Diosman Witi

Jehoväqa nunakunapa alli shonquntam rikan

1 REYES 14:13

“LLAPAN nunakunapa shonquntam Jehoväqa rikëkan, y ima pensayanqantapis musyëkan” ninmi Bibliaqa (1 Crónicas 28:9). Kë versïculota leirqa, masmi agradecikuntsik Dios noqantsikta alläpa kuyamanqantsikpita. Hutsasapa këkashqapis, pëqa shonquntsikchö alli kaqtam ashin. Tsëtam rikätsikun Abías jövenpaq 1 Reyes 14:13 texto.

Familiankunaqa Jehoväta mana wiyakurmi mana alli ruraq kayarqan. Teytan rey Jeroboanqa wakin reykunanöllam Diospa contran churakarqan. * Tsëmi, llapan familiantawan ushakätsinampaq Dios kënö nirqan: “Imëka animalkunapa ismaninta pitsaq cuentam Jeroboanpa wayinchö llapan këkaqkunata ushakäratsishaq” (1 Reyes 14:10). Tsënö kaptimpis alläpa qeshyëkaq tsurin Abïastaqa Jehová ankuparqan o llakiparqanmi, y llapan familiampitapis pëlla shumaq pampakashqa kanampaqmi mandakurqan. * ¿Imanir? Porque “Jeroboanpa familiampitaqa, pëpa shonqunllam ichikllapis alli kashqa karqan Israelpa Diosnin Jehoväpaq” (1 Reyes 14:1, 12, 13). ¿Imatataq Abïaspita yachakuntsik kë textokunata leirnin?

Diosta sirveq nuna kanqantatsu manam Abïaspaqqa Biblia nin. Pero ‘pëpa shonqunlla ichikllapis Jehoväpaq alli kashqa kanqantam’ sïqa nin, itsachi Diospa adoracionninrëkur imallatapis alli kaqta rurashqa karqan. Rabïnokuna qellqayanqan textokunam rikätsikun, Abïasqa Jerusalenchö temploman itsa ëwarqan o Jerusalenman israelïtakuna mana ëwayänampaq guardiakunata teytan churanqanta itsa horqarqan.

Imanö kashqa kaptimpis, Abïaspa shonqunchö Jehová tarinqanqa alläpam välirqan. ¿Imanirtaq tsënö nintsik? Diospaq shonqun rasumpa kashqa kaptinmi. Tsëmi ‘pëpa shonqunlla’ alli kanqanta Biblia nin. Hinamampis pëqa ‘Jeroboanpa familiampitam’ karqan y tsë familiankunaqa alläpa mana alli ruraq nunakunam kayarqan. Tsëpaq parlarmi huk estudioso nuna kënö nirqan: “Mana alli ruraq familiapita këkarpis, alli shonquyoq nuna kanqanqa alläpa alabëpaqmi”. Y huknam nirqan, tsënö familiachö winashqa këkar Abdías alli nuna kanqanqa, imëka “más paqasyaptin ciëlochö estrëllakuna más chipapaqnöraq y raprannaq montikunapa chöpinchö cedrokuna moqllalläkïkaqnöraqchi claro rikakïkarqan”.

Tsënö karpis, 1 Reyes 14:13 textoqa yachatsimantsik Jehová alläpa alli kanqanta, y noqantsikchö alli kaqta pë ashinqantam. Kë textoqa nin, Abïaschö ‘alli kaqta’ tarinqantam. Itsa imallachöpis alli kanqanta tarinqanyaqchi Jehoväqa Abïaspa shonqunchö ashirqan. Huk yachaq nuna ninqannöpis, mana alli ruraq familiampitaqa, imëka “atska qoturëkaq rumi chöpinchö perlanömi” Abïasqa karqan. Mana alli ruraq familiankuna këkaptimpis kë nunapa shonqunchö alli kaqta tarinqantaqa Jehová alläpam kuyarqan; tsëchi ankuparqan o llakiparqan y shumaq pampakänampaq mandakurqan.

Alläpa kushikïpaqmi noqantsikchö alli kaq ruranqantsikta Jehová rikanqan, y imallachöpis pantarinqantsiktatsu manam ashin (Salmo 130:3). Diosnintsik noqantsikchö imallatapis alli kaqta ashinqanman pensarqa, pëman más wititam munantsik.

[Päginapa ura kuchunchö willakïkuna]