Manam. Bibliachöqa manam nintsu qellëyoq kanqantsik mana alli kanqanta, y manam nintsu qellërëkur ima mana allipis pasanqanta. Nunakunam kënö niyan: “Qellëqa imëka mana allimanmi chätsikun”, y wakin nunakunaqa pensayan Bibliachö tsënö ninqantam. Peru manam tsënötsu. Bibliachöqa kënömi nin: “Qellëta kuyëqa imëka mana allikunamanmi chätsikun” (1 Timoteu 6:10).

•  Bibliachöqa, ¿ima nintan qellëpaq?

•  ¿Imanirtan qellëta kuyëqa allitsu?

•  ¿Imanötan yanapamantsik Bibliachö ninqanta cäsukunqantsik?

•  Qellë asuntupaq Bibliachö consëjukuna

 Bibliachömi willakun qellëta alli utilizashqaqa imëkachö yanapamanqantsikta (Eclesiastes 7:12). Kayäpunqankunata qarakoq y qellëninkunawan jukkunata yanapaq nunakunapaqpis allitam parlan (Proverbius 11:25).

 Peru yarpäshun, Bibliachö ninqannöpis qellëqa manam imapitapis mas väleqtsu kanan. Hebrëus 13:5 textuchömi kënö nin: “Ama vïdëkikunachö qellëta ashirlla kakuyëtsu, sinöqa kapuyäshunqëkillawan kushishqa kayë”. ¿Imatataq tsëpita yachakuntsik? Imëkachö yanapamashqapis, manam qellëtaqa imapitapis mas väleqpaqqa churanantsiktsu. Tsëmi mikunapaq y röpantsikpaq kaptin y wayintsik kaptinqa, tsëkunawan kushishqa kanantsik (1 Timoteu 6:8).

 Imatapis ërayëpa munaqkunaqa, manam imëyaqpis kawëta tariyanqatsu (Efesius 5:5). ¿Imanir? Juk kaq, imatapis ërayëpa munëqa santukunata adorënömi (Colosensis 3:5). Ishkë kaq, imatapis tariyänampaqmi imatapis ërayëpa munaqkunaqa, Teyta Dios mandakunqanta mana kaqpaq churayan. Tsëmi Proverbius 28:20 kënö nin: “Juklla rïcuyäreq nunataqa, imanöpa rïcuyanqantam taripuyanqa”. Imatapis ërayëpa munaqkunaqa, munayanqanta tariyänampaqmi höraqa pitapis engañayan, amenazäyan, qellëta mañakuyänampaq secuestrayan o wanutsiyan.

 Mana allikunata mana rurashqapis, qellëta kuyëqa imëka mana allikunamanmi chätsimashwan. Bibliachömi kënö nin: “Imëkanöpa rïcu këta munaqkunaqa, tentacionman y trampaman, y juiciunnaq y mana allita rurakoq munëkunamanmi ishkiyan” (1 Timoteu 6:9).

 Teyta Dios ninqanta cäsukur y qellërëkur mana allikunata mana rurarqa, manam imapitapis penqakushuntsu y imëpis allim sientikushun. Nimanqantsikta cuentaman churashqaqa, Teyta Diosqa këtam änimantsik: “Manam imëpis dejashqëkitsu ni qonqashqëkitsu” (Hebrëus 13:5, 6). Kënöpis nimantsikmi: “Imëpis allikunallata ruraq nunaqa bendiciontam chaskinqa” (Proverbius 28:20).