Jesuspa yachatsikïninkuna

Familiakuna shumaq kawakuyänampaq

¿Casakushqakuna imanö kawakuyänantataq Dios munan?

Casado këqa Diospitam shamun. Juezkunaman ëwëkur majankunapita rakikëpaq tapuyaptinmi Jesus kënö nirqan: “¿Manacu Diospa palabranta leyiyashqa cayanqui ‘que patsata camarnin, warmita ollquta camanqanta’? [...] ‘Tsemi, ollqu jaqirenqa mamanta yayanta warmiwan juntacäyänanpaq. Y ishcancunapis jucnollanam cayanqa’ nenqanta. Tsemi ishcaqnatsu cayan, sinoqa jucllellanam. Tseno captinmi, Dios juntashqantaqa mana pipis raquinmantsu”. Tsëta nirirmi yapë kënö nirqan: “Pipis warmin juc ollquwan mana yachecaptin jaqirir, juc warmiwan casacorqa jutsamanmi ishquirin” (Mateo 19:4-6, 9). Jesus tsënö ninqanta casakushqakuna wiyakur huknimpis huknimpis shumaq respetanakuyaptenqa, llapan familiam shumaq kawakuyan.

Familiakuna shumaq kawakuyänampaqqa, ¿imanirtaq Diosta kuyayänan precisan?

Jesusmi kënö nirqan: “‘Teyta Diosniquita cuyanqui llapan shonqiquiwan, llapan boluntaniquiwan y llapan yacheniquiwan.’ Que mandamientum mas presisaq llapan mandamientupitapis.” Tsëpitanam huknin precisaq mandamientopaq kënö nirqan: “Nuna mayiquita cuyanqui quiquiquitano” (Mateo 22:37-39). Tsëmi familiantsikkunawan shumaq kawakunapaqqa, Jehová Diosta kuyanantsik, pëta kuyarqa, nuna mayintsikkunatapis kuyashunmi. Y imëpis junto këkanqantsik nuna mayintsikkunaqa familiantsikkunam kayan.

 ¿Imanötaq casädokuna rikänakuyanman?

Casado ollquqa Jesuspitam yachakunman. Pëqa listom këkarqan nunakunarëkur wanunampaq (Efesios 5:25). Tsëmi huk kuti kënö nirqan: “Manam waquincag runacuna servimänanpagtsu shamushcä, sinöga waquincagta servinäpagmi” (Mateo 20:28, NTCN). Puëdeq këkarpis pëqa manam qateqninkunata llutatsu imatapis nirqan. Antis pëta yachanäyänantam munarqan (Mateo 11:28). Y tsënömi warmiyoq ollqukunapis kayänan.

Hina majayoq warmipis Jesuspita yachakunmanmi. Tsëmi Biblia kënö nin: “Diospa mandadunchomi Jesucristu quecan. [...] Y ollqu caqcunapa mandaduncunachonam warmicuna cayänan” (1 Corintios 11:3). Jesusqa Teytanta alläpam respetarqan, tsëmi mandädonchö këqa sasatsu o ajatsu karqan. “Pe gustanqantam noqaqa imatapis siempri rurä” nirqanmi (Juan 8:29). Tsëmi Diosta kuyaq y respetaq warmiqa, majampa mandädonchö kushishqa kawakun.

¿Imataraq Jesuspita yachakuyanman teytakuna y mamakuna?

Jesusqa wambrakunapaq tiempota tarirqanmi, hina imata pensayanqanta y llakishqa o kushishqa këkäyanqantapis alkäbum këkarqan. Huk kuti wambrakuna pëman ëwayänanta qateqninkuna michäyaptinmi, “noqaman wamracuna shayämutsun! Ama michäyëtsu” nirqan (Lucas 18:15, 16). Hina pëqa jövenkunapaqpis allitam parlarqan. Markäkurnin o yärakurnin Jesusta alabaq jovenkunapaqmi nunakuna mana allita parlëkäyarqan, tsëmi pëkunata piñaparnin Jesus kënö nirqan: “¿Qamcuna manacu leyishqa cayanqui Diospa palabrancho: ‘Llullu wamracunam y chichicaq wamracunam musyatsicuyan Diosta imano alabanan canqantapis’ nenqanta!” (Mateo 21:15, 16).

¿Imataraq Jesuspita wambrakuna yachakuyanman?

Jesusqa Diospa kaqtam alläpa kuyaq. 12 watayoqllaraq këkaptinmi teytankuna “Jesusta templucho taririyarqan, ley yachatsicoqcunapa chopincho pecunata wiyar, tapuparnin tëcaqta”. Y “alli yachaq car, tapuyanqancunata imano shumaq yasquiptinmi [contestaptinmi], wiyaqnin llapan nunacunapis espantacur, imano quetapis puediyarqantsu” (Lucas 2:42, 46, 47). Pero imëkata musyarpis Jesusqa manam yachaqtukurqantsu, antis teytantawan mamantaqa respetarqanmi, Biblia willakonqannöpis, pëkuna “mandayanqancunata rurarmi carqan” (Lucas 2:51).

Más yachakïta munarqa, Rasumpëpaqa, ¿imatataq Biblia yachatsikun? libropa 14 kaq capïtulonta rikäri. *

[Päginapa ura kuchunchö willakï]