1. Jesús paipa causaita cushcamandaca ¿ima bendiciongunatata chari ushapanchi?

JESÚS paipa causaita cushcamandami ashtaca bendiciongunata charinchi. ¿Ima bendiciongunatata charinchi? Ricupashun. Jesús paipa causaita cushcamandami, Adanba huahuacuna cashpapash alita ruranata alicachijcunaca, shamuj punllacunapica Jehová Diospa familia cuenda tucuita ushashun (“¿Imatata nisha nin?” nishca recuadrota ricupangui). Shinallata Jesús paipa causaita cushcamandami cushilla, para siempre causana oportunidadta charinchi. Chai bendiciongunata cushca jahuapash, paipa causaita cushpami Jesusca jahua pachapipash, cai Alpapipash ayudan. ¿Imashinata ayudan? (Hebreos 1:9).

2. a) Padrenuestro oracionbica ¿imacunamanda mañachunda Jesusca yachachirca? (Callari dibujota ricupangui). b) ¿Ima tapuicunatata cai temapica yachajupashun?

² Huañungapaj ishcai huatacuna faltajujpica, Jesusca cashna mañanguichi nishpami paipa catijcunataca yachachirca: ‘Jahua pachapi tiajuj ñucanchi Taitalla, canba jucha illaj shutiguca alicachi tucushca [ o “santificado”] cachun. Can mandana [o “canba Reinoca”] ucha chayamuchunmi munanchi. Imashinami jahua pachapica can munashcashna ruranajun, chashnallata cai pachapipash, can munashcashna ruranajushpami ali canman’ nishpa (Mateo 6:9, 10). Shinaca ¿imashinata Jesusca paipa causaita cushpa  Taita Diospa shuti santificado cachun ayudan? ¿Imashinata Taita Diospa Reino mandachun ayudan? ¿Imashinata Taita Diospa munai pactarichun ayudan? Chai quimsa tapuicunataca cai temapimi yachajushun.

3. a) Taita Diospa shutica ¿imatata ricuchin? b) ¿Imashinata Diabloca Taita Diospa shutita mapayachirca?

³ Padrenuestro oracionbica Taita Diospa shuti santificado cachunmi Jesusca pundapica mañarca. ¿Imamandata shina mañarca? Taita Diospa jucha illaj shutita respetachun nishpami shina mañarca. Taita Diospa shutica Jehová Dios imashina cashcatami ricuchijun. Jehová Diosca Tucui Ushaitami charin. Paillami alita ruraj Taita Dios can. Jesuspash Jehová Diostaca “jucha illaj Taitalla” nishpami parlarca (Juan 17:11). Jehová Diosca jucha illajmi can. Paipa tucui rurashcacunami jucha illaj can. Pai churashca leycunapash tucuimi ali can. Shinapash jardín de Edenbica Diabloca nircami, Taita Diosca gentecunaman imapash leycunata cuna derechotaca na charinllu nishpa. Ashtahuangarin, Jehová Diosmanda llullacunata nishpami Jehová Diospa shutitapash mapayachirca (Génesis 3:1-5).

4. ¿Imashinata Jesusca Jehová Diospa shutita santificarca?

⁴ Jehová Diospa shutita Diablo na respetajpipash, Jesusca tucui shunguhuanmi Jehová Diospa shutitaca alicachirca. Chaimandami paipa shutita santificangapaj esforzarirca (Juan 17:25, 26). Shinaca ¿imashinata Jehová Diospa shutita santificarca? Jesusca paipa rurashcacunahuan, paipa yachachishcacunahuanmi Jehová Diospa shutita santificarca. Shinami Jehová Diospa mandashca leycunaca ali cashcata, chai leycuna ñucanchipallata ali cashcata cuenta japichun shujcunataca ayudarca (Salmo 40:8-10, liingui). Llaquinaita huañungacaman Diablo llaquichijpipash Jesusca siempremi Jehová Diosta cazurca. Shinami paica ricuchirca, jucha illajcunaca Jehová Diosta tucuipi cazui ushashcata.

5. ¿Imashinata ñucanchicunapash Jehová Diospa shutita santificai ushapanchi?

⁵ Ñucanchicunapash ¿imashinata Jehová Diospa shutita alicachishcata ricuchinchi? Ñucanchi rurashcacunahuan. Jehová Diosca ñucanchicunapash jucha illajcunashna cachunmi munan (1 Pedro 1:15, 16, liingui). Chaimandami Jehová Diostalla adoranchi, tucui shunguhuan paita cazunchi. Shujcuna catiriashpa llaquichijpipash Jehová Dios yachachishca shina causangapami esforzarinchi. Jehová Diosta cazushpaca Jehovatami jatunyachinchi (Mateo 5:14-16). Shinallata Jehová Diospa leycuna ali cashcata, Diablo llullajushcatami ricuchinchi. Shinapash Adán y Evapa huahuacuna caimandaca tucuicunallatami huaquinbica pandarinchi. Pandarishpapash Jehová Diospa shutita ama mapayachingapami, tucui shunguhuan arripintirishpa nali ruraita saquingapaj esforzarinchi (Salmo 79:9).

6. ¿Imamandata juchayucuna nacirishca cashpapash Jehovapa ñaupajpica alita rurajcunashna ricurita ushapanchi?

⁶ Ungidocuna cajpi o ‘shuj llamagucuna’ nishcacuna cajpipash, Jesús paipa causaita cushcapi feta churashcamandami Jehová Diosca ñucanchi juchacunata perdonan. Shinallata, shuj mañaita rurashpa paiman mingarijcunatami Jehová Diosca chasquin. Ungidocunataca alita rurajcunatashna ricushpami Jehová Diosca paipa huahuacuna cachun chasquin. Cutin shuj llamagucuna nishcacunataca alita rurajcunatashna ricushpami paipa amigocuna cachun chasquin (Juan 10:16; Romanos 5:1, 2; Santiago 2:21-25). Jesús paipa causaita cushcamandami cunanbipash Jehová Diospa ñaupajpi ali ricuri ushanchi, paipa shutitapash santificai ushanchi.

7. Jesús paipa causaita cushcamandaca ¿ima bendiciongunatata Diospa Reino mandajpica charishun?

⁷ Padrenuestro oracionbica, ‘canba Reino shamuchun’ nishpapashmi Jesusca Taita Diostaca mañarca. Taita Diospa Reinopica Jesusmi 144 mil agllashca gentecunahuan mandanga. Shinapash, Jesús paipa causaita cushcamandami, 144 mil gentecunaca causarishpa jahua pachapi causaita ushanga (Apocalipsis 5:9, 10; 14:1). Paicunaca sacerdotecuna, reycunami canga. Huaranga huatacunatami Jesushuan igual mandanga.  Jehová Diosca paipa Reinopi paicunata mandachun churashpami tucuilla Alpata shuj juyailla Paraisota ruranga. Gentecunatapash jucha illajcuna cachunmi ayudanga. Chai punllacunapimi jahua pachapi, cai Alpapi Jehová Diosta sirvijcunaca shujlla familia cuenda canga (Apocalipsis 5:13; 20:6). Jesusca Diablotapash mishashpami, Diablopa culpamanda tiashca tucuilla llaquicunatapash tucuchinga (Génesis 3:15).

8. a) ¿Imashinata Jesusca paipa catijcunamanga Taita Diospa Reino minishtirishca cashcata intindichirca? b) ¿Imashinata Diospa Reinota apoyanajushcata ricuchipanchi?

⁸ Jesusmi paipa catijcunamanga, Taita Diospa Reino mandanaca minishtirishcapachami can nishpa yachachirca. Shinapash ¿imashinata chaita intindichun ayudarca? Jesusca bautizarishcandimi Taita Diospa Reinomanda ‘ali villaicunata’ tucui ladocunapi villachirca (Lucas 4:43). Ashtahuangarin paipa catijcunataca nircami: “Cai pacha tucuri manñacaman ñucamanda villagringuichi” nishpa (Hechos 1:6-8). Cunan punllacunapipash, villachishpami gentecunamanga Jesús paipa causaita cushcata yachana oportunidadtapash, Diospa Reino mandajuj punllacunapi causana oportunidadtapash charichun ayudanchi. Ñucanchicunaca ungidocunata ayudashpa muyundi Alpapi ali villaicunata villachishpami, Taita Diospa Reinota tucui shunguhuan apoyanajushcata ricuchinchi (Mateo 24:14; 25:40).

9. ¿Imamandata Taita Diospa callari munai pactarinataca tucui shunguhuan cripanchi?

⁹ Padrenuestro nishca oracionbi mañajushpaca, Taita Diospa munai pactarichun nishpapashmi Jesusca mañarca. ¿Imamandata shina nishpa mañarca? Jehová Diospa nishcacunaca siempremi pactarin (Isaías 55:11). Diabloca Jehová Diospa contra tucushpa Jehová Diospa munai ama pactarichun jarcangapaj munashpapash na ushashcachu. Shinapash ¿imatata Jehová Diosca callaripica munarca? Callaripica Jehová Diosca munarcami Adán y Eva jucha illaj huahuacunata charishpa cai Alpapi mirachun (Génesis 1:28). Huahuacunata nara charishpallata Adán huañujpica Jehová Diospa chai munaica na pactarinmanllu carca. Chaimandami Jehová Diosca Adán y Eva huahuacunata charichun saquirca. Ashtahuangarin, Jesús paipa causaita cushcamandami, Jesuspi feta churajcunaca jucha illaj tucushpa para siempre causaita ushanga. Jehová Diosca ashtacatami gentecunataca juyan. Ashtahuangarin, callaripi munashca shina cushilla, ali causachunmi munan.

10. Jesús paipa causaita cushcamandaca ¿ima bendiciondata huañushcacunapash chari ushanga?

¹⁰ Ashtaca millón gentecunaca Jehovata nara rijsi ushashpallatami huañushca. Chai gentecunahuanga ¿imata pasanga? Jehová Diosca gentecuna causachun munashpami huañushca gentecunatapash causachishami nishca. Huañushcacunaca Jesús paipa causaita cushcamandami causari ushanga. Causarishpami gentecunaca Jehová Diosmanda yachajushpa cai Alpapi para siempre causaita ushanga (Hechos 24:15). Jehová Diosca causaita cuj Dios cashcamandami huañushcacunata causachishpa paicunapa Taita tucunga (Hechos 17:24, 25). Chaimandami Jesusca padrenuestro nishca oracionbica, “Jahua pachapi tiajuj ñucanchi Taitalla” nishpa mañarca (Mateo 6:9). Jehová Diosca Jesusmanmi huañushcacunata causachichun mingashca. Chaimandami Jesusca nirca: “Ñucami causachijpash, causaita causagrinata carajpash cani” nishpa (Juan 6:40, 44; 11:25).

11. ‘Na cuentai ushanalla ashtaca gentecuna’ ¿imata rurachunda Jehová Diosca munan?

¹¹ Jesusca nircapashmi: “Taita Dios munashcata tucui pactachijcunallami, ñuca huauqui, ñuca pani, ñuca mama” can nishpa (Marcos 3:35). Jehová Diosca tucui llactacunamanda, tucui shimita parlaj gentecuna paita adorachunmi munan. Bibliapi nishca shinaca, chai gentecunaca ‘na cuentai ushanalla ashtaca gentecunami’ can. Paicunaca Jesús paipa causaita cushcapi feta churashpami Jehová Diosta cazungapaj munan. Ashtahuangarin Jehová Diosta alabashpami cashna nin: ‘Mandangapaj tiarinapi tiajuj ñucanchi Taita Diosmanda, maltun Llamamandami’ quishpirinchi nishpa (Apocalipsis 7:9, 10).

12. Padrenuestro oracionbica ¿imatallata Jehová Diospa munaimandaca yachajuita ushapashcanchi?

 ¹² Shinaca padrenuestro oracionbica ¿imatata Jehová Diosmanda, paipa munaimandaca yachajuita ushashcanchi? Pundapica, Jehová Diospa shuti santificado cachun esforzarinata, Jehová Diospa shutita respetana cashcatami yachajushcanchi (Isaías 8:13). Jesusca paipa causaita cushpami Jehová Diospa shutita jatunyachin, ñucanchitapash salvan. Jesús shutica “Jehová Diosmi salvan” nisha ninmi. Shinallata, Jehová Dios paipa Reinota mandachun churashpa, Jesús paipa causaita cushcamanda gentecunata ashtacata bendicianatami yachajushcanchi. Ashtahuangarin, Jehová Diospa munai pactarichun imapash na jarcai ushashcatami yachajushcanchi (Salmo 135:6; Isaías 46:9, 10).

13. ¿Imamandata bautizarinchi?

¹³ Jehová Dios paipa Churipa causaita cushcata agradicishpami, shuj oracionda Jehovaman rurashpa paiman mingarinchi, bautizarinchipash. Shinami, Jesús paipa causaita cushcapi feta charishcata, ‘Taita Diospa munaita rurashpa causangapaj’ munashcata ricuchinchi (1 Pedro 4:2). Ashtahuangarin bautizarishpami Jehová Diostaca shuj ali concienciata charichun ayudahuai nishpa mañanajunchi (1 Pedro 3:21). Chaimi Jehová Diospash Jesús paipa causaita cushcamandaca ashtaca bendiciongunata cun. Chaimandami paipa tucui nishcacunata Jehová Dios pactachinataca tucui shunguhuan crinchi (Romanos 8:32).

14. ¿Imamandata Jehová Diosca shujcunatapash juyanami canguichi nishpa mandan?

¹⁴ Jehová Diosca imata rurashpapash juyaimandami ruran. Paita adorajcuna paipa ejemplota catichun, randimanda juyarichunmi munan (1 Juan 4:8-11). Gentecunata juyashpami ‘Jahua Pachapi’ Taita Diospa huahuacuna cangapaj munashcata ricuchinchi (Mateo 5:43-48). Bibliapica mandanmi, pundapica Jehová Diostami juyana canguichi. Chaipa catica shujcunatapashmi juyana canguichi nishpa (Mateo 22:37-40). Shinaca shujcunata juyashcata ricuchingapaj munashpaca Diospa Reinomanda ali villaicunatami villachina canchi. Jehová Dios mandashca shina shujcunata, ashtahuanbachaca ñucanchi huauquipanicunata juyashpami Jehová Diosta ashtahuan juyanchi (1 Juan 4:20).

15. a) ¿Ima bendiciongunatata Jehová Diosca cunan punllacunapi cujun? b) ¿Ima bendiciongunatata shamuj punllacunapica chasquishun?

¹⁵ Jehová Diosca nishcami, Jesús paipa causaita cushcata crijpimi cangunapa juchacunata  ‘cungasha’ nishpa (Hechos 3:19-21, liingui). Imashinami yachajurcanchi, Jesús paipa causaita cushcamandami, Jehová Diosca ungidocunataca paipa huahuacunatashna chasquishpa, jahua pachapi causachun saquin (Romanos 8:15-17). Cutin ‘shuj llamagucuna’ nishcacunataca cai Alpapi Jehová Diospa familia cuenda cachunmi munan. Paicunaca jucha illaj tucushca jipami, Jehovata tucuipi cazushcata cutin ricuchinga. Tucuipi cazujpimi Jehová Diosca paipa huahuacunatashna chasquinga (Romanos 8:20, 21; Apocalipsis 20:7-9). Jehová Diosca siempremi paipa tucuilla huahuacunata juyanga. Ashtahuangarin, Jesús paipa causaita cushcamandami ashtaca bendiciongunata unai unaicaman chasquishpa catishun (Hebreos 9:12). Paipa Churipa causaita cushpami Jehová Diosca shuj valishca regalotashna ñucanchimanga cushca. Chaitaca pipash quichuitaca na ushangachu.

16. Jesús paipa causaita cushpaca ¿imashinata ñucanchitaca ayudashca?

¹⁶ Juchacunamanda arripintirishpaca Jehová Diospa familia cuenda cana bendiciondami charishun. Chai bendicionda ama charichunga Diablopash na jarcaita ushangachu. Jesusca ‘shuj viajella’ paipa causaita cushpami ñucanchitaca salvashca. Chaimandami cutin cutin paipa causaita cushpa salvajunaca ñana minishtirin (Hebreos 9:24-26). Adanga huañuitami ñucanchimanga curca. Cutin Jesusca, paipa causaita  cushpami ñucanchimanga shamuj punllacunapi para siempre causana oportunidadta cushca. Shinallata, paipa causaita cushpami Jesusca Diablopa nali mundomandapash salvashca, huañunata ama manllachunbash ayudashca (Hebreos 2:14, 15).

17. Jehová Dios ñucanchita ashtacata juyashcata yarishpaca ¿imashinata sintiripanchi?

¹⁷ Jehová Diospa nishcacuna pactarinataca tucui shunguhuanmi crita ushanchi. Imashinami leyes de la naturaleza nishcacunaca nunca na cambian, shinallatami Jehová Diosca nunca na cambianga (Malaquías 3:6). Jehová Diosca ñucanchicunaman causaita carashca jahuapash, ashtacatami ñucanchitaca juyan. Bibliapica ninmi: “Taita Dios ñucanchita juyajujtaca yachanchimi. Taita Diosca, ñucanchita ninandapacha juyajujtami crishcanchi. Taita Diosca juyajpachami” can nishpa (1 Juan 4:16). Jehová Diospa nishcacuna siempre pactarishcamandami cai Alpaca ñalla shuj juyailla paraíso Alpagu tucunga. Chaipica tucuillacunami Jehová Diospa ejemplota catinga, shujcunahuan randimanda juyarishpa causanga. Chaipimi cai Alpapi Jehovata sirvijcunapash, jahua pachapi Jehovata sirvijcunapash tucuillacuna Jehová Diosta alabashpa cashna ninga: ‘Ñucanchi Taita Dios, causaita causaicamanmi aligu cangui, punchapambagumi cangui, ali yachaitami charingui. Ninanda alicachi tucushcami cangui, ninan ushaitami charingui, ninan shinllimi cangui. Shina cachun’ (Apocalipsis 7:12).