QARANCHÖ YACHATSIKÏPITA | ¿IMANIRTAQ JESUSQA SUFRIRQAN Y WANURQAN?
¿Rasumpatsuraq pasakurqan?
Nazaretpita Jesustam 33 watachö wanutsiyarqan. Autoridäkunapa contran këkanqanta nirmi tumpayarqan, mana llakipashpam maqayarqan, qeruman clavarmi sufritsir wanutsiyarqan. Peru Diosqa kawaritsirqanmi y tsëpita chusku chunka junaqtam, ciëluta kutikurqan.
Kë precisaq willakïqa Mushoq Testamentu Mateu, Marcus, Lücas y Juan librukunachömi qellqarëkan. Peru ¿rasumpatsuraq pasakurqan? Kë tapukïpita rasumpa kaqta musyanantsikqa alläpam precisan, porqui cuentulla kaptinqa cristiänukunapa markäkïninkuna y shumaq huertachö imëyaqpis kawakïman creiyanqanqa ardëllachi kanman (1 Corintius 15:14). Peru, këkuna rasumpa kashqa kaptinqa, alläpa shumaq kawakïtam shuyarëkantsik. Tsëqa, Mushoq Testamentuchö Jesuspaq parlanqanqa, ¿rasumpatsuraq o cuentullatsuraq?
PASAKUNQANKUNAPITA WILLAKÏKUNA
Mateu, Marcus, Lücas y Juan librukunaqa alläpa jukläyam cuentu librukunapitaqa, porqui llapan pasanqantam willamantsik. Tantiyarinapaq, kanan witsan reqita puëdinqantsik sitiukunapaq y unë nunakunapaqwanmi jutipa jutipa willakun (Lücas 3:1, 2, 23).
Punta cristiänukunapa tiempunchö pasakunqankunata qellqaqkunapis Jesuspaqqa parlayanmi. * Y niyanmi Mateu, Marcus, Lücas y Juan librukunachö ninqanqa, tsë witsanchö romänukuna imanö wanutsiyanqanwan igualanqanta. Jinamampis, llapan pasakunqankunapaqmi rasumpa kaqllata parlan hasta apostolkuna imakunachö pantayanqantapis (Mateu 26:56; Lücas 22:24-26; Juan 18:10, 11). Kë llapanmi rikätsikun, Mateu, Marcus, Lücas y Juan librukunachö Jesuspaq parlanqanqa rasumpa kaqlla kanqanta.
¿RASUMPATSURAQ KAWARIMURQAN?
Jesus rasumpa kashqanta mëtsikaq creirnimpis, wakinqa manam kawarimunqanta creiyantsu. Hasta apostolninkunapis qallananllachöqa manam creiyarqantsu (Lücas 24:11). Pëkunawan wakin discïpulunkuna jukllëllapayan Jesusta kawarishqata rikärirmi creir qallëkuyarqan. Awmi, juk kutiqa pitsqa pachak nunakunam Jesus kawarishqanta rikäyarqan (1 Corintius 15:6).
Apostolkunaqa kallpata tsarirkur y kawëninkunatapis peligruman churarmi, llapan nunakunata, hasta Jesusta wanutseq kaqkunatapis pë kawarishqanta willakuyarqan (Hëchus 4:1-3, 10, 19, 20; 5:27-32). Jesus kawarinqan rasumpa mana këkaptinqa, ¿kawëninkunatapis peligruman churar ardë willakuyanmantsuraq karqan? Manam. Jinamampis, Jesus rasumpa kawarinqanta creiyanqanmi unë tiempuchö y kanan tiempuchöpis yanapakushqa mëtsikaq nunakuna Jesusman creiyänampaq.
Jesuspa kawëninta y kawarimïninta willakoq Mateu, Marcus, Lücas y Juan librukunaqa, alläpa markäkïpaqmi kayan. Porqui rasunllatam parlayan. Kë willakïkunata yachakurninqa cuentatam qokurinki tsëkuna rasumpa pasakunqanta. Peru mas següruqa kanki, tsëkuna imanir pasakunqanta kikiki alleq entiendirmi. Qateqninchömi tsëpaqqa maslla parlarishun.
^ par. 7 55 wata witsankuna yurikoq Täcitu jutiyoq nunam kënö qellqarqan: “Römachö Tiberiu jutiyoq mandakoq këkaptinmi, Ponciu Pilätu Cristuta wanuratsirqan, jina Cristu jutipitam [cristiänu] jutiqa shamun”. Jina tsë witsanchö pasakunqankunapaq qellqaqkunaqa Jesuspaqpis qellqayarqanmi, pëkunaqa kayarqan Römapita Suetoniu, Judëapita Josëfu y Bitinia nacionchö gobernaq Pliniu Jövin nishqampis.
