Diospa Palabrampita yachatsikïkuna

¿Pitaq Dios?

Kë yachatsikïmi yanapashunki wakin tapukïkunapa respuestanta Bibliëkichö tarinëkipaq, y tsë tapukïkunataqa itsa qampis rurakushqanki. Munaptikiqa, Jehoväpa testïgonkuna yanapariyäshunkimanmi këpita más yachakurinëkipaq.

1. ¿Pitaq Dios?

Diosqa llapan këkaqkunata kamaqmi. Bibliaqa willakun Diosqa imëpis kanqanta y ‘imayyagpis mana ushacag Rey’ kanqantam (Apocalipsis 15:3, NTCN). Pëmi kawënintsik qomashqantsik, tsëmi pëllata adoranantsik y servinantsik. (Lei Apocalipsis 4:11.)

2. ¿Imanötaq Dios?

Pëqa huk espïritum y Alläpa Puëdeqmi, hinamampis pëtaqa manam pipis ni imë rikashqatsu (Juan 1:18; 4:24). Pero pëtaqa reqita puëdentsikmi kamanqankunata rikarnin. Tukïläya frütakunata y wëtakunata ruranqanmi rikätsimantsik alläpa yachaq y kuyakoq kanqanta. Y ciëlopa mana ushakaq tamäñonnam rikätsimantsik alläpa poderyoq kanqanta. (Lei Romanos 1:20.)

Hina Bibliata leinqantsikpis yanapamantsikmi Diosta reqinapaq. Tsëchö yachakuntsik nunakunata kuyakïwan tratanqanta, imakuna kushitsinqanta, imakunata chikinqanta y imëka pasanqanta imanö rikanqanta. (Lei Salmo 103:7-10.)

3. ¿Shutin kanku?

Diospa shutin kanqantam Jesusqa willakurqan. Kënömi nirqan: “Sielucho quecaq Dios Yayalläcuna, jutillequi allapa respetuwan alabashqa catsun” (Mateo 6:9). Nunakunapa idiöman imanöpis kanqanmannömi tsë shutitaqa parlayan. Quechuachöqa Jehová nintsikmi y wakinkunanam Yavé niyan. (Lei Salmo 83:18 [82:19, wakin Bibliakunachö].)

Wakin traduciyanqan Bibliakunachöqa Diospa shutinta churayänampa rantinmi Señor o Dios nirlla churayashqa. Pero punta qellqayanqan Bibliachöqa qanchis waranqa kutipitapis masmi tsë shuti yurin. Jesuspis, Bibliapita yachatsikurnin Diospa shutinta parlarqanmi. Nunakuna Teytanta alli reqiyänantam pëqa munarqan. (Lei Juan 17:26.)

  4. ¿Yarpämantsiktsuraq Dios?

Awmi, y tsëtaqa rikätsikun mañakïnintsikta kikin wiyarmi (Salmo 65:2). Pero itsa kënö nir tapukunki: “Kuyëkämarnintsikqa, ¿imanirtaq imëka mana allikunapa pasanata haqin? Wakin nunakunaqa niyan probamänantsikrëkur Dios castigamanqantsiktam. Pero tsëqa manam rasuntsu. Job 34:12 textom kënö nin: “Diosqa manam mana alli kaqtaqa rurantsu”. Tsë ninqanwanmi rikätsimantsik, Diosqa ni pipaqpis mana allita mana ruranqanta. (Lei Santiagu 1:13.)

Jehoväqa kuyamarnintsikmi haqimarquntsik kawënintsikchö alli kaqta o mana alli kaqtapis kikintsik akranapaq. Tsëmi más alliqa kanman, kikintsikpita pëta servinqantsik (Josué 24:15). Pero pï më nunakunam mana alli kaqllata kawëninkunachö rurayan y tsënöpam imëka mana allikunapa pasayan. Pero Jehoväqa alläpam llakikun tsëkunata rikar. (Lei Génesis 6:5, 6.)

Diosqa ichikllachönam Jesus mana allikunata ushakäratsimunampaq ruranqa. Pero tsë kamayaqqa, manam ardëtsu imëka mana allikuna pasananta Jehová haqishqa. Huk revistanam yachatsikunqa Diosnintsik imanir haqinqanta. (Lei Isaías 11:4.)

5. ¿Imatataq noqantsikpita Dios shuyaran?

Jehoväqa kamamarquntsik pëta reqinapaq y kuyanapaqmi. Tsëmi pëpita rasun kaqta yachakunata munan (1 Timoteu 2:4). Bibliapita yachakunqantsikqa Jehoväman más witinapaq y amïgon kanapaqmi yanapamantsik. (Lei Proverbios 2:4, 5.)

Kawënintsik qomashqantsik këkaptinqa pipitapis masmi Diosta kuyanantsik. Kuyanqantsiktaqa rikätsikuntsik pëman mañakurnin y mandamanqantsikta wiyakurninmi (Proverbios 15:8). Y huk mandamientonqa nimantsik nuna mayintsikta kuyakïwan tratanapaqmi. (Lei Marcos 12:29-31 y 1 Juan 5:3.)

Más yachakïta munarqa, Rasumpëpaqa, ¿imatataq Biblia yachatsikun? libropa 1 kaq capïtulonta ashiri, kë librotaqa Jehoväpa testïgonkunam rurayämushqa.

[32 kaq päginachö dibüju]

Huk teytaqa manam ardëtsu wambran huk tiempo sufrinanta haqin