Leyeqkuna tapukuyanqan

2 Corintius 6:14 textuchö ‘mana creikoqkuna’ nirqa, ¿pikunapaqtan Pablu parlëkarqan?

2 Corintius 6:14 textuchömi kënö nin: “Ama mana creikoqkunawan juntakäyëtsu”. Tsë textupa puntanchö y qepanchö ninqanmi rikätsimantsik mana cristiänu kaqkunapaq Pablu parlëkanqanta. Mas kutichöpis “mana creikoq nunapaq” o “mana creikoqkunapaq” Pablu parlanqanmi rikätsikun, mana cristiänu kaqkunapaq parlëkanqanta.

Maslla musyarinapaq, cristiänu mayinkunatam Pablu corregirqan, cortiman o “¡mana creikoq nunakunapa puntanman!” chätsinakuyanqampita (1 Corintius 6:6). Tsëchö ‘mana creikoq nunakuna’ nirqa, Corintu cortichö trabajaq juezkunapaqmi parlëkarqan. Ishkë kaq cartanchönam Pabluqa nirqan, alläpa alli noticiakuna chipapanqanta mana rikäyänampaq, mana creikoqkunapa “pensëninkunata [Diablu] tsapashqa” kanqanta. Tsë nunakunaqa manam Jehoväta sirwita munayarqantsu, tsëmi qepan kaq versïculuchö Pablu kënö nirqan: “Pï nunapis Jehoväman kutiptinqa, tsë vëluqa ushakärinmi” (2 Corintius 3:16; 4:4).

Wakin mana creikoqkunaqa manam leykunata cäsukuyantsu o santukunatam adorayan (2 Corintius 6:15, 16). Tsënö kaptimpis, manam llapankunatsu Jehoväta sirweqkunapa contran këkäyan. Wakinkunaqa Bibliapitam masta yachakuyta munayan. Wakinkunanam cristiänu ollquwan o warmiwan casädu kayan, y pëkunawanmi juntu sïguita munayan (1 Corintius 7:12-14; 10:27; 14:22-25; 1 Pëdru 3:1, 2). Cristiänukunaqa ‘Señormanmi creikuyan’. Tsëmi Pablu ‘mana creikoqkuna’ nirqa, mana cristiänu kaqkunapaq masqa parlëkarqan (Hëchus 2:41; 5:14; 8:12, 13).

2 Corintius 6:14 ninqampita yachakunqantsikqa imëkachömi cristiänukunata yanapamantsik. Casakuyta munaqkunata consejarmi masqa tsëchö ninqampita parlapäyan (Mateu 19:4-6). Diosllatana sirwiyänampaq änikur bautizakoq cristiänukunaqa, yachaq kayanqanta rikätsikurmi mana creikoqkunawanqa casakuyantsu. Mana creikoqkunaqa, imanö portakuyanqanchö, imata rurëta munayanqanchö y imata creiyanqanchömi cristiänukunapita jukläya kayan.

Bibliapita yachakuykaqkuna, congregacionchö reunionman ëwaqkuna y manaraq bautizakushqa publicadorkunaqa, ¿mana creikoqku kayan? Manam. Alli noticiakunapita yachakuykaqkuna y bautizakuyänampaq kallpachakuykaqkunaqa, manam mana creikoqtsu kayan (Romänus 10:10; 2 Corintius 4:13). Bibliachömi willakun, manaraq bautizakurpis Corneliuqa “Diosta adoraq y respetaq” nuna kanqanta (Hëchus 10:2).

2 Corintius 6:14 textuchö Pablu pikunapaq parlëkanqanta cuentaman churashqaqa, ¿allitsuraq kanman mëqan cristiänupis manaraq bautizakushqa publicadorwan noviu kanqan o casakunqan? Manam. ¿Imanirtan tsëta nintsik? Cristiäna viudakunapaq Pablu kënö nishqa kaptinmi: “Piwampis munanqanwan casakunampaqmi libri këkan, peru Señorta sirweqllawan” (1 Corintius 7:39). Pablu ninqanman yarpëkurmi, kanan witsan cristiänukunatapis consejayan casakuyta munarqa, “Señorta sirweqllawan” casakuyänampaq.

¿Ima ninantan “Señorta sirweqllawan” ninanqa? Colosensis 4:7 textuchö Tïquicupaq parlarmi Pablu kënö nirqan: “Kuyë wawqï, confiakuypaq sirwipakoq y Señorpa kaqchö sirwipakoq mayï“.

¿Imanötan pï nunapis ‘Señorpa kaqchö sirwipakoq mayi’ tikran? Kikimpaq manana kawarnin y esclävukuna rurayanqanta rurarmi. Jesusmi kënö nirqan: “Pï nunapis qatimaqnï këta munarqa, amana kikimpaqqa kawatsunnatsu, sinöqa sufrimientu qerunta aparkur qepäta shamutsun” (Mateu 16:24). Pï nunapis Cristupa qateqnin kanampaq y Teyta Dios munanqannö kawanampaqqa, puntataqa Diosllatana sirwinampaqmi änikunan. Tsëpitanam Jehovä Diospa rikëninchö alli kanampaq y sirweqnin kanampaq bautizakunan. a Tsëmi “Señorta sirweqllawan” casakuyänampaq nirqa, alli cristiänu kanqanta rikätsikoqllawan o “Teyta Diospa y Señor Jesucristupa sirweqnin” kaqllawan casakuyänampaq nikan (Santiägu 1:1).

Jehoväpa testïgunkunawan Bibliapita yachakur Teyta Dios munanqanta ruranampaq kallpachakuykaq nunaqa allitam rurëkan. Tsënö kaptimpis, manam änikushqaraqtsu Jehovällatana sirwinampaq y imapa pasarpis pëta mana dejëpa sirwinampaq. Vïdanchö cambiukunata rurashqana karpis, manaraq casakuyman pensarmi Diosllatana sirwinampaq änikur bautizakunampaq mas cambiukunataraq ruranan.

Bibliapita yachakuykaq nuna Dios munanqanta ruranampaq kallpachakuykaqnö kaptinqa, ¿allitsuraq kanman bautizakuriptin casakunampaq mëqan cristiänupis pëwan noviu këta qallanqan? Manam. Bautizakuptinraq mëqan cristiänupis pëwan casakuyta munaptinqa, Bibliapita yachakuykaq nuna imanir bautizakuyta munanqanqa manam clärutsu kanqa.

Bautizakuyänampaq cambiukunata rurayänampaqmi, Bibliapita yachakuykaqkunaqa manaraq bautizakurnin juk tiempupa publicador kayan. Tsëmi Bibliachö “Señorta sirweqllawan” casakuyänampaq ninqanqa alläpa yanapakun. ¿Ima nishwanraq juk jövin o shipash casakunampaq edäyoqna kaptin, papäninkuna cristiänu kayaptin y atska watapana congregacionchö karpis, manaraq bautizakushqa publicadorllaraq kaptinqa? Tsënö kaptinqa, ¿imanirtan Jehovällatana sirwinampaq änikushqaraqtsu? ¿Imanirtan bautizakunampaq decidishqaraqtsu? ¿Imanirtan següruraqtsu këkan? Tsë jövin o shipash mana creikoq mana kaptimpis, manam ‘Señorta sirweq’ kanqantaqa nishwantsu.

Casakuy asuntupaq Pablu consejakunqanqa biennintsikpaqmi (Isaïas 48:17). Casakuyta pensëkaqkuna Jehoväta sirwiyaptinqa, casädu vïdankunachömi yanapanqa. Imanö portakuyänampaq kaqchö y imakunata rurayänampaq kaqchö igual pensayanqanmi kushishqa kawakuyänampaq yanapanqa. Manam tsëllatsu, “Señorta sirweqllawan” casakurqa, Jehoväta rasumpa kuyanqantsikta rikätsikurmi mana ushakaq bendicionkunata chaskishun. Tsëpaq parlarmi Bibliachöqa kënö nin: “Rasumpa kuyakoqkunataqa manam dejankitsu; allita ruraq nunataqa yanapëkankim” (Salmus 18:25).

[Nöta]

[Fotu]

“Rasumpa kuyakoqkunataqa manam dejankitsu; allita ruraq nunataqa yanapëkankim”