Armagedón rasumpa ima kanqan

“Mana alli espiritucunaqa juc pampaman[mi] jinantin nasionpita reycunata ellura[yä]morqan. Tse pampapam jutin hebreu idiomacho ‘Harmagedon’.” (APOCALIPSIS 16:16, noqakunam kinkishätsiyarqö.)

ARMAGEDÓN, o wakin Bibliakunachö Har–Magedón nir qellqayanqanqa huk pampapa shutinmi. Tsënö kaptimpis, manatsunchi tsënö shutiyoq sitioqa ni imëpis kë Patsachö kashqatsu.

Tsëqa, ¿ima ninantaq “Armagedón”? ¿Imanirtaq tsë palabrata wiyarqa, huk hatun guerra o tsënö imapis pasakunampaq kaqman nunakuna pensayan?

Armagedón pampaman ëlluyarqan

Hebreo idiömachö Har–Magedón nishqan palabraqa “Meguidó hirka” ninanmi. Tsënö shutiyoq hirka mana imë kashqa kaptimpis, kanmi huk sitio Meguidó shutiyoq. Unë Israel nacionpa noroeste kaq lädonmampa atska nänikuna tinkoqchömi tsë sitioqa këkan. Tsë sitiopa amänunkunachömi hatun guërrakuna unë witsan karqan, tsëmi Meguidó nishqan shutita wiyarqa, guërraman pensayaq. *

Tsënö kaptimpis, Meguidöchö ima guërrakuna kanqanta musyanantsiktsu manam masqa precisan, sinöqa, imarëkur tsë guërrakuna kanqanmi. Meguidó nishqan sitioqa, israelïtakunata Jehová awninqan Patsachömi karqan (Éxodo 33:1; Josué 12:7, 21). Jehoväqa israelïtakunata awnirqan chikeqninkunapita  tsapänampaq kaqtam (Deuteronomio 6:18, 19). Y tsënömi rurarqan. Huk kutim, Meguidó sitiochö Jehová israelïtakunata salvarqan Canaanpa reynin Jabinpa soldädonkunapa y mandaqnin Sïsarapa makimpita (Jueces 4:14-16).

Tsëmi “Har–Magedón”, o “Armagedón” nishqan palabra ima ninan kanqanta musyanantsikqa alläpa precisan. Tsë palabraqa rikätsimantsik ishkë grupo puëdeq espïritukuna peleayänampaq kaqtam.

Bibliam willakun ichikllachöna Satanaswan demonionkuna manejaptin, gobiernokuna tröpankunata ëllïkur Diospa markanta ushakätsita tïrayänampaq kaqta. Y tsë guërrachömi, mëtsika millón mana alli nunakuna wanuyanqa chikeqninkunata Dios ushakätsiptin (Apocalipsis 19:11-18).

Bibliaqa nin Dios “alläpa ankupäkoq [llakipäkoq], mana ras piñakoq y alläpa kuyakoq” kanqantam, y tsënö këkarqa, ¿imanirtaq mëtsika millón nunakunata wanutsinqa? (Nehemías 9:17.) Imanir tsëta ruranampaq kaqta musyanapaqqa, alläpam precisan kima tapukïkunapa respuestanta musyanantsik: 1) ¿Pitaq tsë guërrata qallanqa? 2) ¿Imanirtaq Jehová tsë guërraman yëkunqa? 3) ¿Imaraq tsë guerra ushariptin pasanqa Patsawan y tsëchö täraq nunakunawan?

1. ¿PITAQ TSË GUËRRATA QALLANQA?

Armagedón nishqan guërrataqa manam Diostsu chiki karnin qallatsinqa. Tsëpa rantinqa, alli kaq nunakunata ushakätsita munayaptinmi Diosqa pëkunarëkur mana alli kaqkunata ushakätsinqa. Tsë guërrataqa qallatsiyan ‘jinantin nasionpita reycunam’, huk parlakïchöqa, entero Patsapita gobiernokunam. ¿Imanirtaq pëkuna qallayanqa? Porque Satanasmi Jehová Diospa sirweqninkunata paqwë mana llakiparnin ushakätsita munar, llapan gobiernokunata y tröpakunata utilizanqa (Apocalipsis 16:13, 14; 19:17, 18).

Kanan witsanqa imata pensayanqantapis nunakuna libre parlayänanta y religionkunapis libre kayänantam wakin nacionkunachöqa alläpa precisaqpaq churayan, tsëmi gobiernokuna religionkunata ushakätsita tïrayänampaq kaqta creiqa alläpa sasaraq. Tsënö kaptimpis, tsëqa pasashqanam pasaq watakunachö, y kanan witsampis wakin sitiokunachöqa pasakïkanmi. * Pero tsëkuna pasanqanwan  Armagedón imanö kanampaq kaqqa ishkë precisaq cösaskunachömi hukläya kayan. Puntataqa, Diospa chikeqninkunaqa entero Patsachömi guërrata rurayanqa. Ishkë kaqchönam, Jehoväqa imëpitapis masmi tsë guerra ruraqkunata ushakätsinqa (Jeremías 25:32, 33). Tsë guërrapaqmi Bibliaqa nin puëdeq Diospa “dia del juisiu[n]” kanqanta.

2. ¿IMANIRTAQ JEHOVÁ TSË GUËRRAMAN YËKUNQA?

Pï mëwampis alli apanakuyänampaq y chikeqninkunata kuyayänampaqmi Jehoväqa sirweqninkunata mañan (Miqueas 4:1-3; Mateo 5:43, 44; 26:52). Tsëmi paqwë ushakätsita munayaptimpis, Diosta sirweqkunaqa armakunata tsariyanqatsu defendekuyänampaq. Pëkunata salvananrëkur Dios tsë guërraman mana yëkurqa, mana kuyakoq, alli kaqta mana ruraq y poderninnaq Diosnöchi rikakunman. Tsëqa shutinchi respetashqatsu kanman. Tsëmi musyantsik pëqa ni imëpis markanta haqinampaq kaqta (Salmo 37:28, 29).

Diosqa pitapis mana wanutsita munarmi imata ruranampaq kaqta unëpitana willatsikushqa (2 Pedru 3:9). Palabran Bibliachömi pëqa atska kuti willamantsik chikeqninkuna markanta ushakäratsita munayaptin mana haqirinqanta (2 Reyes 19:35). Hina Bibliaqa willakunmi kanan witsampis Satanaswan makinchö këkaq nunakuna Diospa markanta ushakätsita munayaptin, poderninta utilizar kikinkunata ushakäratsinampaq kaqta. Awmi, Bibliaqa unëpitanam willakushqa llapan mana alli nunakunata Dios ushakätsinampaq kaqta (Proverbios 2:21, 22; 2 Tesalonicenses 1:6-9). Tsë tiempo chäramuptinqa, chikeqninkuna paqwëmi cuentata qokuriyanqa kikin alläpa puëdeq Dioswan peleëkäyanqanta (Ezequiel 38:21-23).

3. ¿IMARAQ TSË GUERRA USHARIPTIN PASANQA PATSAWAN Y TSËCHÖ TÄRAQ NUNAKUNAWAN?

Armagedón guërraqa kanqa mëtsika millón nunakuna mana ushakäyänampaqmi. Hinamampis, tsë guerra pasariptinllam Patsachö yamë kawakï qallëkunqa (Apocalipsis 21:3, 4).

Bibliapa ushanan kaq libronmi willakun ‘mana yupetapis puedipaq, mantsaquepaq alli shuyni nunacuna’ tsë guërrachö salvakuyänampaq kaqta (Apocalipsis 7:9, 14). Dios yanapaptinmi salvakushqa kaqkunaqa kë Patsata alläpa shumaq huertaman tikraratsiyanqa, Diosnintsik qallananchö munanqannö.

Pero ¿imëraq Diospa markanta ushakätsita munar guërrata qallëkayämunqa?

[Päginapa ura kuchunchö willakïkuna]

[6 kaq päginachö dibüju]

Unë witsanqa chikeqninkunata ushakätsirmi Jehoväqa markanta salvarqan

[7 kaq päginachö dibüju]

Armagedón guërrachöqa Jehová yapëmi markanta salvanqa