Juan escribishgan 2:1-25
2 Quimsa junajtana Galileacho caycaj Caná marcacho casaracuy fiesta cargan, chaychomi Jesuspa mamanpis caycargan.
2 Chay casaracuy fiestamanga Jesustapis discipuluncunatawan invitapäcurgan.
3 Vino ushacaycaptinna Jesusta maman nirgan: “Vino cannachu”.
4 Jesusna nirgan: “¿Gamta y nogatapis imata gocamanchi? Horä manami chayamunrächu”.
5 Chaymi sirviycajcunata maman nirgan: “Lapan nishushgayquicunata rurapäcuy”.
6 Chaycho caycargan rumipita rurashga yacupaj sojta urpucuna,* chayga cargan judiucuna manaraj micur maquincunata maylacärinanpaj costumbrincuna cashganno. Urpucunamanga jucnin jucninmanmi yaycoj 44 o 66 litrucunano.*
7 Jesús nirgan: “Chay urpucunaman yacuta winapäcuy”. Y juntajpaj winapäcurgan.
8 Caytapis nirgan: “Cananga ichiclata chagarcur mayor sirvientiman apapäcuy”. Paycunaga mandashgannola rurapäcurgan.
9 Chauraga mayor sirviente yacupita rurashga vinuta yawarcurgan,* payga musyarganchu maypita apapämushganta (ichanga sirvejcuna chayta musyapäcurgan). Nircur casaracuycaj runata gayarcamur
10 cayno nirgan: “Pï maypis alinnin caj vinutami puntata sirvipacun, y runacuna shincashgana caycaptinmi mana alinnin caj vinuta sirvimun. Pero gamga canancamami alinnin caj vinuta churarächishcanqui”.
11 Chay punta caj milagrutaga Galileacho caycaj Caná marcachomi Jesús rurargan. Chaycho podernin ricacämuptin discipuluncuna payman yaracärirgan.
12 Chaypitanami Capernaúm marcaman urargan mamanwan, wauguincunawan y discipuluncunawan, pero chaychoga ishcay quimsa junajcunalami quedacurgan.
13 Judiucunapa Pascua fiestanpaj ichiclana pishiycaptin, Jerusalenman Jesús wichargan.
14 Templucho tarirgan wäcacunata, uyshacunata y palumacunata runacuna ranticurcaycajta, chaychopis jamarpaycargan guellayta trucachejcuna.
15 Chaymi latiguta rurarcur lapan runacunata uyshantinta wäcantinta gargurgan. Guellayta trucachejcunapa mesanta jitarir, guellaynincunatapis mashtar ushargan.
16 Palumata ranticojcunatapis nirgan: “¡Caypitaga lapanta jorgupäcuy! ¡Taytäpa wasinta juc mercaduman ama ticrachipäcuychu!”.
17 Chayta wiyarcur discipuluncuna yarpapäcurgan cayno escribishga caycashganta: “Wasiquita cuyashpämi shongö nina rupajnöraj rupanga”.
18 Chaycunata ricaycur judiucuna tapupargan: “¿Caycunata ruranayquipaj autoridäyoj caycarga ima milagrutataj ricachipäcamanqui?”.
19 Jesús nirgan: “Cay templuta juchuchipäcuy y quimsa junajlachomi sharcachishaj”.
20 Chaymi judiucuna nirgan: “Cay templuta 46 watataraj sharcachipäcushga, ¿y gam quimsa junajlacho sharcachinqui?”.
21 Pero templupaj parlarga cuerpunpämi parlaycargan.
22 Wanushganpita Jesús cawarircamuptinmi, discipuluncuna yarpapäcurgan pay cada cadala chayno nishganta, chaymi Diospa palabran nishganman y Jesús ima nishganmanpis creipäcurgan.
23 Pascua fiestapaj Jerusalencho Jesús caycaptinmi achca runacuna rurashgan milagruta ricar jutinman yaracärirgan.
24 Pero Jesusga lapan runacunata reguishpan paycunaman confiacojchu,
25 y necesitajchu runa imano cashganpita pipis wilapänanta, payga musyajmi runapa shonguncho ima cashgantapis.
