OARALAP | IHS SOUNKADEHDEHN SIOHWA KAN?
Soangen Aramas Dah Kei Sounkadehdehn Siohwa kan?
Kiht pwihn ehu nan sampah pwon me sohte kin iang pidada pelien lamalam teikan. Mendahki poasen kaun en Sounkadehdehn Siohwa kan mi nan Wehin Amerika, pali laud en kiht kin mi nan sahpw teikan. Ni mehlel, kiht daulih meh welirar me kin padahngki duwen Paipel ong aramas akan nan sahpw daulih 230. Se kin wia met pwehn kapwaiada mahsen en Sises: “Rongamwahu en Wehin Koht pahn lohkseli wasa koaros nin sampah, pwe kadehde en mie ong aramas koaros.”—Madiu 24:14.
Sohte lipilipil wasa me se mi ie, se kin kapwaiada kosonned kan. Ahpw se kin nantihong kolokol at soupoupali. Met pwehki se men kapwaiada sapwellimen Sises kaweid ong Kristian kan me “kaidehn irail kisehn sampah.” Kahrehda, se sohte kin iang pidada wiewia kan nan palien politik de utungada mahwen. (Sohn 15:19; 17:16) Ni mehlel, nan Mahwen Keriau en Sampah, Sounkadehdehn Siohwa kan kin selidi, ale kalokolok laud oh kamakamla pwehki re sohte kin kesehla arail soupoupali. Emen kaunen pelien lamalam en Prohs nan Sehmen ntingihedi: “Irail kak nda ni pwung me irail kelehpw me keieu sohte kin utung kaundahn mehn Nazi ko.”
“[Sounkadehdehn Siohwa kan] kin uhdahn nantihong en wia dahme pwung. Kitail kak doadoahngki soangen aramas soh roporop pwukat pil nan mwekid laud kan nan palien politik, ahpw kitail sohte kak kahrehiong irail en wia met. . . . Re pohnese manaman en koperment kan ahpw re kamehlele me Wehin Koht kelehpw me kak kamwahwihala kahpwal koaros me tohnsampah kin ahneki.”—Doaropwehn nuhs Nová Svoboda, Czech Republic.
Ahpw se sohte douluhl kin katohre kiht sang aramas akan. Sises patohwan kapakapkiong Koht duwen sapwellime tohnpadahk kan: “I sohte peki rehmwi pwe komwi en ketikinirailsang nin sampah.” (Sohn 17:15) Eri, mwein ke kin kilang kiht wie doadoahk, netinet, oh pil kohla sukuhl ni omw wasa.
