Testigo de Jehovacunaca tucuicunata cꞌuyaihuan, respetohuan tratangapajmi esforzarinchij. Shinapish shuj Testigo a huillanata saquijpi, congregacionhuan ña mana tandanacujpica paimanta mana caruyanchijchu. Ashtahuanpish paihuan parlashpami catinchij. Paita cꞌuyashcatami ricuchinchij. Shinallataj espiritualmente sinchi cachun, Diospaj organizacionpi catichunmi ayudanchij (Lucas 15:4-7).

 Shuj testigo de Jehová jatun juchata rurajpimi congregacionmantaca llujshichincuna (1 Corintios 5:13). Shinapish ñucanchij huauqui panicunata cꞌuyashcamantami manaraj congregacionmanta llujshichishca cajpi ayudanata munanchij. Pero congregacionmanta llujshichijpipish Bibliapi nishca shinaca cꞌuyaihuan, respetohuanmi tratanchij (Marcos 12:31; 1 Pedro 2:17).

¿Huaquincunaca imamantataj congregacionmanta llujshichishca cancuna?

 Diospaj mandashcacunata mana cazushpa jatun juchata rurashpa catijpi, mana arrepintirijpimi congregacionmantaca llujshichincuna b (1 Corintios 5:11-13). Bibliapica huainayana, huañuchina, familiata maltratana, shuhuanapish jatun juchacuna cashcatami ricuchin. Chaimantami shuj huauqui o shuj pani chashna laya jatun juchata rurajpica congregacionmanta llujshichincuna (1 Corintios 6:9, 10; Gálatas 5:19-21; 1 Timoteo 1:9, 10).

 Jatun juchata rurajca mana enseguida congregacionmanta llujshichishca canchu. Ashtahuanpish pushaj ancianocunaca c juchata ruraj arrepintirichunmi cꞌuyaihuan ayudanata munancuna (Romanos 2:4; Gálatas 6:1). Chashna ayudajpimi juchata rurajca imapi pandarishcata cuentata cushpa shungumanta arrepintiringa (2 Timoteo 2:24-26). Pero ancianocuna cutin cutin ayudasha nijpipish Jehová Diospaj mandashcacunata manataj cazujpica paica congregacionmantami llujshichishca canga. Ancianocunaca chai huauqui o pani ña mana testigo de Jehová cashcatami congregacionman huillanga.

 ¿Juchata rurajta congregacionmanta llujshichinaca imamantataj alli can? Huauqui panicuna Diospaj mandashcacunata pajtachishpa catichun, juchata rurajpaj mana alli ruraicunatapish ama catichunmi ayudanga (1 Corintios 5:6; 15:33; 1 Pedro 1:16). Shinallataj juchata rurajca mana alli ruraicunata saquishpami paipaj causaipi cambiocunata rurasha ninga (Hebreos 12:11).

¿Testigo de Jehovacunaca congregacionmanta llujshichishcacunahuanca apanacushpa catinchu?

 Bibliapica congregacionmanta llujshichishcacunahuan ama tandanacunguichij, ‘paicunahuan micungapajllapish ama tiyaringuichijchu’ ninmi (1 Corintios 5:11). Chaimantami congregacionmanta llujshichishcacunahuanca ña mana apanacunchij. Pero paicunahuan mana apanacushpapish paicunataca cꞌuyaihuan, respetohuanmi tratanchij. Ñucanchij tandanacuicunaman shamujpipish saludashpami alli chasquinchij. d Congregacionmanta llujshichishcacunaca Diospajman tigrangapajmi pushaj ancianocunata ayudachun mañana can.

 Shuj huauquita congregacionmanta llujchijpi paipaj huarmi, paipaj huahuacuna testigo de Jehová cashpa catijpica, ¿imataj tucun? Diostaca ña mana tandalla sirvishpa cati tucuncunachu. Shinapish cusaca paipaj huarmiman, paipaj huahuacunaman cꞌuyaita ricuchinata, paicunahuan apanacunataca mana saquinachu can.

 Congregacionmanta llujshichishcacunaca pushaj ancianocuna ayudachunmi mañai tucun. Ancianocunaca cꞌuyaihuanmi Bibliapi imata nishcata ricuchishpa ayudanga. Shinallataj juchata rurashcamanta arrepintirichun, Diospajman tigrachunpishmi animanga (Zacarías 1:3). Congregacionmanta llujchishcacuna jatun juchata ruranata saquishpa, Bibliapi mandashca shina causai callarishpaca cutinllatajmi congregacionman tigrai tucuncuna. Corinto llajtamanta juchata ruraj runa arrepintirijpi, Diospajman tigrajpica huauqui panicunaca shungumantami perdonarcacuna, paita llaquishcatapishmi ricuchircacuna (2 Corintios 2:6-8). Chashnallatajmi ñucanchijpish juchata ruraj congregacionman cutin tigrajpica cꞌuyaihuan, alli chasquina canchij.

¿Congregacionmanta llujshichishcacunaca ima shinataj sintirincuna?

 Maijancunaca congregacionmanta llujshichishca cashpapish Diosta cutin sirvinatami decidishcacuna. Paicuna imata nishcata ricushun.

 Estados Unidosmanta pani Mariaca: “Congregacionman cutin tigrajpica chai tucui huatacunapi imallata rurashcatami ancianocunaca tapunga nishpami yuyarcani. Pero mana chaita rurarcacunachu. Ashtahuanpish paicunaca: “Ñaupajman catingui” nircacunami. Chaita uyashpami tranquila sintirircani” ninmi.

 Sierra Leona llajtamanta Malcom shuti huauquica: “Huauqui panicunaca congregacionman ñuca tigrajpica achcatami cushicurcacuna. Chaimi ñucaca tranquilo sintirircani. Huauqui panicunaca Jehová Diospish, paicunapish ñucata perdonashcatami intindichircacuna. Shinallataj ñaupaman mana allicunata rurashcamanta ama llaquilla sintirichunmi ayudarcacuna. Cutin pushaj ancianocunaca cꞌuyaihuanmi ñucataca cutin Jehová Diospaj amigo tucuchun ayudarcacuna. Ashtahuanpish paicunaca Jehová Dios ñucata llaquishcata, paipaj ñaupajpi valishca cashcata intindichunmi ayudarcacuna” ninmi.

 Estados Unidosmanta Sandi shuti panica: “Dios paipaj pueblota cꞌuyashcamanta tucuipi limpio cachun cuidashcata ricushpaca cushillami sintirini. Huaquin gentecunapajca juchata rurajta congregacionmanta llujshichinaca sinchimi ricurin. Shinapish chaita ruranaca importantemi can. Jehová Diosca cꞌuyaj, perdonajmi can. Chaimantami paita agradicini” ninmi.