Job nunapaq Biblia parlarmi “mana jutsallakoq y alli kaqta ruraq” nin (Job 1:1). Lot nunapaqnam “alli rurag” nin (2 Pëdru 2:8, NTCN). Y Davidpaqnam Diospa rikënimpaq “alli kaqta ruraq” nin (1 Rëyes 14:8). Kë nunakuna imanö kayanqanta maslla yachakurishun. Tsënöpam imallachöpis pantayanqanta musyarishun, tsëmi yanapamäshun jutsasapa këkarpis Diosta kushitsita puëdinqantsikta.

Jobqa desgraciakunapam pasarqan y tsëta mana merecinqanta creirmi, Dios pëpaq mana yarpachakunqanta pensarqan, peru mana allitam pensëkarqan (Job 9:20-22). Jina alli nuna kanqampitaqa segürum këkarqan. Tsëmi, parlanqanta wiyaqkunapis niyarqan Diospitapis mas alli nuna kanqanta Jobqa creikunqanta (Job 32:1, 2; 35:1, 2).

Lotqa manam Dios mandanqanta wiyakunampaq segürutsu karqan. Sodöma y Gomörra markakunachö täraqkunaqa alläpa mana alli rakcha  ruraq nunakunam kayarqan, y Lotqa tsënö portakuyanqanta manam aguantarqannatsu. Tsëmi “shongollanchö alläpa llaquicur sufrirgan” (2 Pëdru 2:8, NTCN). Diosqa tsë llapan nunakunata ushakätsinampaqmi Lotta willarqan, y familianta salvëta munarqa tsëpitam jorqanan (jipinan) karqan. Peru rastsu manam cäsukurqan. Tsëmi Diosqa angelninkunata mandarqan Lotta y familianta makinkunapita jancharkur tsë markapita jorqayänampaq (Genesis 19:15, 16).

Davidqa shonqumpa munëninta cäsurmi juk casäda warmiwan punukïkurqan. Peru manam tsëllatatsu rurarqan, tsë warmipa qowan mana musyanampaqmi wanutsiyänampaq mandarqan (2 Samuel, 11 kaq capïtulu). Bibliaqa nin: ‘David ruranqan alläpa mana allinö Jehoväpa rikënimpaq kanqantam’ (2 Samuel 11:27).

Kë kiman nunakunaqa tukïnöpam pantayarqan. Peru qateqninchömi rikäshun, pëkunaqa Diosta shonqupita patsë wiyakïta munayanqanta. Y rikätsikuyarqanmi arrepentikuyanqanta y mana alli rurëninkunata altsayänampaqmi churapakäyarqan, tsëqa Diostam kushitsirqan. Tsëmi tsënö pantashqa kayaptimpis, markäkïyoq nuna kayanqanta Bibliaqa nin.

Clärum këkan, llapantsikmi imallachöpis pantantsik (Romänus 3:23). Peru tsëkunapita arrepentikïtaqa puëdintsikmi, tsënöpa Dioswan amïgu kënintsikta altsanapaq.

 ¿Imanötaq Job, Lot y David Dioswan amïgu këninkunata altsayarqan? Jobqa, alli shonquyoq karmi ninqankunapita arrepentikurqan, Dios pëwan parlariptinmi Jobqa pensëninta cambiarirqan (Job 42:6). Y Lotqa, Sodöma y Gomörra markakunachö jukwan jukwan pununakïtaqa Diosnömi chikeq. Peru imëkanta mana jaqita munanqanmi mana alliqa karqan, peru tsëpitaqa Diosta wiyakurmi qepanchö jaqinqankunata mana rikashpa tsë markapita ëwakurqan. Y Diospa Leyninta David mana wiyakushqa karnimpis, rikätsikurqanmi alli shonquyoq kanqanta, arrepentikurqanmi y shonqupita patsëmi Diosta mañakurqan perdonëkunampaq (Salmu 51).

Diosqa musyanmi jutsasapa kanqantsikta. Tsëmi, tsë nunakuna pantëkäyaptimpis, rikënimpaqqa allilla kayarqan. Pëqa, mana puëdinantsikpaq kaqtaqa manam mañamantsiktsu, porqui “musyanmi imanö rurashqa kanqantsikta, y yarpanmi allpapita rurashqa kanqantsikta” (Salmu 103:14). Tsëqa, ¿imataraq noqantsikpita shuyaran?

David tsurin Salomonta ninqanchömi tsëta musyarintsik: “Tsurillä, teytëkipa Diosninta reqi y llapan shonqïkiwan [...] sirwi” (1 Crönicas 28:9). Y ¿ima ninantaq llapan shonqïkiwan Diosta sirwi ninanqa? Tsëqa, Diosta kuyë, shonqupita patsë reqi y mandakunqanta wiyakï ninanmi. Y manam jutsannaq kë ninantsu. Jehoväta shonqupita patsë sirwita munaqqa, pë pushanantam munan y corriginantam jaqin. Tsëmi, Diosqa Jobpaq “mana jutsallakoq y alli kaqta ruraq” nuna nirqan. Y Lotpaqnam “alli rurag” nunam nirqan, y Davidpaqnam “alli kaqta ruraq” nuna nirqan. Jutsallakushqa këkarpis Diostam kushitsiyarqan.

Mana alli pensëkuna chämuptin, mana allichö quedatsimaqnintsik parlakunata parlarir o mana alli rurëkunata rurarir cuentata qokurirqa, ama jaqishuntsu tsëkuna vencimänata. Kë kiman nunakuna rurayanqanta yarpäshun. Diosqa musyanmi jutsasapa kanqantsikta. Tsënö kaptimpis llapan shonquntsikwan sirwinatam shuyaran, tsë ninanqa: kuyanata y cäsunapaq kallpachakunatam munan. Tsënö rurarqa alläpam kushitsishun.