¿Imatatan yachakuntsik Diospa unë willakoqninkunapita?
Unë tiempuchöqa, ¿imanötan Teyta Dios nunakunata musyatsirqan imatapis rurëta munanqanta? Willakoqninkunawanmi. Y kanan tiempuntsikchöqa, ¿imatatan yachakuntsik Diospa kima willakoqninkuna niyanqampita? Tsëta yachakurishun.
DIOSPA WILLAKOQNIN ABRAHAN
Teyta Diosqa llapantsikta kuyamarnintsikmi alli kawakunantsikta munan.
Abrahantam Teyta Dios nirqan wamrankunarëkur entëru patsacho nunakunata bendicinampaq kaqta (Genesis 12:3).
Abrahanta Dios tsënö ninqampitaqa yachakuntsik, llapan wiyakoq nunakunata kuyarnin shumaq kawayänampaq yanapëta munanqantam.
DIOSPA WILLAKOQNIN MOISES
Kuyakoq karmi Diosqa pëta wiyakunapaq kallpachakunqantsikta rikan.
Diosmi Moisesta yanaparqan espantëpaq cösaskunata o milagrukunata ruranampaq. Tsënö karpis Moisesqa kënömi Diosman mañakurqan: “Imatapis imanö ruranqëkita musyëkatsimë, tsënöpa qamta mas reqinaqpaq y rikënikichö imëpis alli nuna kanäpaq” (Exodu 33:13). Moises tsënö mañakunqanta gustarmi Teyta Diosqa mas yachaq y pë imanö kanqanta reqinampaq yanaparqan. Tsëmi Moisesqa, Dios ankupäkoq y llakipäkoq kanqanta musyarqan (Exodu 34:6, 7).
Teyta Dios Moisesta tsënö yanapanqampitaqa yachakuntsik, pëta reqinapaq kallpachakushqaqa yanapamänapaq kaqtam. Y Palabran Bibliachömi nimantsik imanö adoranapaq kaqta, tsënö rurarqa yanapamänapaq kaqtapis nimantsikmi.
JESUSPITA IMATA YACHAKUNQANTSIK
Kuyakoq karninmi Jesusqa qeshyëkaq nunakunata kachakätsirqan.
Jesus yachatsikunqankunata wiyakushqaqa, Teyta Diosqa yanapamäshunmi.
Diospa Palabranchömi tarintsik Jesus imanö nuna kanqanta y imakunata yachatsikunqantapis. Diosnintsik yanapaptinmi wanushqakunata kawaritsirqan, wiskukunata, sordukunata, y cöjukunatapis kachakätsirqan. Jesus tsëkunata ruranqanwanmi Diosnintsik rikätsikurqan, ichikllachöna tsë llapankunata ruramunampaq kaqta. Y tsënö kawakuyta munarqa Juan 17:3 ninqantam ruranantsik, Teyta Diosta y Jesustam reqinantsik.
Jesusqa llakipäkoq, kuyakoq y yachanëpaqmi karqan, tsëmi ollqupis y warmipis kënö ninqanta wiyakuyaq: “Noqapita yachakuyë, porqui noqaqa yachanëpaq geniuyoq y qollmi shonqum kä, tsënö rurarqa, ankash këtam qamkunapaq tariyanki” (Mateu 11:29). Tsë tiempuchö warmikunata mana allipa rikäyaptimpis, Jesusqa kuyakoq karmi respëtuwan tratarqan.
¿Imatatan Jesuspita yachakuntsik? Jesusqa kuyakoq karmi nunakunata shumaq tratarqan. Tsënöllam noqantsikpis nuna mayintsikkunata tratanantsik.
JESUSQA MANAM DIOSTSU
Bibliachöqa manam nintsu Jesus Dios kanqanta, sinöqa Diospa willakoqnin kanqanllatam (1 Corintius 8:6). Kikin Jesusmi nirqan pëpita mas puëdeqqa Dioslla kanqanta y kë patsaman kachamushqa kanqanta (Juan 11:41, 42; 14:28). *
^ par. 17 Jesucristupita maslla yachakuyta munarqa, internetchö jw.org päginaman yëkur ashi La fe verdadera, la puerta a una vida feliz neq follëtupa 8 y 9 kaq yachatsikuyninkunata.
