Romanos 10:1-21
-
Diospaj ñaupajpi cashcata ruranata mashcanamanta (1-15)
-
Tucuicunapaj ñaupajpi huillanamanta (10)
-
Jehová Diosta mañajcunaca quishpiringacunami (13)
-
“Alli huillaicunata huillajcunapaj chaquicunaca sumajmari” (15)
-
-
Alli huillaicunata mana uyasha nishcamanta (16-21)
10 Huauquicuna, ñucaca tucui shunguhuanmi israelitacuna quishpirichun munani. Chaimantami paicunamanta Diosta mañacuni.
2 Paicuna Diosta sirvingapaj achcata esforzaricujtaca huillai tucunimi. Chashna esforzarishpapish Diosmantaca mana alli yachancunachu.
3 Paicunaca Diospaj ñaupajpi cashcata rurana ima cashcataca mana yachancunachu. Ashtahuanpish cashcatami ruracunchij yuyashpami paicuna munashcallata rurancuna. Chaimantami Diospaj ñaupajpi cashcata rurana cashcataca mana rurarcacuna.
4 Leyca Cristopimi tucurirca. Chaimantami maijanpish Cristopi feta churajca Diospaj ñaupajpica cashcata ruraj can.
5 Leypi nishca shina cashcata ruranamanta Moisés quillcashpaca: “Shuj runaca Leypi nishca shina cashcata rurashpaca causangami” nircami.
6 Shinapish Diospaj shimipica feta charishcamantami shuj runaca cashcata ruraj canga nishpami huillarca. Chaipica: “Cambaj shungupica ‘¿Pitaj jahua pachamanca huichiyangari?’ ama nichu ninmi. Chaica Cristota uriyachingapaj huichiyana nisha ninmi.
7 Shinallataj ‘¿Pitaj jatun jutcumanca* uriyangari?’ ama nichu ninmi. Chaica Cristota huañushcacunapaj chaupimanta huichiyachingapaj nisha ninmi” nircami.
8 Shinapish ¿quillcachishcapica imatataj nin? Chaipica: “Diospaj shimica cambaj cꞌuchupi, cambaj shimipi, cambaj shungupimi can” ninmi. Chai shimitami ñucanchijca huillacunchij. Chai shimita chasquingapajca crinami minishtirin.
9 Cambaj shimihuan tucuicunapaj ñaupajpi Jesús Amito cashcata huillashpa, cutin cambaj shungupi huañushcacunapaj chaupimanta Jesusta Dios causachishcapi feta churashpaca quishpiringuimi.
10 Cashcata ruraj cangapajca shungumantami feta charishcata ricuchina cangui. Shinapish quishpiringapajca tucuicunapaj ñaupajpimi cambaj shimihuan huillana cangui.
11 Dios quillcachishcapica: “Maijanpish paipi feta churajca mana pingaipi saquiringachu” ninmi.
12 Judío runacunapish, griego runacunapish chai shinallatajmi. Tucui laya gentecunatami chai Amitollataj mandan. Paica ayudachun nishpa mañajpica tucuicunatami mana mitsashpa ayudan.
13 “Jehová* Diospaj shutita nishpa mañajcunaca tucuicunami quishpiringacuna”.
14 Shinapish ¿paipi feta mana churashpaca ima shinataj paitaca mañangacunari? ¿Paimanta mana uyashpaca ima shinataj paipica feta churangacunari? ¿Paimanta pi mana huillajpica ima shinataj paimantaca uyangacunari?
15 ¿Huillanaman mana cachajpica ima shinataj huillangacunari? Dios quillcachishcapica: “¡Alli huillaicunata huillajcunapaj chaquicunaca sumajmari!” ninmi.
16 Shinapish alli huillaicunataca mana tucuicunachu chasquircacuna. Isaiasca: “Jehová* Dioslla, ¿ñucanchij huillashcapica* pitaj feta churashcari?” nircami.
17 Chashna cajpipish shuj runaca huillashca shimita uyashpami crin. Chai huillashca shimitaca Cristomanta huillajpimi uyan.
18 Shinapish ñucaca israelitacunamantaca cashnami tapuni: ¿paicunaca manachu uyarcacuna? Ari, paicunaca uyarcacunami. Dios quillcachishcapica: “Tucui allpapi causajcunami chai huillaitaca uyarcacuna. Ashtahuan carupi cajcunapishmi chai nishcacunataca uyarcacuna” ninmi.
19 Caitapishmi tapuni: ¿israelitacunaca manachu yacharcacuna? Moisesca: “Cantaca shujtaj llajta gentecunamanta envidiata charichunmi saquisha. Yuyai illaj nishca llajtahuanmi cantaca pꞌiñachisha” nishpami cutichirca.
20 Shinapish Isaiasca mana manchashpami: “Ñucata mana mashcajcunami ñucataca japircacuna. Ñucamanta mana tapujcunami ñucataca rijsircacuna” nirca.
21 Ashtahuanpish Israel llajtamantaca: “Ñucata mana cazuj, rumi shungu llajtataca ñuca maquicunata chutashpami punllanta cayarcani” nircami.
Notacuna
^ “Jatun jutcu” shimita huasha diccionariopi ricui.
^ “Jehová” shutita huasha diccionariopi ricui.
^ “Jehová” shutita huasha diccionariopi ricui.
^ Griego rimaipica: “ñucanchijmanta imata uyashcataca” ninmi.
