I ipwidi nan Santo Domingo, Dominican Republic, oh ngehi me keieu tikitik nanpwungen seri pahmen, pwutak silimen oh serepein emen. Ahi pahpa oh nohno ale sukuhl laud oh men apwalihkitada pwehn wia aramas mwahu oh mehlel. Sounpar pahieu mwohn ahi ipwidi, ahi pahpa oh nohno tuhwong misineri en Mormon kei. Pwehki ahi pahpa nohno mwahuki mwahnakapw ko arail kin likouda mwahu oh mwakelekel, ira pilada me at peneinei pahn wia ehu nanpwungen tepin peneinei kan sang sahpwo me iangala pelien lamalam en Church of Jesus Christ of Latter-day Saints, de Mormon.

Ni ahi lalaudla, I perenki soangen wiewia kan me se kin wia nan at sarawio oh pil wauneki en Mormon ko ar madamadau duwen mouren peneinei oh tiahk mwahu. I pohlki ahi wia emen Mormon oh wiahki ahi mehn akadei en wiahla emen misineri.

Ahnsou me I sounpar 18, ngehi oh ahi peneinei keseula nan Amerika pwe I en iang sukuhl laud. Mpen sounpar ehu mwuri, rien ahi nohno lih oh eh pwoud, me wia Sounkadehdehn Siohwa kan, mwemweitdo reht Florida. Re luke kiht sen iang ira towehda mihting tohrohr ehu me koasoia duwen Paipel. I pwuriamweikihla ahi kilang koaros me mwomwohd limwahi ar kin rapahki iren Paipel kan oh pil ntingihedi ire kan. Ngehi eri peki ehu pehn oh doaropwe pwehn wia soahngohte.

Mwurin mihting tohrohro, rien ahi nohno oh eh pwoudo nda me pwehki ahi men wiahla misineri, ira kak sewese ie I en sukuhlki mehkot duwen Paipel. I medewe me met mwahu pwehki ni ahnsowo, I ese Pwuhken Mormon laudsang Paipel.

Nan erein at kin koasoiapene Paipel nan delepwohn, rien ahi nohno oh eh pwoudo kin ahnsou koaros kangoange I en kapahrekihong  dahme I kamehlele ong dahme Paipel padahngki. Ira men I en pein diarada dahme Paipel uhdahn mahsanih.

Mie soahng tohto me I pwungki duwen dahme Mormon kin kamehlele, ahpw I sohte nohn ese ia duwen Paipel eh pahrekiong soangen madamadau pwuko. Rien ahi nohno kadarodo Awake! en November 8,1995 (lokaiahn wai), me Sounkadehdehn Siohwa kan wiahda, me kasalehda ekei ire kan duwen dahme Mormon kan kin kamehlele. I pwuriamweikihla me I sohte ese padahk en Mormon tohto. Met kamwakid ie en rapahki nan nein Mormon Web site pwehn kadehdehda me dahme ntingdi nan Awake! wet mehlel. Ei, ire ko mehlel, oh I pil kamehlelehla ire ko ni ahnsou me I kohla kilang museum kan en Mormon me mi Utah.

Sangete mahs, I kin kamehlele me Pwuhken Mormon oh Paipel sohte kin uhpene. Ahpw ni ahi tepida wadek kanahieng Paipel, I kilangada wekpeseng kan en dahme Mormon kan padahngki oh dahme Paipel mahsanih.

Patehng met, I pil pwunodki madamadau en uhki wehi me Mormon kan kin padahngki. Karasepe, Mormon kan kin padahngki me mwetuwel en Ihden mihmi Jackson County, Missouri, nan Amerika. Oh pil soukohp kan en sarawio nda me ahnsou “me Wehin Koht pahn kaunda, pilaik en wehin Amerika pahn ipihpirekseli ni tuhkehn pilaik en pwung pahrek oh saledek.”

I medewe dahme Mormon kan kin padahngki me pahn wiahiong sahpw teikan, duwehte sahpw me I kohsang ie. I koasoiaiong met emen Mormon pwulopwul me ale kasukuhl en wiahla misineri ni soutik ehu ni ahnsou me e delepwohndo rehi. I idek reh ma e pahn men peiong ienge Mormon kan ma eh wehio pahn mahweniong arail wehio. I pwuriamweikihla ni eh nda ei. I kalaudehla ahi onopki padahk kan en ahi pelien lamalamo oh pil koasoiong kaun akan en Mormon. Irail ndaiong ie me pasapengpen ahi peidek kan kin pidada soahng rir kan me ehu rahn pahn sansalda ni maraino eh pahn lalaudla.

I nsensuwedkihla dahme re kawehwehiong ie. I kasawih kanahieng pein ngehi oh kahrepen ahi men wiahla misineri en Mormon. I wehwehkihda me ehu kahrepen ahi men wiahla emen misineri iei en sewese aramas teikan. Pil ehu kahrepen ahi men wia met iei aramas akan pahn waunekin ie. Ahpw me pid duwen Koht, I sohte nohn ese duwen ih. Mendahki pak tohto mahs I kin wadek ekeite ire kan nan Paipel, I sohte uhdahn kesempwalki. I uhdahn sehse kupwuren Koht ong sampah de aramas.

Sang ahi onop Paipel rehn Sounkadehdehn Siohwa kan, I sukuhlki ia mwaren Koht, dahme kin wiawi ni ahnsou emen mehla, ia sapwellimen Sises pwukoa ong pweidahn kupwuren Koht oh pil soahng teikan. Met I tepida esehla pwuhk kaselel wet oh I perenki ehukihong meteikan duwen padahk mehlel kan me I sukusukuhlki. Sangete mahs I ese me mie Koht, ahpw met I kak koasoiong ih ni kapakap nin duwen kompoakepahi men me keieu mwahu. I papidaisla nin duwen emen Sounkadehdehn Siohwa ni July 12, 2004, oh sounpwong weneu mwuhr I tepida doadoahngki pali laud en ahi ahnsou ong doadoahk en kalohk.

I doadoahngkihier sounpar limau nan ohpis en Sounkadehdehn Siohwa kan me mi Brooklyn, New York. I uhdahn perenki ahi kak sewese wiawihda Paipel oh sawasepen Paipel kan me kin wia kamwahu ong me tohto nan sampah oh I kin pousehlahte perenki sewese meteikan sukuhlki duwen Koht.