villachijpi ashtaca gentecuna ali uyajpimi Jehovaman quimirichun paicunataca ayudani. Mongoliapi sirvijushcamandaca na arripintirinichu.”

7. a) ¿Ima decisiongunatata ñucanchicunallata agllana capanchi? b) Moisesca ¿ima ejemplotata curca?

⁷ Cada testigo de Jehovami Jehová Diosta tucui shunguhuan sirvinata o na sirvinataca ali ricuna can (Jos. 24:15). Ñucanchica na nita ushanchichu cazaranami cangui,  na cazaranachu cangui, cai trabajomi ali can nishpa. Quiquinllami chaicunataca ricuna cangui. ¿Ali trabajota charingapaj yashpachu ashtaca huatacunata estudianata pensarijungui? Huaquin jovengunaca pobrella pueblocunapi o charij llactacunapimi causan. Tucui jovengunallatami shuj shuj can, huaquingunaca shuj metacunata, shuj experienciacunatami charin. Jovenguna quiquingunaca Egiptopi hebreo huambragucuna cuendami canguichi. Huaquingunaca esclavocunami carca, cutin Moisesca reypa ushipa viñachi churi caimandaca charijmi carca (Éx. 1:​13, 14; Hech. 7:​21, 22). Paicunapash ashtaca cambiocuna tiaj punllacunapimi causarca (Éx. 19:​4-6). Cada unomi Jehovata tucui shunguhuan sirvinata o na sirvinataca agllana carca. Moisesca ali decisiondami agllarca (Hebreos 11:​24-27, liingui).

8. Jovenguna ali decisiongunata agllachunga ¿picunata ayudai ushan?

⁸ Joven cashpallata ali decisiongunata agllachunmi Jehová Diosca ayudan. Tucuipi ali decisiongunata agllachunga Bibliapi ali consejocunahuanmi ayudan (Sal. 32:8). Ashtahuanbash quiquingunapa taitamamacuna, congregacionbi ancianocunami Bibliapi consejocunata pactachichun ayudanga (Prov. 1:​8, 9). Shinaca shamuj punllacunapi ali causachun ima quimsa consejocuna ayudajta ricupashun.

9. a) Jehová Diosca ¿imashinata ñucanchita respetashcata ricuchishca? b) Diospa Reinotara pundapi mascajcunaca ¿imatata ricuchita ushan?

⁹ Taita Diospa Reinotara justiciatara pundapica mascangui (Mateo 6:​19-21, 24-26, 31⁠-34, liingui). Jehová Diosca ñucanchillata agllachun saquishpami ñucanchita respetashcata ricuchin. Paica mashna horascunata jovenguna villachina cashcataca na ninllu. Shinapash Jesusca nircami, Diospa Reinotarami pundapica mascana canguichi nishpa. Diospa Reinotara mascashpami Jehová Diostapash gentecunatapash juyashcata ricuchingui, shinallata shamuj punllacunapi unai unaicaman causana esperanzata cushcamanda agradicishcatapashmi ricuchingui. Pihuan cazaranata, imapi trabajanata decidijushpaca ¿ashtaca cosascunata charinata o Taita Diospa Reinotara pundapi churashcatachu ricuchigringui?

10. a) Jesusca ¿imamandata cushilla causarca? b) Cushilla causangapaca ¿imatata rurana cangui?

¹⁰ Shujcunata sirvishpami cushijuna cangui (Hechos 20:​20, 24, 35, liingui). Jesusca, shujcunata sirvishpa causana alipacha cashcatami ñucanchimanga yachachirca. Paipa munaita pundapi churanapaj randica, paipa Taitapa munaita pundapi churashpami ashtaca gentecunata ayudashpa ninanda cushijurca (Luc. 10:21; Juan 4:34). ¿Nachu quiquinbash shujcunata ayudashpaca ninanda cushijushcangui? Jatun decisiongunata agllana cashpaca, Jesuspa yachachishca consejocunatara pundapi churashpami ninanda cushijungui. Jehová Diospash ninandami cushijunga (Prov. 27:11).

11. a) Barucca ¿imamandata ñana cushilla sintirijurca? b) Jehová Diosca ¿ima consejotata curca?

¹¹ Jehová Diosta sirvishpami cushilla causanchi (Prov. 16:20). Baructa yaripai. Barucca Jeremiaspa secretariomi carca. Paica Jehovata sirvishpa cushilla causajushcataca cungajurcami. Llaquillami carca. Chaimandami Jehová Diosca nirca: ‘¿Canllata jatun tucunatachu mascangui? Chaitaca ama mascaichu. Ricui ñucaca, tucuicunamanmi llaquita apamuni’ nishpa. Jehovata cazuspaca Jerusalenda llaquichijuj punllacunamandaca Barucca salvarinami carca ( Jer. 45:​3, 5). Shinaca pensaripai ¿Barucca pai munashca jatun cosacunatara mascashpachu cushijunman carca,  o Jerusalenda llaquichij punllapi salvarishpachu cushijunman carca? (Sant. 1:12.)

12. Ramiroca ¿imamandata ashtahuan cushilla causan?

¹² Ramiro shuti huauquiguca shujcunata sirvishpami ninanda cushijun. Paica ninmi: “Ñucaca Bolivia llactamanda uchilla pueblomandami cani. Pobrella familiapimi viñarcani. Ñuca rucu huauquica universidadpi estudiachun pagashalla nircami. Chaita uyashpaca cushijurcanimi. Shinapash ñami bautizarishca carcani. Shuj precursor huauquipash shuj uchilla pueblopi villachingapaj jacu nishpami invitahuarca. Chaimandami chaiman rircani. Ajchata rutunata yachajushpami ajchata rutuna localta churarcani. Ashtaca gentecunamanmi Bibliata yachachi callarircani. Jipamanga runa shimita parlaj mushuj congregacionbimi sirvi callarircani. Ñami 10 huatacunata precursor shina sirvijushcani. Paicunapa shimipillata Bibliata yachajuchun gentecunata ayudashpami ninandapacha cushijuni” nin.

13. ¿Imamandata joven cashpallata Jehovata ashtahuan sirvinaca ali can?

¹³ Joven cashpallatami Jehová Diosta sirvishpa cushijuna cangui (Eclesiastés 12:​1, liingui). Na pensanachu cangui, Jehovata ashtahuan sirvingapaca ali trabajotarami tarina cani nishpa. Cunanmi sano, joven cangui, familiata cuidana responsabilidadtapash nara charinguichu. Congregacionbi responsabilidadcunata pactachingapapash fuerzata charinguimi. Shinaca ¿imashinata joven cashpallata Jehová Diostaca sirvingapaj munanguiman? ¿Precursor cangapaj, shuj shimita yachajungapaj o canba congregacionbillata ashtahuan sirvingapachu munanguiman? Imashina sirvina cashpapash trabajanami cangui. Shinaca pensaripai imapita trabajasha, imatata estudiasha nishpa.

14. Shuj trabajota agllagrijushpaca ¿imamandata cuidadota charina cangui?

¹⁴ Imashinami ña yachajushcanchi Bibliapi quimsa consejocunami imapi trabajanata aliguta mascachun ayudan. Colegiopi profesorcunaca canba llactapi ima trabajocuna tiajtaca yachanmi. Comerciocunapipash o gentecunapashmi ima trabajocuna ashtahuan tiajta nin. Chaicunata ricuna, uyanaca alimi can. Shinapash cuidadota charinami cangui. Paicunaca Jehovata na juyaj gentecunami can. Cai mundopa cosascunatara juyana munaitami canba shungupica tarpungapaj munanga (1 Juan 2:​15-17). Cai mundo cosascunapi pensarijujpica canba shunguca pandachingami (Proverbios 14:​15, liingui; Jer. 17:9).

15, 16. Imapi trabajanata ali agllachunga ¿picunata ayudaita ushan?

¹⁵ Imapi trabajanata agllashca jipaca Jehovatapash, canda ali rijsishpa canda juyaj gentecunapa consejotapashmi mascana cangui (Prov. 1:5). Paicunami can imata rurai ushashcata ricushpa, imamanda chai trabajota agllangapaj munajushcata ricushpa Bibliapa consejocunahuan ayudanga. Huaquinbica paicunapa consejota uyashca jipaca imapi trabajanata cutin agllanami tucungui. Jehovata sirvij canba taitamamacuna, congregacionbi ancianocunaca Jehovata pundapi churaimandami ali consejocunata cunga. Precursorcunahuan, superintendecunahuan parlashpaca tapuchipanguichi ¿imamandata tiempo completopi sirvi callarircanguichi? Precursor shina sirvingapaca ¿imatata rurarcanguichi? Jehovata sirvishcamandaca ¿ima bendiciongunatata charishcanguichi? nishpa (Prov. 15:22).

¹⁶ Canda ali rijsijcunaca ali pensarishpami ali consejocunata cunga. Shuj ejemplota ricupashun. Colegiopi debercunata ruranata quillanayachishpa colegiomanda llujshishpa precursor tucungapaj munajushcanguiman. Chaita cuenta japishpaca canda ali rijsijcunaca tal vez ningachari Jehovata tucui shunguhuan sirvingapaca colegiopi debercunatapash aliguta pactachinatami yachajuna cangui nishpa (Sal. 141:5; Prov. 6:​6-10).

17. ¿Ima decisiongunatata ali agllana canchi?

¹⁷ Jehovata sirvijcunaca tucuicunami jarcaicunata charinchi. Huaquinbica chai jarcaicunami Jehovamanda caruyachita ushan (1 Cor. 15:33; Col. 2:8). Huaquin trabajocunata nali agllajpica jatun llaquicunamanmi apaita ushan. ¿Nachu quiquinga maijan huauquitapash ricushcangui trabajota nali agllaimanda Jehová Diosmanda caruyajta? (1 Tim. 1:19.) ¿Imatata yachajunchi? Quiquinbash Jehová Diosmanda na caruyangapaj munashpaca paicuna imashina llaquipi urmashcata yarishpami imapi trabajanataca aliguta ricuna cangui (Prov. 22:3).

18, 19. Jehovata ashtahuan sirvina munaita na charishpaca ¿imatata rurana cangui?

¹⁸ Cunan punllacunapica ashtaca cambiocunami ricurinajun. Chaimandami Jehovata tucui shunguhuan sirvingapaj munashpaca joven cashpallata Jehovataca tucui shunguhuan sirvina cangui (Sal. 148:12 ,13).

¹⁹ Cutin, Jehovata ashtahuan sirvina munaita na charishpaca ¿imatata rurana cangui? Na shaijushpami canba feta shinlliyachishpa catina cangui. Apóstol Pabloca Jehová bendiciachun munashpa ashtacata sirvishca jipami nirca: ‘Canguna aliguta ruranata yarichunga Taita Diosmi’ ayudan. Chaita pactachishpa causachunbash, paillatami cangunaman ushaita caramujun” nishpa (Filip. 2:13). Ama cungapanguichu Jehová Diosca ninandami candaca juyan. Jehovapa consejocunapipash aliguta pensarishpami purina cangui. Jehovami joven cashpallata ali decisiongunata agllachun ayudanga.