KATHERINE tikida nan Amerika. Ni eh sounpar 16, e papidaisla wiahla Sounkadehdehn Siohwa men. E kin doadoahk laud nan eh kalohk ahpw diarada me sohte me men mwekidki rongamwahu en Wehio wasa me e kin kalohk ie. E nda: “I kin wadek duwen aramas akan me kin kapakap ong Koht pwehn ketin kadarala emen me pahn sewese irail esehla ih. I mentehno diar soangen aramas duwehte met, ahpw sohte pak ehu e wiawi.”

Mwurin eh kalokalohk sounpar tohto nan wasahn kalohk ohte, Katherine tepida medemedewe en keseula ehu wasa tohrohr me aramas akan pahn men mwekidki rongamwahu en Wehio. Ahpw e medemedewe ma met sou pahn apwal ong ih. Pak ehute nan eh mour me e sohte mi rehn eh peneineio erein wihk riau. Erein wihk riauo, e kin loaloid rahn koaros. Ahpw eh ineng en kehn soangen peren me kohsang eh pahn sewese irail kan me rapahki Siohwa powehdi kahpwal wet. Mwurin eh kasawih oh medemedewe wasa kei me e kak keseula ie, e ntinglahng ohpis en Sounkadehdehn Siohwa kan nan Guam oh e alehdi arail pasapeng. Nan July 2007, ni eh sounpar 26, Katherine keseula Saipan, ehu deke nan Pacific me dohki mwail 6,000 sang eh peneineio. Dahme wiawiong ih?

Sohte pwand mwurin eh keseudo nan mwomwohdiso kapw, Katherine tuhwong Doris, emen lih me sounpar 40 samwa, me men onop Paipel. Mwurin ara onopki oaralap 1 lel 3 nan pwuhken Paipel Padahngki, Katherine ekis pwunodada. E nda: “Doris uhdahn wia tohnsukuhl en Paipel mwahu men oh I sohte men kauwehla eh men onop. I saikinte wia soangen onop en Paipel me kin wiawi wihk koaros oh I pehm me Doris anahne onop rehn emen sister me koahiek sang ie, me mwein ara sounpar duwepenehte.” Katherine kapakapkihong Siohwa en ketin sewese ih diarada emen sister koahiek me e kak kihong en uhd onop rehn nah tohnsukuhlo. Ih eri lemehda en padahkihong Doris duwen ihs me pahn uhd onop reh.

Katherine nda: “Mwohn ei pahn ndahng Doris duwen met, Doris padahkihong ie me e men koasoiaiong ie duwen kahpwal ehu. Mwurin ei rong dahme e nda, I padahkihong ih duwen Siohwa eh ketin sewese ie ien powehdi kahpwal ehu me duwehte. E ndaiong ie kalahngan.” Doris eri ndahng Katherine: “Siohwa ketin doadoahngkin uhk pwehn sewese ie. Tepin rahno me ke kohdo rehi, I wie wadewadek nei Paipel ahnsou reirei. I wie sengiseng oh pekipeki rehn Koht en ketin kadarodo emen en sewese ie wehwehkihla Paipel. Kowe eri letelet ni ei wenihmwo. Siohwa uhdahn ketin sapengala ei kapakapo!” Pilen mesen Katherine kin kohda ni eh koasoia dahme wiawi ahnsowo. E nda: “Dahme  Doris nda sapengala ei kapakapo. Siohwa ketin kasalehiong ie me I kak doulahte at onopo.”

Doris papidaisla nan pahr 2010, oh rahnwet e kin wia onop rehn tohnsukuhl en Paipel kei. Katherine nda: “I uhdahn kalahnganki me ineng me I ahneki ahnsou reirei en sewese emen en wiahla sapwellimen Siohwa ladu pweidahr!” Rahnwet, Katherine kin ni peren papah nin duwen pioneer tohrohr men nan Kosrae, ehu dekehn Pacific.

Brother oh sister tohtohsang epwiki kei (nanpwungen sounpar 19 lel 79) me keseu sang sahpw teikan kin wie papah wasa kan nan Micronesia me mie anahn laud ong sounkalohk. Erica, me keseula Guam nan pahr 2006 ni eh sounpar 19, kasalehda pepehm en irail sounkalohk ngoang pwukat. E nda: “En wia emen pioneer nan wasa ehu me aramas akan kin men sukuhlki padahk mehlel uhdahn kaperen. I uhdahn kalahnganki ong Siohwa eh ketin sewese ie en iang wia doadoahk tohrohr wet. Ih soangen mour me keieu mwahu!” Rahnwet, Erica kin perenki wia pioneer tohrohr men nan Ebeye nan Marshall Islands. Mehlel, e pil kin apwal en papah nan ehu sahpw tohrohr. Kitail pahn tehkpene kahpwal siluh oh kilang ia duwen irail kan me keseula Micronesia ar kin powehdi kahpwal pwukat.

Mwomwen arail mour. Mwurin e keseudo Palau nan pahr 2007, Simon me sounpar 22, mwadang diarada me pweinen eh doadoahko uhdahn tikitik sang dahme e kin wiahda nan England, wasa me e kohsang ie. E nda: “I anahne sukuhlki en dehr pwainda soahng koaros me I mwahuki. Met I kin kanahieng ni ei pilada soangen mwenge me I pahn pwainda, oh I kin rapahki wasa kan me kepwe kan mwahu oh pil pweitikitik. Ma ahi dipwisou ehu ohla, I kin rapahki soahng kan me sohte kapw me I kak doadoahngki oh rapahki emen me kak sewese ie kamwahwihala.” Ia duwen mwomwen eh mour ahnsou wet eh sewese ih? Simon nda: “E sewese ie en esehla dahme uhdahn kesempwal nan mour oh pil ia duwen ei kak pousehlahte mehnda ma nei mwohni tikitik oh I sohte ahneki diren kepwe. Mie ahnsou kan me e kin uhdahn sansal ong ie duwen Siohwa eh ketin apwalih ie. Erein sounpar isuh me I wie papah wasaht, ahnsou koaros kin mie kenei mwenge oh pil wasa ien wendi ie.” Siohwa kin uhdahn ketin apwalih irail kan me ahneki soangen mour me sohte kedirepwki soahng kan me sohte uhdahn kesempwal pwehki re men rapahki mahs Wehin Koht.​—Mad. 6:32, 33.

Loaloid. Erica nda: “Ngehi oh ei peneineio kin uhdahn kerenpene oh I perki ma pepehm en loaloid pahn kauwe ei doadoahk en kalohk.” Dahme e wia pwehn kaunopada ong met? E nda: “Mwohn ei keseula, I kin wadek oaralap kan nan Kahn Iroir me pid duwen loaloid. Met uhdahn kaunopada ei madamadau ong kahpwal wet. Nan ehu oaralap ko, emen nohno kamehlelehiong nah serepeino duwen Siohwa eh kin ketin nsenohkin kitail ni eh nda, ‘Siohwa kak ketin apwalih iuk mwahusang ei pahn kak apwalih iuk.’ Dahme e nda uhdahn kakehlakahda ie.” Hannah oh eh pwoudo, Patrick, kin papah nan Majuro nan Marshall Islands. Hannah kin  powehdi eh loaloid sang ni eh kin kihong eh ahnsou ong brother oh sister kan nan mwomwohdiso me ira kin iang. E nda: “I kin ahnsou koaros kalahngankihong Siohwa riatail Kristian kan nan sampah pwon pwehki re pil wia ei peneinei. Ma sohte limpoak oh sawas sang rehrail, I sohte pahn kak papah wasa kan me mie anahn laud ong sounkalohk.”

Wiahda Kompoakepahmw kan. Simon nda: “Ni omw lella ni ehu sahpw tohrohr, kereniong soahng koaros ehusoahng. Ekei pak I kin wereisang mi rehn aramas me kak uhdahn wehwehki ahi kamwan.” Erica nda: “Nin tapio, I kin pehm me I sohte iang pidada dahme re wiewia. Ahpw met sewese ien medemedewe dahme kamwakid ie en keseudo wasaht. I keseudo kaidehn ong pein kamwahupei ahpw pwehn kalaudehla ahi doadoahk ong Siohwa.” E pil nda: “Mwuhr, I wiahda kompoakepahi mwahu kan me I uhdahn kesempwalki.” Simon kin doadoahk laud pwehn sukuhlki lokaiahn Palau. Met kahrehiong en kak ‘langahda douluhl eh mohngiong’ ong brother oh sister kan wasao. (2 Kor. 6:13) Eh nantihong esehla lokaiahn Palau kahrehda brother oh sister ko en poakepoakehla ih. Ni me ahpwtehn keseudo ko oh pil brother oh sister kan wasao arail kin doadoahkpene, koaros kin dolung kapai en kompoakepahkihla emenemen nan mwomwohdiso. Soangen kapai dah teikan me mie ong irail me men toukihda pein irail en papah wasa kan me mie anahn laud ong sounkalohk?

Wahnpoaron Pohl koasoia: “Aramas me kin kamwarak werentuhke tohto, eh pahn dolung wa tohto.” (2 Kor. 9:6) Kaweid me sansalda nan iren Paipel wet uhdahn kadoadoahk ong irail kan me kin kalaudehla arail doadoahk en kalohk. Wahn doadoahk dah me re kin “dolung” nan Micronesia?

Nan Micronesia, miehte ahnsou mwahu en tapiada onop en Paipel rehn aramas akan oh pein kilang ia duwen irail me sukuhlki oh doadoahngki padahk mehlel sang Paipel ar kin kekeirda nan arail kaudokiong Siohwa. Patrick oh Hannah pil kalohk nan Angaur, deke tikitik ehu me aramas 320 kin kousoan powe. Mwurin ara kalokalohngki erein sounpwong riau, re tuhwongada nohno men me sohte eh pwoud. Liho mwadangete men onop Paipel. E uhdahn kamehlele dahme e sukuhlki oh wiahda wekidekla laud kan nan eh mour. Hannah nda: “Mwurin at onop koaros, ni at dake warat pwaisikel ko kohkohsang imweo, se kin kilangpene oh nda: ‘Kalahngan, Siohwa!’” Hannah pil nda: “I ese me Siohwa pahn ketin kainangihedo lih menet reh ni soangsoangen ahl akan, ahpw pwehki at kin papah wasa me mie anahn laud en sounkalohk, se kak diar oh sewese soangen aramas menet me rasehng sihpw en esehla Siohwa. Met iei ehu kapai me keieu laud me se alehdi nan at mour!” Duwehte me Erica nda, “ni omw sewese aramas emen en esehla Siohwa, ke kin dolung peren me inenen laud!”

Nan sahpw tohto, mie anahn ong sounkalohk tohto pwehn kalohki duwen Wehio. Ia duwe, ke pahn kak iang irail me kin keseula wasa kan me anahne sawas? Peki rehn Siohwa nan omw kapakap pwehn ketin kakehlaka omw ineng en kalaudehla omw doadoahk en kalohk. Koasoiong elder kan nan mwomwohdiso, sounapwalih me kin seiloak, de pil irail kan me iangehr pwais kaselel en papah nan wasa kan me anahne sawas. Ni omw tapiada wiahda omw koasoandi kan, ntinglahng ohpis en Sounkadehdehn Siohwa kan me apwalih wasahn kalohk me ke men keseula ie oh peki rehrail en kalaudehla omw esehla dahme ke anahne wia. * Mwein ke pil kak iang brother oh sister tohto, me pwulopwul oh me mah, kiripw de pwopwoud, me kin toukihda pein irail ni peren oh pil paiekihda arail kin “dolung wa tohto.”