Suj tata nipun huahuanta 7 huatasmanta: «Ashca huatas unaymantapacha, Tata Yaya ’ruara Ashpát y túcuy imastis chaypi tiasckancuta. ’Ruara Intít, Quillát y Estrellasta». Huahuita cuticun pensas y chayvacha tapun: «Tátay... ¿y pít ’ruara Tata Yayát?».

«Ni pipas —tatan nipun—. Tata Yaya túcuy tiempo tiara». Cunan, cá respuesta cusichin cá huahuitát. Pero, huiñas ’riptin, pay seguin tapunacus chayta. Mana unanchayta atin pillapas tiananta ima mana ’ruascka  cara. «¿Imaina chay cayta atin? —pensan—. Universutapas ’ruascka cara». Tapuna seguin mana contestacus: ¿pít ’ruara Tata Yayát?.

Biblia, ¿imát nin? Nin quiquin tata nisckanta chaíraj ’rimasckayshmanta. Moisés nipora Jehovát: «Manáraj montañas tiasckancuta, o ckam ’ruasckayquimanta Ashpát nanas ina huachachisckasmanta y túcuy plantas huiñanancunápaj, únay unaymantapacha y únay unáypaj ckam Tata Yaya canqui» (Salmo 90:1, 2). Profetát Isaías imallapas chay ina nera: «¿Mana yacharanquichu, mana uyareranquichu Tata Yaya únay unáypaj casckan Jehová can, pít ’ruara túcuy Ashpapi tiasckanta?» (Isaías 40:28, Reina-Valera, 1960). Y cartát Judasmanta nin Tata Yaya tiara «únay unaymantapacha» (Judas 25).

Cá versículus ckaachincu Tata Yaya casckan «Rey únay unáypaj», apóstul Pablu nisckan ina (1 Timoteo 1:17). Cay ninaan, pay únay unaymantapacha tiara, mana importas aica tiempo crusara. Y únay unáypaj tiancka (Revelación [Apocalipsis] 1:8). Tata Yaya mana ckallariyníoj ni puchucayníoj can; chay can suj cualidaresninmanta.

¿Imajchus mana chaynalla can unanchanayshta cayta? Causáysh utuquitas huatas, y chay ’ruan mana ckaanayshta tiempu Jehová ckaasckan ina. Por ejemplu, páypaj mil huatas cancu suj punchaullát ina, imajchus pay causara únay unaymantapacha (2 Pedro 3:8). Acúysh ckáaj suj ilustraciún. Suj tinti atúchaj causan 50 punchaus. ¿Atinman unachayta casckan causayta 70 u 80 huatas, nockáysh causasckayshta? ¡Mana á! Nockáysh chá tinti ina cáysh áicap comparacúysh ’Ruajniyshuan. Mentéysh mana comparacuyta atin Tata Yáyap mentenuan (Isaías 40:22; 55:8, 9). Chayraycu atin cayta mana unanchanayshta sujcuna imastis paymanta.

Amapas mana chaynalla can unanchanayshta Tata Yaya únay unáypaj casckan, chay sentidu apin. Si pillapas ’ruasa  canman Tata Yayát, chá persuna ’Ruajnin canman. Pero, Biblia nin ima Jehová can pi túcuy imastista ’ruara (Revelación 4:11). Nátaj, nockáysh yacháysh suj tiempupi universu mana tiasckanta (Génesis 1:1, 2). ¿Imaina ’ricurera? Arimi, ’Ruajnin na tianan tiara. Y tianan tiara manáraj sujcunasmanta yachayníoj, imaina huámaj huaanta y angelesta (Job 38:4, 7; Colosenses 1:15). Chay niyta munan, manáraj túcuy ’ruas, Tata Yaya sapallitan tiara. Pay mana atera ’ruascka cayta, imajchus ni pipas, ni mana imapas tiara, paylla cara.

Nockáysh causasckayshta y universu tiasckanta ckaachincu tiasckanta suj Tata Yaya únay unáypaj casckan. Pít túcuy universu ’ruara y leyes churara túcuy ordenascka tianánpaj, únay unaymantapacha tianan tiara. Paylla ckoyta atera causayta túcuy imastista causayníoj casckancuta (Job 33:4).