Voluntänïkunapita ëkallatapis churakuyanqä qellëwanmi Testïgukunaqa a gastukunata pagakuyä. Reunionkunata rurayänä sitiukunachömi takshalla cajïtakuna kan pipis munaq kaq qellëninta tsëman churanampaq, y jw.org päginäkunachömi willakun juknöpapis churëta puëdinqantsikta. Pipis qellëninta churëta munaq kaqqa, kikinmi akrëta puëdin më tsëchö yanapakur gastayänampaq churëta, patsanchö gastukunapaq o ishkampaqpis churëta.

 Noqakunaqa manam ni pitapis ëkata churanampaq kaqta niyätsu, ni manam diezmuta mañakuyätsu (2 Corintius 9:7). Reunionnïkunaman shamoqkunatapis manam qellëta mañayätsu. Y reunionnïkunachö yachatsikoqkunapis manam pitapis cobrayantsu bautizayänampaq, pipis wanukuptin Bibliapita parlakarayämunampaq, pitapis casatsiyänampaq (casaratsiyänampaq) o maskunata rurayänampaq. Ni manam qellëta juntayänärëkur mikuyta o imatapis rantikuyätsu. Manam binguta, loteriata, feriata ni tsënö cösaskunata rurayätsu, ni nunakunata qellëta mañayätsu. Pipis kikin munar qellëninta churamuptinqa manam pï mëtatsu willayä ëkata churanqanta (Mateu 6:2-4). Y rantikoqkuna y negociuyoqkuna rantikuyänampaq willakuyta munayanqantaqa manam internet päginäkunaman churayätsu.

 Reunionkunata rurayänä localkunachömi llapankuna rikäyänanman cada killa juk documentuta churayä qellëta imachö gastayanqäta musyayänampaq. Y cada juk ishkë killatam llapan gastukunata revisayan llapampis alli kananta rikäyänampaq (2 Corintius 8:20, 21).

•   Qellë churana cajïtakunaman churar: Reunionkunata y asamblëakunata rurayänä sitiukunachömi ichikllan cajïtakuna kan pipis munaq kaq tsëman qellëninta o chëquita churanampaq.

•   Internetpa: Atska idiömakunachömi jw.org päginäkunachö kan “Jehoväpa testïgunkunata qellënikiwan yanapari” neq pägina. Tsëchömi tarjëta de crëdituwan, tarjëta de dëbituwan, ima bancupitapis cuentäkunaman internetllapa apatsimur o juknöpapis qellënikita churëta puëdinki. b Wakin Jehoväpa testïgunkunaqa, Bibliachö ninqannömi cada killa ‘ëkallatapis rakiyan’, y tsë päginachömi patsätsiyan tarjëtankunapita cada killa qellë kikinlla churakänampaq (1 Corintius 16:2).

•   Ima kapushunqëkiwampis: Wakin nacionkunachöqa, negociuyoq o emprësayoqkunataqa, qellëninkunawan yanapayämaptinmi autoridäkuna impuestuta alläpataqa cobrayannatsu, peru tsëpaqqa abogädukuna yanapayänantam wanayan. Jina wakinnam imankunawampis yanapakuyta munayan o wanukuyashqanchöna imankunapis Jehoväpa testïgunkunapaq quedananta munayan. Tsënö yanapakuyta munarqa Jehoväpa testïgunkunapa sucursalninman qayakuri, o qayarayämë këkunachö yanapayänaqpaq:

  •   Ima bancupitapis cuentäkunaman apatsimunëkipaq

  •   Jubilacion päguwan o ima següruwampis yanapakamunëkipaq

  •   Ima kapushunqëkiwampis yanapakamunëkipaq

  •   Ima emprësachöpis kapushunqëki capitalnikiwan o ima bönuwampis yanapakamunëkipaq

  •   Testamentuta rurar o pitapis poderta qornin yanapakamunëkipaq

 Juknöpa yanapakuyta munarqa, “Jehoväpa testïgunkunata qellënikiwan yanapari” neqman yëkuri.