Juan escribishgan 13:1-38
13 Chaypitana Pascua fiesta manaraj galaycuptin, Jesusga musyarganna cay mundupita aywacur Papäninman cutinanpaj hora chayamushganta. Chaymi cay munducho caycaj gatirajnincunata cuyashpan ultimucama pasaypa cuyargan.
2 Cenarcaycaptinmi, Simonpa churin Judas Iscariotipa shongunman mayna Diabluga yarpayta churargan Jesusta traiciunananpaj.
3 Chaymi Jesusga paypa maquinman imaycatapis Taytan cachapashganta musyar, jina Diospita shamushganta y Diosman cutinanpaj cajta musyar,
4 mesapita sharcurcur, janan caj ropanta juc laduman churarcur y juc toallata aptarcur cheglanman watacuycurgan.
5 Nircur lavatoriuman yacuta winarcur* discipuluncunapa chaquincunata maylapargan y cheglancho wataraycaj toallawan chaquichipargan.
6 Simón Pedrupa chaquincunata maylananpäna caycar, payga Jesusta cayno tapurgan: “Señor, ¿gamchu chaquëcunata maylapämanqui?”.
7 Jesús cayno nirgan: “Canan ruraycashgätaga tantianquirächu, nircurmi ichanga tantianquipäna”.
8 Pedro nirgan: “Chaquëcunataga manami imaypis maylapämanquipächu”. Jesusna nirgan: “Chaquiquita mana maylapaptëga discipulö manami canquichu”.
9 Nircur Simón Pedro cayno nirgan: “Señor, chauraga ama chaquëcunalataga maylapämaychu, maquëcunatapis umätapis maylapaycalämay”.
10 Jesusna cayno nirgan: “Bañacojga limpiumi caycan, chaquincunalatami maylacunan. Gamcunaga limpiumi caycanqui, ichanga jucniquega mana”.
11 Payga musyarganmi pï traiciunananpaj, chaymi “jucniquega manami limpiuchu caycan” nirgan.
12 Chauraga chaquincunata maylapaycurna, janan caj ropantapis jaticurcur y mesaman yapay jamacurcur cayno nirgan: “¿Tantiapäcunquichu ima rurashgäta?
13 Gamcuna nipäcamanqui Maestro y Señor, chayno nipäcamashgayquega rasunpami caycan.
14 Señor caycashpä, Maestro caycashpäpis chaquiquicunata maylapashcä, chauraga gamcunapis chaquiquicunata jucniqui jucniqui maylapänacäriy.
15 Ricapäcushcanquimi rurapashgäcunata, chaynola gamcunapis rurapäcunayquipaj.
16 Rasunpami niycä, juc ashmayga* manami patrunninpita maschu caycan, ni mandamushga cajpis manami mandacojninpita maschu caycan.
17 Canan chayta musyaycar casucärishpayquega cushi cushilami capäcunquipaj.
18 Manami lapayquicunapitachu parlaycä. Acrashgäcunataga reguëmi, ichanga caycuna pasashga Diospa palabran cayno nishgan cumplicänanpaj: ‘Tantäpita micoj cajmi conträcho ticracurishga’.
19 Manaraj pasaptinmi caytaga cananlapitana niycä, chaycuna pasaptenga gamcuna creipäcunayquipaj Diospa palabran nogapaj parlaycashganta.
20 Rasunpami niycä, pï mandashgätapis chasquej cajga nogatami chasquiman, nogata chasquimaptenga mandaycämajtapis chasquircaycan”.
21 Chayno nircurmi Jesusga pasaypa laquesawan caycar cayno nirgan: “Rasunpami niycä, gamcunapita jucniqui cajmi traiciunamanga”.
22 Mayganpaj parlaycashganta mana musyar discipuluncunaga jucnin jucnin ricapänacur carcaycargan.
23 Jesús cuyashgan jucnin caj discipulunga ladunchomi mesacho caycargan.
24 Chaymi Simón Pedruga umalanwan sëñata rurar cayno tapurgan: “¿Pipätaj parlaycämun?”.
25 Chauraga Jesuspa pechunman chachacuycur payga cayno tapurgan: “Señor, ¿pipätaj parlaycanqui?”.
26 Jesusna nirgan: “Cay pedazo tantata ushmarcachir garaycushgä cajmi caycan”. Chaypitana tantata ushmarcachir, Simón Iscariotipa churin Judasta garaycurgan.
27 Chay tantata Judas chasquircuptinna paypa shongunman Satanás yaycurgan. Chauraga Jesús cayta nirgan: “Ruraycashgayquitaga jucla ruray”.
28 Ichanga mesacho caycajcunapitaga mayganpis musyarganchu imanir chayno nishganta.
29 Guellayta churacunapaj cajapitaga Judasmi encargado caycargan, chaymi waquincunaga yarpapäcurgan “fiestapaj necesitashganchicunata rantipacamuy” Jesús nishganta, o pobricunata imalatapis goycunapaj nishgantapis capaz yarpapäcurgan.
30 Chauraga pedazo tantata chasquircur payga chaypita aywacurgan. Pachaga* chacashganami cargan.
31 Aywacuptinnami Jesús cayno nirgan: “Cananmi Runapa Churin alabashga caycan, Tayta Diospis payraycu alabashga caycan.
32 Quiquin Diosmi respetachenga y chaytaga juclami ruranga.
33 Wamraläcuna, walca tiempulanami gamcunawan caycäshaj. Ashipäcamanquimi, pero judiucunata nishgänolami canan gamcunata cayno në: ‘Aywashgämanga manami shamuyta puedipäcunquichu’.
34 Cay mushoj mandamientutami gamcunata goycä: jucniqui jucniqui cuyanacäriy. Gamcunata noga cuyashgäno, gamcunapis jucniqui jucniqui cuyanacäriy.
35 Discipulöcuna cashgayquitaga pï maypis musyapäcunga jucniqui jucniqui cuyanacäriptiqui”.
36 Simón Pedro nirgan: “Señor, ¿maypataj aywacunqui?”. Jesusna nirgan: “Aywashgämanga manami guepäta canan shamunquirächu, pero nircur shamunquipämi”.
37 Pedruna cayno nirgan: “Señor, ¿imanirtaj guepayquita canan shamuyta puedëchu? Noga gamraycu wanurpis wanushämi”.
38 Jesusna cayno nirgan: “¿Nogaraycu gam wanunqui? Rasunpami në, juc gallo manaraj cantaptin, gamga reguimashgayquita quimsa cuti niegamanqui”.
