Sangete mahs, aramas kin ouramanki ia uwen eh pahn uhdahn kaselel ma re ahneki roson mwahu oh wie pwulopwulte kohkohlahte. Ahpw e kansensuwed pwe dahme mehlel iei kitail koaros kin mehla. Dahme Sohp koasoia daulih sounpar silikid samwalahro, me kileldi powe, kin mehlelete ni atail ahnsou.

Ineng en mour kohkohlahte uhdahn kehlail oh aramas koaros nin sampah ahneki ineng wet. Paipel mahsanihong kitail me Koht ‘ketikihong nan mohngiongitail madamadau en ahnsou kohkohlahte,’ oh pil ineng en wehwehki met. (Eklesiasdes 3:11, NW) Ma ih duwen met, e pahn pwung en nda me Koht limpoak men pahn ketikihong kitail ineng ehu me kitail sohte kak alehdi? Ma omw pasapeng soh, eri ke pwung. Paipel kahdaneki mehla imwintihti men oh e inoukihda me imwintihti menet “pahn lohdi.”​—1 Korint 15:26.

Mehla uhdahn wia imwintihti men. Aramas loalokong men sohte pahn men mehla en lelohng ih. Ni keper ehu eh kin pwarada, kitail kin sarek, rukula de tangasang. Ni atail kin soumwahuda, kitail kin rapahki dahme pahn kamwahwihala. Kitail kin wia soahng koaros me kitail kak pwehn soikala dahme kakete kahrehda kitail en mehla.

Ia duwe, mie kahrepe ehu kitail en kamehlele me imwintihti menet me mihmikiher ahnsou reirei pahn lohdi? Ei, uhdahn mie. Siohwa Koht, Sounkapikpatail, sohte ketin kapikada aramas en mourki sounpar keite oh mehla. Mehlahn aramas sohte wia kisehn dahme e ketin kupwurki nin tapio. E ketin kupwurki aramas en mour kohkohlahte nin sampah, oh dahme e ketin kupwurki, e kin ketin kapwaiada.​—Aiseia 55:11.

Eri, ia duwen mehla eh pahn lohdi? Sangete mahs leledo met nan poadopoad, aramas kin nannanti en kamwahwihala kahpwal en mehla, ahpw re sohte kin pweida. Nan atail ahnsou, re pil kin pousehlahte wia met. Saintis kan wiadahr wini kan me kamwahwihalahr ekei soumwahu. Re kin nantihong esehla duwen koasoandi de mwomwen wiawihdahn soahng kan me momour. Nan sahpw tohto, mouren aramas rahnpwukat kin werei sang mouren aramas sounpar epwiki samwalahro. Ahpw, mehla saikinte lohdi. Nin duwen me Paipel mahsanih, “koaros pahn pwurehng wiepwella.”​—Eklesiasdes 3:20.

Rohng mwahwo iei me kitail sohte anahne koapworopworki koahiek en aramas akan pwehn kamwahwihala kahpwal wet me mihmihier wereilahr. Siohwa Koht ketin koasoanehdier atail pahn poadoandoarla de pitsang mehla, oh Sises Krais iei me keieu kesempwal nan koasoandio.