5. Patsata ushakëkätsiyanqan

“Tsaynöllam cay munduta mana allita rurarnin ushacätsigcunata, ushacatsinayquipag tiempu chamushgana.” (APOCALIPSIS 11:18, NTCN.)

● Nigeria nacionpa Kpor nishqan markanchö Pirri shutiyoq nunam palmërakunapita rurashqa vïnota rantikur kawaq, pero Níger shutiyoq mayuman petróleo ramakarninmi llapan palmërakunata malograrqan. Pëmi kënö nir llakikun: “Pescädokunatam wanutsin, qarantsiktam malogran y mayuntsikkunatam venenan. Y kananqa manam imanöpapis qellëta tarïta puëdëtsu”.

¿IMATATAQ RIKÄTSIKUN PASAKUNQANKUNA? Yachaq nunakunam niyan, hoqta millón pullantam llapan watakuna basürata lamarman hitayan. Tsë basürapa pullannin kaqqa plasticokunam kayan, y tsëkunaqa atska pachak watakunachöran ismur ushakäyan. Nunakunaqa manam kë Patsata rakchatäyanllatsu, sinöqa kawayänampaq kaqkunatapis tukïnöpam raslla ushakëkätsiyan. Estudiaqkunam niyan, nunakuna watachö mikuyanqanta y utilizäyanqanta Patsa yapë kutitsinampaqqa, chunka qanchis killataraq wananqanta. Tsëmi periódico australiano Sydney Morning Herald shutiyoq këta nirqan: “2035 watapaqqa ishkë Patsatam wanashun nunakuna más mirarnin más mikïta wanayaptinqa”.

WAKINKUNA NIYANQAN. Nunakunaqa yachaq karmi Patsata altsëta puëdeyan.

¿RASUMPAKU NIYANQAN? Patsa cuidaq nunakuna y wakin nunakuna tukïnöpa cuidayänampaq sinchikuyanqanrëkurmi, kananqa Patsa cuidëta yachakïkäyan. Tsënö kaptimpis, Patsataqa tukïnöpam más rakchatëkäyan.

¿IMA NINKITAQ? ¿Precisanraqku awnikunqannö Diosnintsik kë Patsata altsamunan?

Bibliaqa manam llakikïpaq kë pitsqan profecïakunallapaqtsu willakurqan, sinöqa kë ushanan hunaqchö alli rurëkuna kanampaqpis willakurqanmi. Hukllëllata rikärishun.

[8 kaq päginachö ninqan]

“Täranqä shumaq patsämi, kananqa tikrashqa wanutsikoq o ushakätsikoq basüraman.” (COMENTARIO DE ERIN TAMBER, RESIDENTE DE LA COSTA SUR DE ESTADOS UNIDOS, SOBRE LOS EFECTOS DEL DERRAME PETROLÍFERO DE 2010 EN EL GOLFO DE MÉXICO)

[8 kaq päginachö recuadru]

¿Diostsuraq culpayoq?

Kanan witsankuna imanö kawanapaq kaqta Biblia willakuptinku, ¿Diosmi hipar kawanapaq culpayoq nishwan? Këpita masta musyëta munarqa rikäri Rasumpëpaqa, ¿imatataq Biblia yachatsikun? libropa 11 kaq capïtulonta. Kë librotaqa Jehoväpa testïgonkunam rurayämushqa.

[8 kaq päginachö pikunapa kanqan]

U.S. Coast Guard foto