Tukuy hinastinpim mana allin ruwaykunata qawarqani
IRLANDA nacionpi wakcha familiapim 1965 watapi nacerqani. Derry llaqtapim wiñarqani, chaypim kimsa chunka watapuni catolicokunawan protestante religionkuna wañuchinakurqaku. Yaqa llapan autoridadkunam protestante religionmanta karqaku, chaymi catolico religionniyoqkuna quejakurqaku protestantekunallaman llamkaytawan wasita qosqankumanta hinaspa imapipas catolicokunata mana yanapasqanmanta.
Mana allin ruwayllatañam tukuy hinastinpi rikurqani. Manam yuyaniñachu hayka kutita policiakuna tapupayawasqankumanta nitaq carromanta armawan horqowaspa maqawasqankumantapas. Qatikachasqa kaspaymi piensarqani: “Hinallachu kayna kasaq icha contrankupichu hatarisaq”, nispa.
Domingo Sangriento nisqa chaqwakunapim purirqani, kayqa ruwakun 1972 watapi 14 runakunata Gran Bretaña nacionniyoq soldadokuna wañuchisqanta yuyarinapaqmi, purirqanitaqmi 1981 watapi presokuna mana mikuspa huelga ruwasqankuta yuyarinapaq chaqwapipas. Mana churanapaq banderakunatam churarqani, hinaspam perqakunapi qellqarqani Gran Bretaña nacionpa contranpi kaqkunata. Yaqa llapanpim imamantapas chaqwa ruwanapaq kaq, chaykunaqa mana allinpim tukuq.
Universidadpi kaspaymi estudiaqmasiykunawan chaqwa ruwaypi karqaniku. Chaymantam Londres llaqtaman astakurqani, chaypim gobiernopa contranpi chaqwa ruwayman chaqrukurqani wakchakunapa favorninta maskaspa. Chaymantapas jornalkuna menosyasqanmantam dirigentekunawan chaqwakurqaniku, 1990 watapipas llumpay impuesto mañasqankumantam chaqwakurqaniku, chaymi Trafalgar plazapi tukuy imata ruwarqaniku.
Ichaqa tiempopa pasasqanman hinam chaqwa ruwayqa yanqapaq kasqanta musyarurqani, chayqa cheqninakuyllatam hatarichiq.
Allin ruwayta runakuna munaspankupas, manam atinkuchu mana allin ruwaykuna chinkachiytaqa
Yaqa chay watakunallapim, Jehova Diospa testigonkunamanta huk amistadniy willawarqa. Paykunam Bibliawan yachachiwarqa ñakarinanchikta Dios mana munasqanmanta hinaspa runakunapa imapas daño ruwasqanta allichananmantapas (Isaias 65:17; Apocalipsis 21:3, 4). Allin ruwayta runakuna munaspankupas, manam atinkuchu mana allin ruwaykuna chinkachiytaqa. Manam Diospa yanapakuyllantachu necesitanchik, aswanqa atiynintawanmi kay Pachapi mana allin espiritukunata atipanapaq (Jeremias 10:23; Efesios 6:12).
Kunanmi chayraq entiendeni mana allin ruwaykunapa contranpi chaqwa ruwasqayqa yanqapaq kasqanmanta. Ancha kusikunapaqmi karqa mana allin ruwaykuna chinkananmanta hinaspa lliw runakuna huk sonqolla kanankumanta yachasqayqa.
Bibliam yachachin Jehova Dios allin ruwayta kuyasqanmanta (Salmo 37:28). Chaymi mana iskayrayachwanchu mosoq pachapi allin ruwaylla kananmantaqa, chay ruwaytaqa manam mayqan kamachikuq runapas haypanmanchu (Daniel 2:44). Astawan yachayta munaspaqa maskay llaqtaykipi Jehova Diospa testigonkunata otaq Internetpi yaykuy www.jw.org/quy nisqaman.
Kaykunatapas leeykuy
ÑUQAYKUMANTA
¿Imanasqataq Bibliata estudiana?
Wara-waranqantin runakunam bibliata estudiasqankurayku yacharunku yachay munasqanku tapukuyninkunamanta, ¿qampas yachayta munawaqchu?
