Cai mundopi tiyaj problemacunamanta yallitaj sustarishpaca ungüicunatami japi tucunchij. Shinallataj dimastij llaquillami sintiri tucunchij. Cai llaquicunahuan chꞌimbapuraj gentecunaca esperanza illajmi saquirincuna. ¿Paicunaca imatataj rurancuna?

• Huaquincunaca shamuj punllacunapi causai ima shina canataca mana yuyasha nincunachu.

• Shujtajcunaca problemacunapi ama yuyangapajca machancuna o drogarincunami.

• Asha gentecunaca causaipi achca problemacuna tiyashcata ricushpami huañunata munancuna.

• Maijan problemacunaca ratomi tucuri tucun. Chaimi cutin alli causai tucungui.

• Llaquicuna mana tucurijpipish, ahuantashpa catingapajca canllatajmi imatapish rurai tucungui.

• Bibliapica shamuj punllacunapica tucui llaquicuna tucuringami ninmi.

Bibliapica: “Caya punllamantaca ama yallitaj sustarichijchu. Punllantami imamanta sustarinaca tiyan. Chaimanta cunan punlla charishca llaquicunallamanta sustarichij” ninmi (Mateo 6:34).

Cada punlla imata ruranallapi yuyai. Caya punllamanta yallitaj sustarinapaj randica, cunan punlla imata rurana cashcata rurai.

Shamuj punllacunapi achca problemacuna shamungachari nishpa yuyashpaca estrés ungüitami japishun o esperanza illajmi saquirishun.

Shuj salmota quillcaj runaca Yaya Diostaca: “Quiquinpaj shimica ñuca chaqui sarunata achijyachijmi. Ñuca ñanta achijyachinmi” nircami (Salmo 119:105). ¿Cai shimicunaca imatataj nisha nin?

Amsa tutapica shuj lámpara achijyachijpimi maita purinata yachanchij. Chashnallataj imata ruranata mana yachashpaca Bibliapi tiyaj consejocunami alli decisioncunata agllachun ñucanchijta ayudan.

Luz tiyajpimi ñucanchij ñaupajpi imalla tiyashcata ricui tucunchij. Chashnallatajmi Bibliaca shamuj punllacunapi alaja causai tiyanata ricuchin.