Bibliachö abortëpaq parlarqa, manam llullunkunata abortayänampaq imëkata rurayanqampaqtsu parlëkan. Tsënö kaptimpis, Bibliachö ninqanmi rikätsikun, Diospaqqa vïdantsik y manaraq yurishqa wamrakunapa vïdampis alläpa välinqanta.

 Vïdantsiktaqa Teyta Diosmi qaramanqantsik (Genesis 9:6; Salmus 36:9). Teyta Diospaqqa llapan kawëkaqkunapa vïdan y manaraq yureq wamrakunapa vïdampis alläpam välin. Tsëmi pï nunapis manaraq yureq wamrata wanutseqqa, asesïnuna tikrashqa.

 Israelïtakunata Teyta Dios entreganqan Leychömi kënö neq: “Ishkaq ollqukuna pelyëkarnin qeshyaq warmita chëkatsiyaptin manaraq tiempunchö llullun yuriptinqa, y llullun ni mamampis mana wanuptinqa, warmita chätseq kaqmi warmipa qowan o runan mañanqanta y juezkuna churayanqan chaninta pagakunan. Peru maman o llullun wanuptinqa, wanutseqnin nunatapis wanutsiyänëkim” (Exodu 21:22, 23). a

•  ¿Imëtan juk nuna kawar qallan?

•  ¿Teyta Diosqa perdonanku wamranta abortashqa kaqkunata?

•  Mamampa o wamrapa vïdan peligruchö kaptinqa, ¿mana alliku abortë kanman?

 Juk warmi qeshyaq tikranqampitam, pachanchö llulluqa Teyta Diospaqqa juk nunana. Palabran Bibliachö mamampa pachanllachöraq këkaq wamrapaq parlarqa, Teyta Diosqa nunapaqnönam parlan. Mamampa pachanllachöraq këkaq wamra y tsëllaraq yuririshqa wamra, Teyta Diospaq igual-lla kayanqampita masllata yachakurishun.

•   Santu espïritunwan yanapaptinmi, gobernanti Davidqa Teyta Diosta kënö nirqan: “Mamänïpa pachanchö formakar qallëkanqäta rikämurqëkim” (Salmus 139:16). Tsëmi rikätsikun, Davidqa manaraq yurirpis Diospaqqa nunana kanqanta.

•   Juk maspita yachakurishun. Willakoqnin Jeremïas manaraq yuriptinmi Teyta Diosqa decidishqana karqan imata ruranampaq kaqta. Kënömi nirqan: “Mamëkipa pachanchö manaraq kamarnikim qamtaqa reqirqaqna, y manaraq yuriptikim mëtsë nacionkunachö willakoqnï kanëkipaq akrarqaq” (Jeremïas 1:5).

•   Bibliata qellqaq doctor Lücasqa, manaraq yureq wamrapaq y tsëllaraq yurishqa wamrapaq parlarmi griëgu idiömachö tsë palabrallata utilizarqan (Lücas 1:41; 2:12, 16).

 Awmi, Teyta Diosqa perdonanmanmi wamrankunata abortashqa kaqkunata. Teyta Diospaq vïdantsik alläpa välinqanta entiendirqa, manam abortayanqampita alläpaqa llakikuyänantsu. Bibliachömi kënö nin: ‘Teyta Jehoväqa llakipäkoq, pacienciakoq y alläpa kuyakoqmi [...]. Imanömi inti o rupay yarqamunan lädupita, jeqanan lädu alläpa karuchö këkan, tsënöllam Teyta Diosqa jutsantsiktapis karuman churan’ (Salmus 103:8-12). b Llapan shonqunkunawan rasumpa arrepentikuyaptinqa Jehoväqa jutsankunata perdonanmi, abortashqa kayaptimpis (Salmus 86:5).

 Bibliachömi willakun manaraq yureq wamrapa vïdanqa alläpa välinqanta, tsëmi mamampa o manaraq yureq wamrapa vïdan peligruchö kaptimpis, abortayanqanqa allitsu kanman.

 ¿Imaraq pasanman wamra yurinampaqna këkaptin, imapis pasaptin wamrallata o mamanllata salvayänampaq decidiyänan kaptinqa? Tsënö cäsukunaqa manam seguïdutsu pasan. Peru tsënö pasaptinqa, tsë familiachö kaqkunam decidiyänan mëqanta salvayänampaq kaqta.