Nan Paipel, Koht ketin doadoahngki kaun akan de sounkopwung kan pwehn doarehsang sapwellime aramas akan kopwung sapahrek. (Sounkopwung 2:18) Paipel mahsanih me Rahnen Kadeiko me pahn wiawi ahnsou kohkohdo pahn wia ahnsou kaperen ehu ni ahnsou me Sounkopwung en sampah pwon, Siohwa, pahn ketin doarehsang aramas akan kopwung sapahrek.​—Wadek Melkahka 96:10, 12, 13; Aiseia 26:9.

Koht ketin idihada Sises pwehn wia sounkopwung en me momour oh me melahr akan. (Wiewia 10:42; 17:31) Aramas tohto melahr ahpw re sohte ese Koht. Erein Rahnen Kadeiko, Sises pahn ketin kaiasada irail pwukat pwe irail en kak esehla oh poakohngala Koht mehlelo.​—Wadek Wiewia 24:15.

Me melahr akan pahn iasada erein pahr kido. (Kaudiahl 20:4, 12) Irail pahn anahne ahnsou pwehn sukuhlki duwen sapwellimen Koht ahl akan oh peikiong ih. Weksang dahme aramas tohto kin medewe, Paipel kasalehda me aramas akan pahn pakadeikda poahsoankihda arail wiewia kan mwurin arail iasada.​—Wadek Rom 6:7.

Paipel pil mahsanih duwen rahnen kadeik ehu me pahn wiawi ni soh kasikpe mwohn pahr kido tepida. Rahno pil adaneki ni imwio, nin duwen me oaralap kan nan pwuhk wet koasoia. Rahno, Koht pahn ketin kamwomwala aramas suwed kan koaros. (2 Piter 3:7) Ihme kahrehda, kitail anahne kanahieng pwe kitail en kadehdehda duwen atail poakohng Koht.​—Wadek 2 Piter 3:9, 13.