Juan escribishgan 21:1-25
21 Chaypitana, Tiberíades lamarpa cantuncho discipuluncunata Jesús yapay yuripargan.* Caynomi pasargan.
2 Chaycho carcaycargan Simón Pedro, Milïshu nishgan Tomás, Galileacho caycaj Caná marcapita Natanael, Zebedeupa churincuna y ishcay discipulucunapis.
3 Simón Pedro nirgan: “Pescaj aywä”. Y waquincunapis “acu aywashun” nipäcurgan. Chaymi barcuman wicharcur aywapäcurgan, ichanga chay chacay warayta pescarpis manami ni juclaylatapis charipäcurganchu.
4 Pacha* wararcuptinna lamar cantuncho Jesús caycargan, pero discipuluncuna cuentata gocärirganchu pay cashganta.
5 Chauraga Jesús nirgan: “Wamraläcuna, juc pescadulapis mana canchu micupäcunayquipaj ¿au?”. “Manami” nipäcurgan.
6 Payna nirgan: “Barcupa derechan caj ladupa redniquita mashtapäcuy imalatapis charipäcunayquipaj”. Nishganno rurapäcuptin, chaychica pescaducunata charir redta chutaylatapis puedipäcurganchu.
7 Chauraga Jesús cuyashgan discípulo Pedruta nirgan: “¡Señorninchimi!”. Chayta wiyarcur Simón Pedro walca ropalawan* caycar, ropanta jaticuycur lamarman jegarpurgan.
8 Pero waquin discipulucunaga tacsha barcuwan aywapäcurgan rednincho chaychica pescaducunata garachashga. Cantunman chayanapäga 90 metrunomi caycargan, manami caruchu cargan.
9 Cantuman chayaycärirna nina rataraycajta ricapäcurgan, tantata y shansha janancho churaraycaj pescadutapis.
10 Jesusna nirgan: “Pescapäcushgayquipita juc ishcaylatapis apapäcamuy”.
11 Chaymi Simón Pedro, barcuman cutircur redcho juntaraycaj jatusaj pescaducunata apamurgan garachaypa. 153 pescaducuna captinpis chay redga manami rachicarganchu.
12 Jesús nirgan: “Micoj shapäcamuy”. Musyapäcurganmi Señor Jesús cashganta, chaymi maygalanpis “¿pitaj canqui?” nir tapurganchu.
13 Jesús witircur tantata aptarcur paycunata garargan, chaynolami pescaduwanpis rurargan.
14 Wanushgacunapita cawarircamur quimsa cutipana discipuluncunata Jesús yuripargan.
15 Micuyta ushapäcuptinna, Simón Pedruta Jesús cayno tapurgan: “Juanpa churin Simón, ¿caycunapita nogatachu más cuyamanqui?”. Payna nirgan: “Aumi, cuyashgätaga musyanquimi Señor”. Chauraga Jesús nirgan: “Uyshaläcunata micuchiy”.
16 Yapay cayno tapurgan: “Juanpa churin Simón, ¿cuyamanquichu?”. Pedruna nirgan: “Aumi, cuyashgätaga musyanquimi Señor”. Jesusna nirgan: “Uyshaläcunata michiy”.
17 Quimsa cutipana tapur cayno nirgan: “Juanpa churin Simón, ¿cuyamanquichu?”. Chayno quimsa cuti “¿cuyamanquichu?” nir tapuptinmi Pedruga laquishga cayno nirgan: “Gamga lapantami musyanqui Señor, cuyashgätapis musyayculanquimi”. Chauraga Jesús cayno nirgan: “Uyshaläcunata micuchiy.
18 Rasunpami gamta në, mozularaj caycarga quiquiquimi visticoj canqui y munashgayquipami aywacoj canqui. Auquinyaptiquimi ichanga maquiquicunata jogarcunqui juc vistishunayquipaj y aywayta mana munashgayquipami apashunquipaj”.
19 Chaytaga nirgan Pedro imano wanunanpaj y wanuyninwan Diosta alabananpaj. Nircur caytapis Jesús nirgan: “Jinala gatirämay”.
20 Chaypitana Pedro ticraycur ricargan guepancunata Jesús cuyashgan discípulo shamuycajta. Paymi cenata micurcaycaptin Jesuspa pechunman chachacuycur “Señor, ¿pitaj traiciunashunqui?” nir tapurgan.
21 Ricaycurna Pedruga Jesusta tapurgan: “Señor, ¿paytaga imataj pasanga?”.
22 Jesusna nirgan: “Chayamushgäcama caycho quedacunanta munaptëga, ¿gamta imata gocushunqui? Gamga jinala gatirämay”.
23 Chaypitami Jesuspa gatirajnincuna wilanacärirgan chay discípulo mana wanunanpaj cajta yarpar. Pero Jesusga manami nirganchu pay mana wanunanpaj, caytami nirgan: “Chayamushgäcama caycho quedacunanta munaptëga, ¿gamta imata gocushunqui?”.
24 Chay discipulumi caycunapita wilacushga y escribishgapis, wilacushgancuna rasunpa cashganta musyanchimi.
25 Aumi, caycanrämi Jesús rurashganpita masraj wilacunapaj. Imaylapis rollucunacho lapan escribicaptenga cay mundo manachi aypanmanchu.
