Chunka watayoq këkaptïmi 1985 wata Columbus (Ohio, Estädus Unïdus) markachö escuëläman Camboya nacionpita wamrakuna chäyämurqan. Juk kaqqa, inglesta juk ishkë palabrakunata yachaqmi, y dibüjukunata rikätsimarmi, nacionninchö alläpa maqanakïkuna y wanutsinakïkuna kanqanchö kawayanqanta willamarqan. Pëkunaman yarparmi paqaskunapa waqaq kä. Patsa shumaqyänampaq kaqta y kawarimï kanampaq kaqtam pëkunata parlapëta munarqä, peru inglestaqa entiendiyaqtsu. Wamrallaraq karnimpis Jehoväpita yachatsinärëkurmi camboyano idiömata yachakunäpaq churakarqä. Tsënö karpis, manam alleqllaqa musyarqätsu tiempuwanqa yanapamänampaq kaqta.

Camboyano idiömata yachakïqa sasaran karqan. Ishkë kutim jaqirita munarqä, peru teytäkunatam Jehoväqa utilisarqan animayämänampaq. Tiempuwanqa profesornïkuna y estudiaq mayïkunam consejayämarqan juk alli profesionta estudianäpaq. Peru noqaqa precursor këtam munarqä, tsëmi ichik tiempulla trabajanapaq juk oficiuta estudiarqä. Mana estudianqa höraqa precursorkunawanmi yachatsikoq kä. Jina inglesta tsëraq yachakïkaqkunata yachatsirmi trabajaq kä, y tsënö ruranqäqa tiempuwanmi yanapamarqan.

16 watayoq këkarmi, Long Beach (California, Estädus Unïdus) markachö camboyanano idiömachö juk grüpu patsakärinqanta musyarirqä, tsëmi visitaq ëwarqä y tsë idiömata leyita yachakurqä. Estudiöta usharirmi precursor tikrarirqä, y wayïpa amänunchö täraq Camboya nacionpita nunakunatam yachatsirqä. 18 watayoq këkarmi Camboya nacionman ëwanäpaq pensëkarqäna. Tsë nacion peligrösu kaptimpis, alleqmi musyarqä tsëchö täraq nunakunaqa Diospa alli willakïninta manaraq musyayanqanta. Tsë witsanqa tsë nacionchö 13 publicadoryoq juk congregacionllam karqan. Tsëraq watukaq ëwarninqa 19 watayoqmi këkarqä y 21 watayoq këkarmi tsëman täraq ëwakurqä. Inglesta traduceqnö y yachatsikoqnömi ichik tiempu trabäjuta tarirqä. Tiempuwannam casakurirqä, y ishkäkunam yanapanakuyarqö atskaq camboyanukuna Diospa sirweqnin tikrayänampaq.

Jehoväqa ‘shonqö mañakunqankunatam’ qomashqa (Sal. 37:4). Nunakuna Diosta reqiyänampaq yanapakïnöqa manam ni imapis kantsu. 16 watakunanam Camboyachö tärä, y kananqa 12 congregacionkuna y chusku grüpukunam kan (Jason Blackwellmi willakun).