Qʼaxinaq chi jun tiempo, are chiʼ ri israelitas kʼa e kʼo na pa ri chaqiʼj ulew , Coré, Datán, Abiram kukʼ nikʼaj chi 250 achijabʼ xewalij chrij Moisés. Xkibʼij chke: «¡Xkʼistaj qakʼuʼx chiwe! ¿Jas che at ri kʼamal qabʼe? Xuqujeʼ ¿jasche are Aarón ri kinimal ri ajkojol tabʼal toqʼobʼ? Xaq xiw ta awukʼ at xuqujeʼ rukʼ Aarón kʼo wi Jehová, xuqujeʼ qukʼ oj qonojel». Jehová utz ta xrilo che xkibʼij wariʼ, xunaʼ che chrij areʼ tajin kewalij wi.

Moisés xubʼij che Coré xuqujeʼ ri winaq e kʼo rukʼ: «Chixpet chweʼq pa ri tabernáculo xuqujeʼ chikʼamaʼ lo ri ibraserillos nojinaq che incienso. Rech Jehová kukʼut chqawach jachin uchaʼom».

Chukabʼ qʼij, Coré kukʼ ri 250 achijabʼ xkimulij kibʼ rukʼ Moisés pa ri tabernáculo. Chilaʼ xkiporoj wi incienso je taneʼ che e ajkojol tabʼal toqʼobʼ. Tekʼuriʼ Jehová xubʼij che Moisés xuqujeʼ ri Aarón: «Chitasaʼ iwibʼ chke ri Coré xuqujeʼ ri achijabʼ che e kʼo rukʼ».

Coré xbʼe pa ri tabernáculo jachiʼ kʼo wi Moisés, are kʼu Datán, Abiram xuqujeʼ ri ufamilia xkaj taj xebʼek. Jehová xubʼij chke ri israelitas: «Chitasaʼ iwibʼ che ri kachoch Coré, Datán xuqujeʼ  Abiram». Ri israelitas aninaq xkitas kibʼ. Datán, Abiram xuqujeʼ ri kifamilias xekanaj kan cho ri kachoch. Xaq kʼateʼ, ri ulew xujaq ribʼ xeʼubʼiqʼ bʼi ri itzel taq winaq. E pa ri tabernáculo, jun qʼaqʼ xqaj lo pa ri kaj xusachisaj kiwach ri Coré kukʼ ri 250 achijabʼ.

Tekʼuriʼ, Jehová xubʼij che Moisés: «Konojel ri kʼamal taq bʼe re konojel tribus kkikʼam lo ri kichʼamiʼy. Kkitzʼibʼaj ri kibʼiʼ ri ajkʼamal bʼe che ri kichʼamiʼy. Are kʼu ri re ri tribu re Leví, kutzʼibʼaj ri ubʼiʼ Aarón. Chayaʼ kan ronojel ri chʼamiʼy pa ri tabernáculo. Che ri uchʼamiʼy ri winaq che in kinchaʼ, kel lo kotzʼiʼj».

Chukabʼ qʼij, Moisés xresaj konojel ri e chʼamiʼy rech xukʼut chkiwach ri e kʼamal taq bʼe. Che ri uchʼamiʼy ri Aarón tajin kkʼiy lo kotzʼiʼj xuqujeʼ kʼo almendras che e chaqʼ chik. Rukʼ waʼ Jehová qas xukʼutu che are Aarón uchaʼom rech kux kinimal ri ajkojol tabʼal toqʼobʼ.