RI WINAQ che e kʼo ta chupam ri nimalaj jukubʼ, kexibʼin ta kibʼ che ri nimalaj jabʼ che xbʼix chike che kpe na. Xkekoj täj che qas kpe na ri nimalaj jabʼ. Sibʼalaj xetzeʼnik. Tekʼuriʼ naj ta che wariʼ (xa joʼtaj che) xetzeʼn ta chik.

Tekʼuriʼ xaq xpe jun jabʼ. Xtzaq lo jaʼ pa ri kaj junam rukʼ chiʼ kqatix bʼi jaʼ che kʼo pa jun kʼolbʼal. ¡Qastzij xubʼij ri Noé! Tekʼuriʼ kʼot chi jun xkunik xok pa ri nimalaj jukubʼ. Ri Ajawaxel Jehová utzʼapim chi ri uchiʼ ri nimalaj jukubʼ.

Tekʼuriʼ ri jaʼ chanim xuchʼuq ri Ulew. Ri jaʼ xubʼan junam rukʼ e nimäq täq uwäch jaʼ. Xuqasaj ri täq cheʼ xuqujeʼ xuselebʼisaj nimäq täq abʼäj wariʼ sibʼalaj xetinlajik chiʼ xetzaq bʼik. Ri winaq xkixeʼj kibʼ. Xepaqi puwiʼ nimäq täq juyubʼ (jïbʼ). ¡Ay, sibʼalaj xkaj waʼ wet xkita ri Noé, xuqujeʼ xeʼok rukʼ pa ri nimalaj jukubʼ chiʼ majaʼ ktzʼapix uchiʼ! Tekʼuriʼ nijun chik xkunik xokik.

Ri jaʼ xkʼiyik, xkʼiyik. Pa kawinaq o 40 qʼij xuqujeʼ kawinaq aqʼabʼ xubʼan jabʼ. Ri jaʼ xel bʼi puwiʼ ri täq juyubʼ, xuqujeʼ naj täj xubʼano chiʼ xuchʼuq ri nimäq täq juyubʼ. Junam rukʼ xubʼij ri Ajawaxel, konojel ri täq winaq xuqujeʼ chiköp ri e kʼot pa ri nimalaj jukubʼ xekamïk. Are kʼu waʼ chin täq e kʼo chupam wariʼ, xekʼaseʼ kanoq.

Ri Noé rukʼ täq ralkʼwal xkebʼan jun utzalaj kichak chiʼ xkebʼan ri nimalaj jukubʼ. Ri jaʼ xukʼam bʼi ri nimalaj jukubʼ, rumal waʼ, xkʼejeʼ kan puwiʼ. Tekʼuriʼ chiʼ jun qʼij kʼot chi jabʼ, xkaʼy ri Qʼij. ¡Jun nimalaj kaʼybʼal! Xiw kʼo jun nimalaj jaʼ puwiʼ ronojel ruwäch Ulew. Xiw kojkunik kqil ri nimalaj jukubʼ kʼo puwiʼ ri nimalaj jaʼ.

Kʼot chi ri itzel täq achijabʼ nim kiqan. Kepe ta chi na che ubʼanik kʼäx chike ri winaq. Konojel xekamïk, junam kukʼ täq kinan xuqujeʼ ri itzel täq winaq. ¿Su xkiriq ri täq kitat?

Ri täq kitat ri itzel täq achijabʼ nim kiqan, e junam ta qukʼ öj, xa e ángeles xeqaj lo cho ruwäch Ulew che xekebʼan winaq che kibʼ. Rumal laʼ chiʼ xpe ri nimalaj jabʼ, wariʼ xekam täj junam rukʼ konojel ri winaq. Wariʼ xkeya kan ri kibʼaqil cho ruwäch ulew, tekʼuriʼ xetzalij pa ri kaj. Tekʼuriʼ chiʼ xeʼopanik xyaʼ ta chike xekʼejeʼ che kixoʼl ri nikʼaj chik täq ángeles rech ri Ajawaxel. Xkebʼan uʼangeles ri Satanás. Chupam ri Loqʼalaj Pixabʼ wa täq ángeles riʼ kbʼix itzel täq uxlabʼal (demonios) chike.

Tekʼuriʼ ri Ajawaxel xubʼano che xpe jun kaqiqʼ, o tew tekʼuriʼ ri uwäch Ulew xmajtaj uchqejxik. Qʼaxnaq chi jobʼ ikʼ ri nimalaj jukubʼ xtakʼe (xchkeʼ kan) puwiʼ jun juyubʼ. Xqʼax kʼi täq qʼij, ri winaq e kʼo chupam xekunik xkil saq xuqujeʼ xkil uwiʼ jun juyubʼ. Ri täq jaʼ tijan uchqejxik uchqejxik.

Tekʼuriʼ ri Noé xresaj bʼi jun tzʼikïn qʼeq rij ubʼiʼ joj (cuervo). Wariʼ xrapanik tekʼuriʼ xtzalajik rumal che kʼot ni xtakʼeʼ wi. Xubʼan wariʼ kʼi täq mul, xuqujeʼ chiʼ ktzalajik kkanaj kan puwiʼ ri nimalaj jukubʼ.

Are kʼu ri Noé kraj krilo la xchaqij ri Ulew, tekʼuriʼ xresaj lo jun palomax chupam ri nimalaj jukubʼ. Wariʼ xtzalijik rumal che kʼot ni xtakʼeʼ wi. Ri Noé xutaq chi bʼi che ukamul, areʼ xtzalij rukʼ jun uxaq cheʼ ubʼiʼ olivo pa utzaʼm. Kʼisbʼal re Noé xutaq bʼi che rox mul ri palomax tekʼuriʼ wariʼ xuriq jun kʼolbʼal chaqiʼj che xkunik xubʼan rachoch.

Tekʼuriʼ ri Ajawaxel xuchʼabʼej ri Noé, xubʼij che: ‹Chixel loq pa ri nimalaj jukubʼ ri at xuqujeʼ ri afamilia xuqujeʼ konojel chiköp›. Jun junabʼ xekʼejeʼ chupam ri nimalaj jukubʼ. ¡Chachomaj (chachʼabʼsaj) waʼ sibʼalaj xekikotik che e kʼo chi jumul (jiyak chik) puwiʼ ri ulew xuqujeʼ e kʼaslik!