Shuj huauquica: “19 huatacunatami caitaca shuyacurcani” ninmi. ¿Imatashi cai huauquica shuyacurca? Pai parlashca bengalí shimipi Traducción del Nuevo Mundo Mushuj Testamento llujshichunmi shuyacurca. Achca gentecunaca paicunapaj propio shimipi Traducción del Nuevo Mundo Bibliata ña chasquishpaca cai huauqui shinallatajmi sintirircacuna. Tal vez tapurishcanguichu ¿Bibliataca ima shinataj traducin, ima shinataj ruran? nishpa.

 Puntapica huaquin huauqui panicunatami Bibliata traducichun agllancuna. Paicunataca Comité de Redaccionpi sirvij huauquicunami ricushpa ayudan. ¿Mashna tiempotaj minishtirin Bibliata traducingapajca? Nueva York llajtapi Servicios de Traduccionpi sirvij huauqui Nicholas Ahladisca cashnami nirca: “Mashna tiempo minishtirishcata ricungapajca picunalla traducishpa ayudanata, chai shimipi traducina jahualla o sinchi cashcatami ricuna carcanchij. Shinallataj Bibliata liyijcuna ñaupa punllacunapi ima shina causashcata intindijta o mana intindijta, tucui llajtacunapica mana chai shinallataj rimaj cashcatapishmi ricuna carcanchij. Shinaca Bibliata traducijcunaca shuj huata o mana cashpaca quimsa huatacunapimi Mushuj Testamento partellata traducishpa tucuchincuna. Cutin tucui Bibliata traducingapajca chuscu huata o mana cashpaca ashtahuan huatacunatami minishtincuna. Pero señas shimipi traducinami ashtahuan tiempota minishtin”.

 Bibliata traducingapajca mana shuj grupolla huauqui panicunatachu minishtircanchij. Ashtahuancarin traducishca Bibliata ricushpa ayudachunpishmi huaquin huauqui panicunata minishtircanchij. Cutin huaquinpicarin chꞌican llajtacunamanta huauqui panicunami minishtirirca. Paicunaca nimata mana cobrashpami cashna ayudancuna. Paicuna nishca yuyaicunami Bibliata traducijcuna imapi mana pandarishpa, jahualla, intindirinalla shimicunata churachun ayudan. Sudáfrica llajtamanta Bibliata traducinata yachachijca cashnami nirca: “Traducijcunaca Jehová Dioshuanpish, Bibliata liyijcunahuanpish achca responsabilidadta charishcatami yachancuna”.

 Traducinata tucuchishca qꞌuipaca imprimishpami shuj librota rurana minishtirin. Chaipajca 10 chꞌican chꞌican materialcunami minishtirin. Por ejemplo: papel, tinta, forrota rurangapaj material, pegamento, forrota pilluchingapaj material, plomo filocunata charij papel, cintacuna, libropaj jahua umapi ura chaquipi tiyaj cintacuna, libro huasha ladota pegachinapaj cartón, tucui Biblia tandalla pegarichun material. Shinaca 2019 huatapica Bibliata rurangapaj imalla minishtirishcacunata randishpaca 20 millones de dólares yalli cullquitami gastarcacuna. Bibliata rurashpa congregacioncunaman cachangapajmi imprimishpa trabajajcunaca chai huatapica 300 mil yalli horascunata trabajarcacuna.

 ¿Imamantataj cai laya Bibliata rurashpa achca tiempota cullquita gastanchij? Departamento Internacional de Impresionpi trabajaj huauqui Joel Blueca cashnami nirca: “Ñucanchij rurashca tucui publicacioncunamantaca Bibliami ashtahuan valishca can. Chaimi gentecuna alaja Bibliata ricushpa Jehová Diosta jatunyachichun, ñucanchij huillajpipish chaipi tiyaj yuyaicuna valishca cashcata cuentata cuchun munanchij”.

 Shinallataj Traducción del Nuevo Mundo Bibliataca tucui laya gentecunapajmi ruranchij. Por ejemplo, mana ricuj gentecunapajpish braillepimi Traducción del Nuevo Mundo Bibliaca 10 shimicunapi tiyan. Tucui Bibliata braillepi rurangapajca huaquinpica 8 horascamami minishtirin. Cai Bibliaca huaquin jatun librocunatami charin. Chaimantami huaquichinapica 2,3 metrocunata ocupan. Cutin huaquin carcelcunapica papelhuan forrasca librocunallatami chari tucuncuna. Chaimantami prezupi cajcunapajpish chashna shina papelhuan forrashca Bibliata ruranchij.

 Traducción del Nuevo Mundo Bibliata liyijcunataca achcatami ayudan. Por ejemplo República Democrática del Congopica La Tombe nishca pueblomi tiyan. Chai puebloca capitalmanta 1.700 kilómetros carupimi saquirin. Chaipica kiluba shimita parlaj congregacionmi tiyan. Chai congregacionpi sirvij huauqui panicunapajca kiluba shimipica shuj solo Bibliami tiyarca. Pero chai Bibliaca ñaupa punllacunapi parlashca shimicunatami charirca. Shinaca tandanacuicunapi parteta charij huauquicunaca maijan cashpapish shuj ña prepararishpaca cutin chai Bibliataca caishujmanmi pasachijcuna carca. Pero agosto 2018 huatapimi chai congregacionpi sirvij huauqui panicunaca Traducción del Nuevo Mundo Bibliataca cada uno japircacuna. Cai Bibliaca cunan punlla kiluba shimipi parlaj shinami traducishca can.

 Cutin alemán shimita parlaj panica Traducción del Nuevo Mundo revisashca Bibliata paipaj shimipi chasquishpaca: “Cunanca Bibliataca liyinami canica mana ninichu. Chaipaj randica ¿ima horataj tiempota charini ashtahuan liyishpa catingapaj? yuyanimi” nircami. Cutin carcelpi caj runaca cashnami escribirca: “Traducción del Nuevo Mundo Bibliatami ñucaman curcacuna. Ñaupamanca Diospaj Shimitaca mana alli intindircanichu. Pero cunanca cai Bibliata liyishpami alli intindishpa ñuca causaita cambiacuni. Testigo de Jehovacunatami rijsisha nini paicuna shina cangapaj imata rurana cashcata yachangapaj”.

 Obra mundialman shungumanta cushca cullquihuanmi Traducción del Nuevo Mundo Bibliataca huaquin shimicunapi llujshichishcanchij. Chaimantami cai Bibliata liyijcunaca achcata agradicincuna. Achcacuna donate.jw.org paginapi shungumanta cullquita cushpa ayudashcamantami diosolopagui ninchij.