1, 2. ¿Diosta sirvijcunaca imatataj shuyanchij?

HUAQUIN gentecunaca cazarashpa cushilla causanatami munancuna. Huahuacunapish sano huiñachunmi munancuna. O ancha ungüimanta jambirinatapishmi munancuna. Diosta sirvijcunapish chashna causanatami munanchij. Pero ñucanchijpajca huiñai causaita charina, huañushcacuna causarijta ricunami ashtahuan valishca can.

² Apóstol Pabloca huañushcacuna causarinapimi crirca. Paica: “Paicunaca, tucui huañushcacunatami cashcata rurajcunatapish, mana cashcata rurajcunatapish Taita Dios causachinga nincuna. Ñucapish chai yuyaillatajmi cani” nircami (Hechos 24:15). Pero Pablo caita manaraj nijpimi Jobca Jehová Dios paita causachinataca seguro carca (Job 14:7-10, 12-15).

3. 1 Corintios capítulo 15-manta yachashpaca ¿ima shinataj beneficiarinchij?

³ Jesusta catijcunaca huañushcacuna causarinatami crinchij (Hebreos 6:1, 2). Pabloca, 1 Corintios capítulo 15-pi huañushcacuna causarina cashcatami alli intindichirca. Jesusta punta catijcunataca Pablo nishcacunaca achcatami animashcanga. Huañushcacuna causarinata achca huatacunata crishpapish causarinamanta Pablo ima parlashcata yachashpami ñucanchijpish sinchiyanchij.

4. ¿Ñucanchij cꞌuyashca familiacuna causarinataca imamantataj crinchij?

⁴ Jesús causarishcamantami ñucanchij cꞌuyashca familiacunapish causaringa. Ñucanchijpishmi huañushpaca causarishun. Apóstol Pabloca corintocunamanmi chaita yachachirca (1 Corintios 15:1, 2). Pabloca paicunataca: “Cristo mana causarishca  cajpica, cancuna crishcapish yangallami” canman nircami (1 Corintios 15:17). Jesús causarishcapi crishcamantami shujtajcunapish causarinata tucui shunguhuan crinchij.

5, 6. 1 Corintios 15:3, 4 liyishca versocunaca ¿imatataj nisha nin?

⁵ Pabloca: ‘Cristoca ñucanchij juchacunamantami huañurca. Shinallataj pambashcami carca. Quimsa punllacuna qꞌuipaca causachishcami carca’ nishpami yachachirca (1 Corintios 15:3, 4-ta liyipai).

⁶ Ñucanchijpajca Jesús huañushca, pambashca, causarishcaca ¿imatataj nisha nin? Profeta Isaiasca Mesiasmanta parlashpaca: ‘Cai pachapi causajcunapuramanta anchuchishcami canga. Diosta mana rijsijcunahuanmi pambanalla tucunga. Achcacunapaj juchacunatami apanga’ nircami. ¿Jesusca ima shinataj caita pajtachirca? Shujtajcunata quishpichingapaj paipaj causaita cushpami chaita pajtachirca (Isaías 53:8, 9, 12; Mateo 20:28; Romanos 5:8). Jesús huañushcamantami ñucanchijpish juchamanta, huañuimanta quishpichishca cashun. Shinallataj Jesusmantami ñucanchij huañushca familiacunatapish cutin ricushun.

7, 8. ¿Jesús causarishcataca imamantataj crinchij?

⁷ Huañushcacuna causarinapi cringapajca puntapica Jesús causarishcapimi tucui shunguhuan crina canchij. ¿Jehová Dios paipaj Churita causachishcataca imamantataj crinchij?

⁸ Jesús causarishcataca achca gentecunami ricurcacuna (1 Corintios 15:5-7). Pabloca Jesusca puntaca Cefas o apóstol Pedromanmi ricurirca nircami. Jesusta huaquin catijcunapishmi Pedroca Jesús causarishcatami ricurca nircacuna (Lucas 24:33, 34). Shinallataj Jesuspaj 12 apostolcunapishmi Jesús causarishcata ricurcacuna. Qꞌuipaca 500 yalli huauqui panicunapishmi ricurcacuna. Paicunaca Galileapimi Jesushuan tupashcangacuna. Caitaca Mateo 28:16-20-pimi ricui tucunchij. Shinallataj Santiagomanpishmi ricurirca. Paica Jesuspajlla huauquimi cashcanga. Chaicamaca Santiagoca Jesús Mesías cashcataca mana crircachu (Juan 7:5). Pero pai causarishcata ricushpami Santiagoca Jesús Mesías cashcata crirca. Huata 55-pi Pablo corintocunaman quillcacujpica Jesús causarishcata ricujcunaca chai punllacunapica causacurcacunarajmi. Jesús causarishcata mana seguro cajcunaca paicunahuanmi parlai tucurcacuna.

9. ¿Pabloca Jesús causarishcata crichunca imamantataj shujtajcunataca ayudai tucurca?

⁹ Qꞌuipaca Jesusca apóstol Pablomanmi ricurirca (1 Corintios 15:8). Pablotaca Saulo nishpami rijsijcuna carca. Paica Damascoman viajacushpami Jesús jahua pachamanta shuj muscuipi shina rimashcata ricurca (Hechos 9:3-5-ta liyipai). Pabloca Jesusta uyashcamanta, ricushcamantami Jesús causarishcataca seguro carca (Hechos 26:12-15).

10. ¿Pabloca Jesús causarishcata seguro cashpaca imata rurangapajtaj esforzarirca?

¹⁰ Pabloca Jesusta catijcunataca catirashpami llaquichij carca. Chaimanta Jesús ricurishcata Pablo gentecunaman parlajpica paicunaca ima tucushcata yachanatami munashcangacuna. Pabloca Jesús causarishcata seguro cashpaca shujtajcunapish pai causarishcata crichunmi ayudarca. Jesús causarishcata gentecunaman huillacushpaca Pabloca llaquicunatami charirca. Paica azotishca, carcelpi churashca, viajacushpapish yacupi casi ahogarishcami carca (1 Corintios 15:9-11; 2 Corintios 11:23-27). Jesús causarishcata seguro cashpaca pai crishcataca huañuna cashpapish difindishpami catirca. Caimanta yachashpaca Jesús causarishcata, huañushcacuna causarinatami crinchij.

11. ¿Corinto llajtapi causaj huauqui panicunaca huañushcacuna causarinamantaca ima panda yuyaicunatataj charircacuna?

¹¹ Corinto llajtamanta huauqui panicunaca huañushcacuna causarinamantaca panda yuyaicunatami charircacuna. Huaquincunacarin ‘huañushcacuna causarinataca’ mana crircacunachu (1 Corintios 15:12). ¿Imamanta? Atenas cꞌuchupi causaj maijan jatun yachajcunaca Jesús causarishcata huillajpica burlarijcunami carca. Chaimi Corinto llajtapi causaj huaquin huauqui panicunapish paicuna shina cri callarishcangacuna (Hechos 17:18, 31, 32). Cutin shujtaj huauqui panicunaca Jesusta manaraj catishpa juchayuj cashcamanta huañushca shina cashcatami yuyashcangacuna. Pero Jesusta catishpa paicunapaj jucha perdonashca cajpica cutin causai callaricushcata shinami yuyashcangacuna. Chaimantami huaquincunaca Jesús causarishcata, huañushcacuna causarinataca mana crircacuna. Chashna crishcamantami paicunapaj feca imapaj mana valirca. Dios paipaj Churita mana causachishca cajpica tucuicunapaj juchacunaca mana perdonashca, mana quishpichishcachu canman carca. Huañushcacuna causarinata mana crijcunaca esperanza illajpishmi causarcacuna (1 Corintios 15:13-19; Hebreos 9:12, 14).

12. ¿Ñaupa causachishcacunahuan, Jesús causarishcahuanca imapitaj chꞌican carca?

¹² Pabloca Jesús huañushcacuna chaupimanta causarishcatami alli yacharca. Huaquincunaca Jesús manaraj causarishca cajpimi cai Allpapi paicunaraj ña causachishcacuna carca. Pero paicunaca cutinmi huañurcacuna. Pabloca Jesusmanta parlashpaca: “Paica huañushcacuna causarinata ricuchishpa punta causarijmi” nircami. Pabloca ¿imamantataj Jesustaca punta causarij nishcanga? Jesusca punta cutin espíritu shina causarishpami jahua pachaman rirca (1 Corintios 15:20; Hechos 26:23; 1 Pedro 3:18, 22-ta liyipai).

13. ¿Pabloca Adanmanta, Jesusmantaca imatataj yachachirca?

¹³ ¿Shuj runa huañushcamantaca ima shinataj achca gentecunaca cutin causari tucuncuna? Pabloca Adanmanta parlashpaca ‘shuj runallamantami huañuica cai pachaman yaicurca’ nircami. Adanca juchata rurashcamantami paillataj huañurca. Paipaj huahua huahuacunapish cunan punllacunacama huañushpa catin. Pero Jehová Dios paipaj Churita causachishcamantami shuj alaja esperanzata charinchij. Pabloca Jesusmanta parlashpaca: ‘Huañushcacunapaj chaupimanta causarinapish shuj runallamantami tiyan. Ima shinami Adanmantaca tucuicuna huañun, chashnallatajmi Cristopi cajcunaca tucuicuna causachishca canga’ nircami (1 Corintios 15:21, 22).

14. ¿Adán mana causarinataca imamantataj yachanchij?

¹⁴ Apóstol Pabloca ‘Adanmantaca tucuicunami huañun’ nishpaca ¿imatataj nisha nicurca? Adanpaj tucui huahua huahuacunamantami parlacurca. Paipaj huahuacuna cashcamantami juchayujcuna canchij. Shinallataj tucuicunapish huañunchij (Romanos 5:12). Adanca huiñai causaita chasquigrijcunapaj ucupica mana canchu. ¿Imamanta? Paica jucha illaj runami carca. Chashna jucha illaj cashpapish Diosta mana cazunatami decidirca. Chaimantami Jesuspaj sacrificiomantaca paica mana beneficiari tucun. Ima shinami chivocuna shina caj gentecunata Jesús juzgashpa huiñaipaj tucuchinga. Chashnallatajmi Adanpish huiñaipaj huañushca carca (Mateo 25:31-33, 46; Hebreos 5:9).

15. ¿Pabloca Jesuspi cajcunaca tucuicunami causachishca canga nishpaca, picunamantataj parlacurca?

 ¹⁵ Pabloca: ‘Jesuspi cajcunaca tucuicunami causachishca canga’ nishpaca ¿picunamantataj parlacurca? (1 Corintios 15:22). Corinto llajtapi causaj huauqui panicunaca jahua pachapi causarina esperanzatami charircacuna. Pabloca chai esperanzata charijcunamantami parlacurca. Paicunaca “Jesuspi shujlla tucujpi jucha illajta rurashca, jucha illaj cachun cayashcacunami” carcacuna. Shinallataj Pabloca ‘Jesusta catishcamanta huañushcacunamantapishmi’ parlarca (1 Corintios 1:2; 15:18, NWT; 2 Corintios 5:17). Cutin Pabloca shujta cartapi Diospaj ayudahuan quillcacushpaca, Jesús “huañushca shina paihuan shujlla tucushca cashpaca, pai causarishca shinallatajmi causarishun” nircami (Romanos 6:3-5). Jesusca shuj espíritu shina causarishpami jahua pachaman rirca. Jahua pachapi causachun agllashcacunaca espíritu shinallatajmi jahua pachapi causaringacuna.

16. ¿Pabloca Jesús huañushcacunamanta punta causarij nishpaca imatataj nisha nirca?

¹⁶ Pabloca Cristo huañushcacunamanta punta causarij nishpami quillcarca. Caipi yuyashun. Cai Allpapica achca gentecunami Lázaro shinallataj causarircacuna. Pero paicuna causarijpipish Jesusmi jahua pachapi punta cutin shuj espíritu shina causarirca. Huiñai causaitapishmi chasquirca. Shinallataj Pabloca Jesús huañushcacunamanta punta causarij nishpaca shujtajcunapish jahua pachapi causarinamantami parlacurca. Jesús huañushca shina paita catij cashpa huañushcacunapish, apostolcunapish jahua pachapi causarishpami Jesús shinallataj huiñai causaita charingacuna nircami.

17. ¿Jesús huañushca shina paihuan shujlla cajcunaca ima horataj jahua pachapi causarinata chasquircacuna?

¹⁷ Pablo Corinto llajtapi causajcunaman cartata quillcacujpica Jesús huañushca shina paihuan shujlla tucushca cajcunaca jahua pachapica manaraj causarishcacunachu carca. Pabloca: “Ashtahuanpish tucuicunami paicuna causarina cashcapica huashan huashan causaringa: Cristomi puntaca causarirca. Chai qꞌuipaca Cristopaj cajcunami pai tigramujpica chashna causaringacuna” nircami (1 Corintios 15:23, NWT; 1 Tesalonicenses 4:15, 16). Pabloca chashna nishpaca qꞌuipa punllapaj causarinamantami nicurca. Ña ricushca shinaca apostolcunapish jahua pachaman caishuj rigrijcunapish Jesús mandai callaringacamami jahua pachaman ringapajca shuyana carcacuna. Cunanca Jesús mandacui punllacunapimi causacunchij.    

18. a) ¿Ima shinataj yachanchij cai Allpapi causarina tiyanata? b) 1 Corintios 15:24 al 26-pi nishca shinaca ¿jahua pachapi causarijcunahuanca imataj tucunga?

¹⁸ ¿Jahua pachapi Jesushuan mana causarijcunaca ima esperanzatataj charincuna? Paicunapish huañushpa causarina esperanzatami charincuna. ¿Imamantataj caitaca yachanchij? Bibliapi nishca shinaca jahua pachapi causarijcunaca punta causarijcuna cashcatami ricuchin (Apocalipsis 20:6). Caita ricushpaca shamuj punllacunapipish shujtajcuna causarinatami yachanchij. Jobpish chaillatatajmi crirca (Job 14:15). Jesuspaj cajcunaca pai tucui mandajcunata, tucui poderyujcunata chingachijpimi paihuan cangacuna. Chaimi huañuipish para siempre tucuchishca canga. Chaimanta jahua pachapi causarijcunaca mana nunca huañunatami intindinchij. Pero, ¿cai Allpapi causana esperanzata charijcunahuanca imataj tucunga? (1 Corintios 15:24-26-ta liyipai).

19. ¿Cai Allpapi causana esperanzata charijcunaca imatataj crincuna?

¹⁹ Cai Allpapi causana esperanzata charijcunaca Pablo shinallatajmi ni tucuncuna. Paica: “Ima shinami paicunaca, tucui huañushcacunatami cashcata rurajcunatapish, mana cashcata rurajcunatapish Taita Dios causachinga nincuna. Ñucapish chai yuyaillatajmi cani” nircami (Hechos 24:15). Mana cashcata rurajcunaca jahua pachapica mana yaicui tucunchu. Chaimantami shamuj punllacunapi huañushcacunata Yaya Dios cai Allpapi causachinata yachanchij.

20. ¿Cai yachaipi ricushca shinaca huañushcacuna causarinata yachashpaca ima shinataj sintiringui?

²⁰ Huañushcacuna causarinatami tucui shunguhuan crinchij. Cai Allpapi causarijcunaca huiñai causaita charina oportunidadtami charingacuna. Jesuspish, jahua pachapi causarijcunapish, 1000 huatacunata cai pachata mandacujpimi ñucanchij cꞌuyashca familiacunata causachinata yachashpaca cushillami sintirinchij (Apocalipsis 20:6). Cunan punllacunapi huañushpapish Jesús 1000 huatacunata mandacujpi causarinatami tucui shunguhuan crina canchij. Causarina esperanzata charishcamantami Jehová Diostaca cushilla sirvishpa catinchij (Romanos 5:5). Catij yachaipica 1 Corintios capítulo 15-mantami ashtahuan yachashun.