¿Ricunguichu cushilla ajcunara? Paigunaga ñucanchi atun tandarinai tiajcunami an. Imasnami ñaupa timpumanda Diosta quirijcuna quinsa cutin tandarij anuca. Shinallara cushihua ñucanchi atun tandarinama rinchi (Deuteronomio 16:16). Huatai quinsa asambleaguna tian: Ishqui asambleaguna, caran shuj, shu punzhalla asamblea an. Cutin shuj quinsa punzhalla asambleaguna tian. Chi tandarinaunaga ¿imasnara yanapanun?

Huauquiunapura, paniunapura ali ricsiringahua. Ashca Israelitagunapura Jehová Diosta adorangahua cushi anuca, shinallara ñucanchi huauquiunapura, paniunapura atun tandarinai Jehová Diosta adorangahua cushimi anchi (Salmo 26:12; 111:1). Cai asambleagunai ñucanchi huauquiunahuas, paniunahuas cushi tiaunchi. Astaumbas caru llactamanda shamujcunara ricsinchi. Chaupi punzha asambleaibi parijulla micushaga, tucuigunapura ali gustu tiaunchi (Rashcauna [Hechos] 2:42). ‘Huauquiunara llaquichi’ nisha mandashcara cai tandarinaunai ali pactachinushcara ricunchi (1 Pedro 2:17).

Yaya Dios ñaupai ali runa tucungaj yanapanun. Diospa Shimimanda intindichishcara uyashaga, israelitaguna cushi tucunuca (Nehemías 8:8, 12). Asambleagunai yachachishcaunara uyashcamanda ñucanchis ashcara agradisinchi. Cai tandarinaunai Bibliamandalla yachachinun. Bibliamanda yachachiscaunara uyachinun, Diospa munaira ali pactachingahua, ali cuintashcaunahua, imasna rurana ashcara ricuchinaunahuas alira yachachinun. Shinallara ñucanchi huauquiuna ima problemagunara charishas Yaya Diosta sirvisha catiujta ricusha ñucanchi quirina shinzhiyan. Quinsa punzhalla asamblea nishca tandarinaunai, ñaupa timpu churarinaunahua churarisha Biblia yachachishcaunara yachachinun. Tucui asambleagunai Jehová Diosta sirvingaj munajcuna bautizarinun.

• Asambleagunai ¿imarasha cushilla sintirinchi?

• Asambleama rinaga ¿imasnara canda yanapanga?