KË TAPUKÏTA contestanapaqqa, Bibliachö parlanqan Diospa ishkë castïgunkunapaq yachakurishun: Noëpa tiempuchö Apäkï Tamyapaq, y cananëukunata ushakätsinqampaq.

WAKINKUNA NIYANQAN: “Diosqa rumi shonqu karninmi Noëpa familianllata salvarqan y llapan nunakunata Apäkï Tamyawan ushakätsirqan”.

BIBLIA YACHATSIKUNQAN: Diosmi nin: “Manam kushikötsu juk mana alli nuna wanuptin, sinöqa mana alli nuna, mana alli rurëninkunata jaqirïkur kawaptinmi” kushikö (Ezequiel 33:11). Tsënöpam musyantsik Noëpa tiempunchö mana alli nunakuna wanuyaptin Dios mana kushikunqanta. Tsëqa, ¿imanirtaq rurarqan?

Bibliam willamantsik mana alli ruraqkunapaq castïguta apamurninqa “qepa yuricoq jutsasapacuna cuentata qocuyänanpaq” ruranqanta (2 Pëdru 2:5, 6). Bibliaqa willakunmi imanir y imanö Dios imatapis ruranqanta.

Puntataqa, mana alli ruraqkunata wanutsinqampita llakikurnimpis, Diosqa alli clärum rikätsikurqan wakinkunata allqutsayänanta mana permitinqanta. Shamoq tiempuchöqa llapan sufrimientukuna y mana alli rurëkunam ushakanqa.

Ishkë kaqchöqa, pasaqchö imanö ruranqanmi rikätsimantsik kuyakoq karnin manaraq nunakunata castigarnin puntataqa willanqanta. Tantiyarishun, Noëwanmi willatsirqan, peru nunakunaqa manam wiyakuyarqantsu. Tsëmi Biblia kënö nin: “Manam wiyakuyarqantsu Apäkï Tamya shamur llapanta ushakäratsinqanyaq” (Matëu 24:39, NM).

¿Diosqa cambiashqatsuraq? Manam. Markan israelïtakunatam willarqan, wakin nacionkunapa mana alli rurëninkunata rurayaptinqa chikeqninkuna yekïkur capitalnin Jerusalenta ushakätsiyänampaq y esclävutanö apakuyänampaq permitinampaq kaqta. Israelïtakunaqa manam tsëta cäsukuyarqantsu y wakin nacionkunanöllam mana allita rurar qallëkuyarqan. ¡Jina wamrankunatapis mana alli dioskunapaqmi kayayarqan! ¿Jehoväqa castigarqantsuraq? Awmi, peru manaraq castigarninqa profëtankunawanmi atska kuti cambiayänampaq willatsirqan. Këtapis nirqanraqmi: “Ciëluchö y Patsachö Autoridäyoq  Jehoväqa manam ni imatapis ruranqatsu manaraq profëtankunawan willatsikurninqa” (Amos 3:7).

IMATATAQ KËPITA YACHAKUNTSIK: Pasaqchö Dios manaraq castigakurnin willakunqanqa noqantsiktapis yanapamantsikmi. Rumi shonqu nunakunata Jehovä castiganampaq kaqtaqa segürum këkantsik. Bibliam willamantsik: “Mana allita ruraqkunaqa ushakäyanqam [...] Peru manshukunapaqmi patsaqa kanqa, y tsëchömi alläpa alli kawakïta tarirnin kushishqa kawakuyanqa” (Salmu 37:9-11). ¿Ima ninkimanraq llapan nunakuna manana sufriyänampaq Dios castïgunta apamuptin? ¿Rumi shonqum ninkimantsuraq o kuyakoqmi ninkimantsuraq?

WAKINKUNA NIYANQAN: “Kanan tiempu guërrakunachö wanutsinakuyanqannöllam cananëukuna wanuyanqanqa espantëpaq karqan”.

BIBLIA YACHATSIKUNQAN: Diospa rurëninkunaqa imëpis allillam. “Mana jaqikoq Dios[mi], pëchöqa manam ima mana alli rurëkuna kantsu” (Deuteronomiu 32:4). Diospa castïguntaqa manam nunakunapa guërrantawan igualatsishwantsu, porqui pëkunaqa manam musyayantsu nunakunapa shonqunchö ima kanqanta, peru Diosqa musyanmi.

Tantiyarinapaq, Sodömatawan Gomörra markata juzgar ushakätsinampaq kaqta Dios niptinmi, Abrahanpaqqa mana allinö karqan, tsëmi Diosta kënö tapurqan: “¿Alli ruraq nunakunatawantsuraq mana alli nunakunata ushakäratsinki?”. Kuyakoq Jehovä tsëta rurarinantaqa manam creyirirqantsu. Alläpa pacienciakurmi, Diosqa awnirqan chunka nunallatapis Sodömachö alli ruraqta tarirninqa, tsë markata perdonanampaq kaqta (Genesis 18:20-33). Awmi, Diosqa kë nunakunapa shonqunkuna mana alliman tumakashqa kanqantam rikarqan (1 Crönicas 28:9).

Cananëukunapa shonqunkuna mana allilla kanqanta rikarmi, pëkunatapis ushakätsiyänampaq Diosqa mandarqan. Cananëukunaqa reqishqa kayarqan wamrankunata diosninkunapaq kawëkaqta kayarnin y imëka mana allikunata rurayanqampitam (2 Rëyes 16:3). * Pëkunaqa musyayarqanmi Jehovä tsë chakrakunata tsariyänampaq nishqanta. Peru mana entregëta munaqkuna y guërrataraq rurëta munaqkunaqa manam israelïtakunallatatsu negëkäyarqan sinöqa pëkunawan imëpis këkanqanta rikätsikushqa Jehovätawanmi.

Peru cananëukuna mana alli rurëninkunata jaqiriyaptin, y pë munanqannö kawakuyaptinqa Diosqa llakiparqanmi. Tantiyarinapaq, lluta purikoq Rahab jutiyoq warmipa y familiampa kawënintam perdonarirqan. Gabaon markachö täraq nunakuna Jehoväman mañakuyanqanrëkurmi, pëkuna y llapan tsurinkuna wanuyarqantsu (Josuë 6:25; 9:3, 24-26).

IMATATAQ KËPITA YACHAKUNTSIK: Cananëukuna castigashqa kayanqampitaqa juk precisaqtam yachakuntsik. ‘Juisiu junaq y mana alli ruraq nunacuna tsëchö jipayänan’ tiempukunamanqa masnam chëkantsik (2 Pëdru 3:7). Diospa Gobiernunta negaqkunata ushakäratsiptinmi, kuyaqnin y wiyaqnin kaqkunaqa imëyaqpis mana sufrishpa kawakïta chaskishun.

Jehoväqa kuyëpam yarpätsimantsik teytakuna wamrankunapaq imatapis rurayanqanqa allipaq o mana allipaqpis kanqanta. Palabran Bibliachömi kënö nimantsik: “Kawëtam akranëki qam y kastëkikuna kawayänëkipaq, Jehovä Diosnikita kuyarnin, ninqanta wiyakurnin, y pëta mana jaqirnin” (Deuteronomiu 30:19, 20). ¿Kënö palabrakunaqa rumi shonqu Diospitatsuraq shamunman o alli kaqta akranantsikta munaq y kuyakoq Diospitatsuraq?