Ia Uhdahn Kahrepen Mour?

“IA UHDAHN kahrepen mour?” Aramas tohto kin wia peidek wet. Sohte lipilipil ia duwen ar kin kilangwohng mour, me tohto sohte kak pohnsehsehla dahme emen toahkte en Austria, Victor E. Frankl, koasoia duwen mour eh duwehte mehkot me “sohte katepe.”

Dahme kahrehda me tohto ahneki pepehm wet? Ehu kahrepe iei pwehki aramas rar kei nan sampah pwon kin mi nan irair en kahpwal oh kansensuwed. Ehuehu rahn, irail kin lelohng kahpwal en semwehmwe, soumwahu, tiahk lemei, oh lokolok. Arail mour kin “diren apwal,” ihme Sohp ndahki duwen lokolok en aramas. (Sohp 14:1) Ihte me re kin kilanglahng iei en mour ehuehu rahn.

Aramas rar kei kin kepwehpwe oh mwomwen me re ahneki dipwisou koaros me re anahne. Ahpw me tohto sohte kin. Dahme kahrehda? Pwehki irail kin pwurepwurehng loiong “pwunodte oh apwal,” duwehte apwal en mwohni de mehlahn emen me irail uhdahn poakepoake. Mepwukat kin kihsang arail koapworopwor.—Melkahka 90:10.

Pil mie mehkot me kin kalaudehla pepehm me dene mour “sohte katepe.” Dahkot met? Iei mour eh mwotomwot. Me tohto sohte kin wehwehki dahme kahrehda aramas me ahneki koahiek en wiahda soahng mwahu tohto, kin mour mwotomwot. Irail sohte kin wehwehki duwen apwal me kitail koaros kin mi loale: Mehnda ma kitail kin pitsang kahpwal laud pwukat ahnsou wet de pil mwuhr, ahpw mehla uhdahn pahn lelohng kitail.—Eklesiasdes 3:19, 20.

Mour Pahn Sohte Kahrepe Kohkohlahte?

Nanmwarki Solomon uhdahn wehwehki duwen irair pwukat. E kin kilang aramas akan nan eh ahnsou ar kin doadoahk laud ni arail kin doadoahngki arail koahiek pwe ren padokedi, koadoahkehda, kauwada, oh apwalih arail peneinei, duwehte me kitail kin wia rahnwet. E mwomwen peidengki ma ‘Ia imwilahn mepwukat koaros?’ E nda me mehkoaros me aramas kin wia “sohte katepe, ihte . . . pwakipwakih kisinieng.”—Eklesiasdes 2:17.

Ahpw ia duwen, Nanmwarki Solomon kamehlele me soahng koaros me aramas kin wia pahn ahnsou koaros  “sohte katepe, ihte . . . pwakipwakih kisinieng”? Soh. E kin kasalehda dahme uhdahn kin wiawi nan atail mour nan sampah suwed wet. Ahpw, Mahsen en Koht kak kamehlelehiong kitail me kaidehn ih pahn duwen met kohkohlahte!

Ia duwen atail kak kamehlele met? Menlau wadek ire riau me pahn kohda mwurin met. Ire pwukat kak seweseiuk ken wehwehki dahme kahrehda e mwomwen me sohte kahrepen mour, ia duwen irair wet eh kak mwahula, oh ia duwen omw kak wiahiong omw mour en mie katepe ahnsou wet.