KUYASQA ayllunchik wañukuptinqa llumpay llakisqam sientekunchik. Ichaqa anchatam kusikunchik imayna sientekusqanchikmanta Unanchawaqninchik Jehová Dios entiendesqanta yachaspanchik. Payqa anchatam munan wañusqakunata atiyninwan kawsarichiyta. Chay suyakuymantam Job 14:13-15 willawanchik.

Diosta serviq Job sutiyoq runapam churinkuna lliw wañururqa, tukuy kapuqninmi yanqachakururqa, kikinpas llumpaytam onqorurqa. Chayna llumpay ñakariypi tarikuspanmi kaynata tukuy sonqonmanta nirqa: ‘¡Ima allinraq kanman [Seolpi, NM] pakaykuwaynikiqa!’, nispa (13 versiculo). Kay versiculopi Seol nispaqa rikchanachiy sitiomantam rimachkan, chaymanmi lliw wañusqakuna rinku. Jobqa segurom karqa sepulturapi kaptin llakikuyninwan tukuy sasachakuyninkuna chinkananmanta. Chaypim Diospa pakasqan hina seguro kanman karqa. *

¿Wiñaypaqchu Jobqa Seolpi kayta piensarqa? Manam, payqa Diostam ruegakurqa: “¡Ima allinraq kanman plazota qoykuwaspayki yuyariwaptikiqa!”, nispa. Jobqa confiarqam Jehová Diospi chaymi nirqa Seolpiqa huk tiempolla kananmanta. Chaypi kaynintaqa tupachirqataqmi obligasqa llamkayman otaq obligasqa suyayman. ¿Haykapikamataq suyanan karqa? Jobmi nirqa: “Kacharisqa kanaykamam suyasaq ñoqallayqa”, nispa (14 versiculo). Jobqa Seolmanta librasqam kanqa kawsarichisqa kaspan.

¿Imanasqataq Jobqa confiarqa kawsariy kananpi? Payqa allintam yacharqa kuyasqa serviqninkuna wañukuptin unanchaqninchik Dios imayna sientekusqanta. Chaymi Diosta nirqa: “Qayakamuptikim ñoqañataq contestamusqayki. Hinaptinqa unanchawasqaykimantachá sientiypaqña-sientiwanki”, nispa (15 versiculo). Jobqa reqsikurqam Diospa unanchasqan kasqanta chayman hinam mamanpa wiksanpi rikurirqa. Jehová Diosmi Jobman vidata qorqa, atinqataqmi kawsarichiytapas (Job 10:8, 9; 31:15).

Kay textokunam qawachiwanchik: Jehová Diosqa paypa kamachisqanman hina kawsaqkunata, hinaspa paypi confiaqkunataqa kuyapayasqanta (Isaias 64:8). Jehová Diosqa anchatam ‘sienten’ otaq llakikun payman sonqo serviqninkuna wañuruptinqa. Hebreo idiomapi ‘sienten’ niq palabramantam chay idiomata entiendeq huk runa nin: “Kay palabrataqa rimanku llumpay llakikusqankuta qawachinankupaqmi”, nispa. Kaywanmi cuentata qokunchik serviqninkunataqa wañuptinkupas Jehová Diosqa mana qonqasqanmanta, payqa anchatam munachkan kawsarichiyta.

¡Mayna kusikunapaqmi kawsarimuymanta suyakuyta Jehová Dios Bibliapi qellqachisqanqa! * Diosqa munanmi kuyasqa ayllunchik kawsarimuptin kaqmanta tupaykunanchikta. Chaypi piensaymi yanapawachwan mayqen ayllunchikpas wañukuptin llumpayta mana llakikunanchikpaq. ¿Manachu munawaq chayna kuyapayakuq Dios astawan reqsiyta? Sichum Diospa kamachisqanman hina kawsaspaykiqa rikunkim wañuqkunata kawsarichinanpaq Diospa prometesqan cumplikusqanta.