OARALAP | SEHDAN UHDAHN MIE?
Kitail Anahne Masak Sehdan?
E uhdahn apwal en kilangada. Ke sehse poh dah oh pil sohte pwohwe, e kakete kemehla emen ni eh sasairki. Me wet kemelahr daulih elep en uwen tohtohn aramas me mehkihla pwoisin nan sampah pwon. Me wet iei carbon monoxide (angin kahs pwoisin me kin kohsang sidohsa de weren nan sapw akan). Ahpw ke sohte anahne pwunodikihda met. Mie soahng kei me kak sewese iuk diarada oh pereiukasang pwoisin wet. Aramas tohto kin kihong nan imwarail kan dipwisou ehu me kak katamankihong irail me pwoisin wet mihmiseli oh re kin kanahieng oh idawehn kaweid ko.
Duwehte carbon monoxide, Sehdan pil sohte sansal oh e apwal ong aramas akan ren kilangada, oh e inenen keper. Ahpw Koht kin ketin sewese kitail. Ke sohte anahne masak Sehdan ma ke doadoahngki kisakis pwukat me Koht ketikihda:
Atail pilipil. Seims 4:7 mahsanih: “Pelianda Tepil, e ahpw pahn tangasang kumwail.” Mendahki Sehdan uhdahn kehlail, e sohte kak idingkihong uhk ken wia mehkan me ke sohte men wia. Mie omw pilipil. Keieun Piter 5:9 mahsanih: “Kumwail tengeteng ni amwail pwoson oh kehlail ong ih [Tepilo].” Tamataman me Sehdan kohkohlahsang Sises mwurin e ketin soikala kasongosong siluh ko. (Madiu 4:11) Ke kak pil pilada ma ke pahn soikala ahn Sehdan kasongosong kan.
Nanpwungmwahu rehn Koht. Seims 4:8 kin kangoange kitail en “keido mpen Koht.” Pein Siohwa ketin luke iuk ken kakairada nanpwungmwahu keren reh. Ia duwen omw kak wia met? Ahl me keieu mwahu en tepida wia met iei en kalaudehla omw sukuhlki duwen ih sang nan Paipel. (Sohn 17:3) Dahme ke sukuhlki duwen Siohwa pahn kamwakid uhk en poakohngala ih, oh limpoak wet pahn uhd kamwakid uhk ken wia kupwure. (1 Sohn 5:3) Ni atail pahn karanihala Samatailo nanleng, ia duwen eh pahn ketin mwekidki met? Seims doula koasoia, “[Koht] pahn ketin keiong mpamwail.”
Inou me Koht pahn ketin pere iuk. Lepin Padahk 18:10 (NW) mahsanih: “Mwaren Siohwa iei wasahn doulik kehlail ehu. Wasa me aramas pwung kan kin tangala oh rukula ie.” Met sohte wehwehki me mwaren Koht iei mehn silasil manaman ehu me aramas kin doadoahngki. Ahpw e kin wehwehki me irail kan me uhdahn wauneki mwaren Koht kak likweriong ih pwehn ale pereparail ahnsou koaros.
Mehn kahlemeng mwahu ehu nan Paipel. Wiewia 19:19 padahkihong kitail duwen irail kan nan Episos me ahpwtehn wiahla Kristian kei. E mahsanih: “Me tohto sang irail kan me kin wunahni re kihpene neirail pwuhk kan oh isikala mwohn masarail koaros. Irail ahpw kapatapene uwen pweinen pwuhk me isihslahr ako; eri, e pahrekiong pweinen tohndoadoahk men ong rahn limanen.” Kristian pwuko isikala dipwisou koaros me pidada wunahni, sohte lipilipil ia uwen pweilaud en dipwisou ko. Arail mehn kahlemeng kak sewese kitail rahnwet. Sampah wet inenen direkihla soahng kan me pidada wunahni. Pil dipwisou oh wiewia kan me pidada wunahni me mwomwen sohte keper ele kak lukehdo manaman en ngehn saut akan. E uhdahn kesempwal en kesehsang nan omw mour soahng pwukat, sohte lipilipil ia uwen pweilaud.—Deuderonomi 18:10-12.
Rogelio, me kitail koasoiapene mwoweo, sohte kamehlele duwen Tepilo sangete eh tikitik. Ahpw e pwurehng kasawih eh madamadauo. Dahme kahrehda? Rogelio nda: “Ehdin ei nainekihda Paipel nan ei mour. Dahme I sukuhlkihsang Paipel kamehlelehiong ie me Tepilo uhdahn mie. Loalokong wette me kin pere ie met sang ei pahn lohdi pahn eh manaman.”
“Dahme I sukuhlkihsang Paipel kamehlelehiong ie me Tepilo uhdahn mie. Loalokong wette me kin pere ie met sang ei pahn lohdi pahn eh manaman”
Ia duwe, ke sou men kilang rahno me Sehdan solahr pahn mie? Ke kak. Paipel kohpada duwen ahnsou ehu me kohkohdo me Tepil, me kin pitipitih me tohto, pahn “lekdeklahng nan lehn kisiniei oh suwepel.” (Kaudiahl 20:10) Kisiniei oh suwepel uhdahn sohte kak kauwehla ngehn emen. Ihme kahrehda, lehn kisinieio kin wehwehki kasohrala soutuk. Sehdan pahn sohla mie kohkohlahte. Ia uwen eh pahn wia ahnsou kaperen ehu ong irail kan me kin poakohng Koht!
Ahnsou wet, doulahte sukuhlki soahng koaros me ke kak duwen Siohwa oh sapwellime ahl akan. * Medewehla ke wie momour ni ahnsowo me ke kak uhdahn nda, “Sehdan solahr mie!”
^ Pwehn kalaudehla omw wehwehki duwen Sehdan oh sapwellimen Koht madamadau me pid wunahni, menlau kilang irelaud 10 en pwuhken Dahme Paipel Uhdahn Padahngki? Peki pwuhk wet rehn Sounkadehdehn Siohwa kan de wadek nan Internet ni adres wet www.jw.org.
