30 KAQ YACHAKUNËKIPAQ
¡Wanushqakunaqa kawariyämunqam!
Familiantsik o amïguntsik wanuptinqa alläpam llakikuntsik. Tsëmi Bibliachö nin wanuyqa chikimaqnintsik cuenta kanqanta (1 Corintius 15:26). Wanuyta Jehovä ushakätsinampaq kaqtam 27 kaq yachakunëkipaq kaqchö yachakurqunki. Peru wanukushqana kaqkunawanqa, ¿imatan pasanqa? Këchömi yachakunki mëtsika millon nunakuna kawariyämunampaq Jehovä änikunqanta. ¡Awmi! ¡Wanushqakunaqa kawariyämunqam! Peru ¿rasumpatsuraq kawariyämunqa? ¿Mëchötan kawariyämunqa? ¿Ciëluchöku o Patsachöku?
1 KAQ: ¿Jehoväqa munanku wanushqakuna kawariyämunanta?
Teytantsik Jehoväqa wanushqakuna kawariyämunanta alläpam munan. Tsëmi sirweqnin Jobqa ‘sepultürachö’ kaptimpis Jehovä mana qonqanampaq kaqta alli musyarqan. Tsëmi Jehoväta nirqan: “Qammi qayakamunki, y noqam contestashqëki” (leyi Job 14:13-15).
2 KAQ: ¿Imanötan musyantsik wanushqakuna kawayämunampaq kaqta?
Jesusqa Jehoväpa poderninwanmi 12 watayoq shipashta y juk viudapa wamranta Patsachö këkar kawaritsirqan (Marcus 5:41, 42; Lücas 7:12-15). Amïgun Läzarupis wanurqanmi, y chusku junaqna wanushqa këkaptin y pampashqana këkäyaptinmi Jesusqa kawaritsirqan. Jehoväman mañakurirmi Jesusqa fuertipa kënö nirqan: “¡Läzaru, yarqamuy!”. Tsënam “chakinkuna y makinkuna wankushqa yarqamurqan” (Juan 11:43, 44). Läzaru kawariramuptinqa familiankuna y amïgunkunaqa alläpachi kushikuyarqan.
3 KAQ: ¿Familiëkikuna y amïguykikuna kawariyämunqatsuraq?
Bibliachömi nin wanushqakuna kawayämunampaq kaqta (Hëchus 24:15). Jesusqa manam ciëluchöna këkaqtatsu nunakunata kawaritsimurqan (Juan 3:13). Tsë kawaritsinqan nunakunaqa Patsachömi kushishqa kawariyämurqan. Tsë nunakunata kawaritsinqannöllam Jesusqa ichikllachöna mëtsika millon nunakunata kawaritsimunqa shumaq Patsachö kushishqa imëyaqpis kawakuyänampaq. Jesusqa nirqan ‘sepultürachö llapan këkaqkuna’, o Teytantsik Jehovä yarparanqan kaqkuna kawayämunampaq kaqtam. Capazchi wakin wanushqakunataqa pipis yarpannatsu, peru Jehoväqa yarparëkanmi (Juan 5:28, 29, nöta).
MASLLA YACHAKUSHUN
Wanushqakuna kawayämunampaq kaqta Bibliachö willakunqan imanö cumplikänampaq kaqta, y tsëta musyanqantsik kushishqa kanapaq yanapamanqantsiktam yachakushun.
4 KAQ: Jesusqa wanushqakunatam kawaritsimurqan
Amïgun Läzaruta Jesus imanö kawaritsinqanta maslla musyarï. Leyiyë Juan 11:14 y 38-44 ima ninqanta y këkunapaq parlayë:
-
¿Imanirtan nintsik Läzaruqa rasumpa wanushqa kanqanta? (Rikäyë 39 kaq versïculuta).
-
Läzaru wanurir ciëluchö kushishqa këkaptinqa, ¿Patsaman Jesus kutitsimunmantsuraq karqan?
5 KAQ: ¡Mëtsikaq nunakunam kawariyämunqa!
Leyiyë Salmus 37:29 ima ninqanta y këpaq parlayë:
-
¿Mëchötan llapan kawarimoqkuna kawayanqa?
Jesusqa manam Jehoväta sirwishqa kaqkunallatatsu kawaritsimunqa, Jehoväta mana reqeq nunakunatapis mëtsikaqtam kawaritsimunqa. Leyiyë Hëchus 24:15 ima ninqanta y këpaq parlayë:
-
Wanushqakunata Jesus kawaritsimuptin, ¿pï kawamunantataq munanki?
Imanömi juk papä wamran punuykaptin shäritsin, tsënöllam Jesuspis wanushqakunata kawaritsimunqa.
6 KAQ: Wanushqakuna kawayämunampaq kaqqa alläpa kushikuypaqmi
Jairupa wamran kawarimunqanta Bibliachö leyiyanqanmi wanupakushqakuna mana alläpa llakikuyänampaq yanapashqa. Jairupa wamranta Jesus kawaritsinqanta musyanëkipaq leyiyë Lücas 8:40-42 y 49-56.
Jairupa wamranta manaraq kawatsirmi Jesusqa Jairuta nirqan: “Ama mantsakëtsu, qamqa markäkuylla o yärakuylla, pëqa kawanqam” (rikë 50 kaq versïculuta). Wanushqakuna kawayämunampaq kaqta Jehovä änikunqanqa, ¿imanötan yanapashunki...
-
... kuyashqa familiëki o amiguyki wanuptin?
-
... wanuyta mana mantsanëkipaq?
VIDEUTA rikäyë y këpaq parlayë:
-
Wanushqakuna kawayämunampaq kaqta musyayanqan. ¿Imanötan Phelicitypa papäninta y mamanta yanaparqan?
WAKIN IMA NIYANQAN: “Manam creïtsu wanushqakuna Patsachö kawayämunampaq kaqta”.
-
Qamqa, ¿ima ninkitan?
-
¿Bibliachö ima ninqantataq leyipärinkiman wanushqakuna Patsachö kawariyämunampaq kaqta yachatsinëkipaq?
KËTAM YACHAKURQUNKI
Mëtsikaq nunakuna kawariyämunampaq kaqtam Bibliachöqa willakun. Jehoväqa wanushqakuna kawayämunantam munan, y Jesusmi Jehoväpa poderninwan kawaritsimunqa.
¿Yarpankiku?
-
¿Imanirtan nintsik wanushqakuna kawariyämunanta Jehoväwan Jesus munayanqanta?
-
Kawarimoqkunaqa mëchötan kawayanqa, ¿ciëluchöku o Patsachöku? ¿Imanirtan tsëta ninki?
-
¿Creinkiku kuyashqa familiëkikuna o amïguykikuna kawayämunampaq kaqta?
MASTA YACHAKUY
Juk familiëki o amiguyki wanuptin mana alläpa llakikunëkipaq imata ruranëkipaq kaqta yachakuy.
“Pïnimpis wanukuptin llakikoqkunapaq consuëlu” (¡Musyatsikoq!, 3 kaq 2018)
Pipis kuyanqantsik wanuptin llakikushqa, ¿Bibliachö willakunqankuna yanapamashwantsuraq?
Juk wamrapa kuyashqa amïgan wanukuykuptin ima yanapanqanta rikë.
¿Pikunaraq manana kawariyämunqatsu? ¿Pikunaraq wanukur ciëluman ëwayan?
