Karanih Koht

E Ketin Raparapahki Dahme Mwahu Rehn Aramas

1 Nanmwarki 14:13, NW

“EKETIN mwahngih audepen atail lamalam oh ineng koaros.” (1 Kronikel 28:9) Mahsen pwukat ntingdi pwehn kamwakid kitail en kalahnganki uwen laud en Siohwa eh ketin nsenohkin kitail. Siohwa kin ketin rapahki dahme mwahu me mi nan atail mohngiong mendahki atail uhdahn soh unsek. Met kin sansalda sang sapwellime mahsen ong Apaisa me kileldi nan 1 Nanmwarki 14:13.

Apaisa kin kousoan nan peneinei suwed ehu. Eh pahpa, Seropoham me kaunen irail kan me kin uhwong koasoandi en Siohwa. * Siohwa ketin koasoanehdi me e pahn kasorehla douluhl peneinei en Seropoham, ni arail pahn “lekdekla duwehte pwisehn mahn.” (1 Nanmwarki 14:10) Ahpw Koht ketin mahsanih me emente kisehn peneinei en Seropoham iei Apaisa me inenen soumwahu laud pahn seridi ni ahl me konehng. * Dahme kahrehda? Koht mahsanih: “Pwehki mie mehkot mwahu mwohn Siohwa Koht en Israel me dierekda reh nan peneinei en Seropoham.” (1 Nanmwarki 14:1, 12, 13, NW) Dahme mahsen pwukat padahkihong kitail duwen Apaisa?

Paipel sohte mahsanih me Apaisa wia tohnkaudok en Koht lelepek men. Ahpw mie mehkot mwahu reh. Irair mwahu wet kin ongete Siohwa, ele e kin pid Sapwellime kaudok. Sounnting kan en mehn Suhs kasalehda me Apaisa seiloaklahng tehnpas sarawio nan Serusalem de e kihsang sounsilasil kan me eh pahpao koasoanehdi pwehn kauhdi mehn Israel ko ren dehr kohla Serusalem.

Mehnda ma kitail sohte uhdahn wehwehki soahng mwahu dah me Apaisa kasalehda, eh irair mwahu wia mehkot kesempwal. Keieu, e uhdahn mehlel oh e kohsang eh mohngiong. Keriau eh irairo me tohrohr. Apaisa kasalehda irair mwahu wet mendahki e kin mihmi “nan peneinei en Seropoham.” Emen me sukuhl laud koasoia: “Kaping laud anahne kohwong emen me kin kolokolete eh irair mwahu kan mendahte ma e mihmi nan wasa de peneinei suwed kan.” Emen pil koasoia me en Apaisa irair mwahwo “kin sansal mwahu . . . , duwehte usu kan ar kin lingaling mwahu nipwong oh duwehte tuhke sidar kin lingan mehlel ni ahnsou me tuhke kan limwah kin sohla teh.”

Me keieu kesempwal, mahsen kan nan 1 Nanmwarki 14:13 kin padahkihong kitail mehkot kaselel duwen Siohwa oh dahme e kin ketin rapahki rehtail. Tamanda me mehkot mwahu “dierekda” rehn Apaisa. E sansal me Siohwa kin ketin kasakasawih mohngiong en Apaisa lao e diarada kisin mehkot mwahu reh. Me pid Apaisa oh eh peneinei, emen me sukuhl laud koasoia me Apaisa duwehte takai kesempwal ehu “nanpwungen kisin takai tohto.” Siohwa ketin kesempwalki irair mwahu wet oh katingih ni eh ketin kasalehda mahk ong ih mendahki e wia kisehn peneinei suwed ehu.

E sou kin wia mehn kakehl ehu atail ese me Siohwa kin ketin rapahki oh kesempwalki dahme mwahu me mi rehtail mendahki atail soh unsek? (Melkahka 130:3) Atail ese duwen met anahne kamwakid kitail en karanih Siohwa, Koht emen me kin ketin kasawih mwahu atail mohngiong pwehn rapahki mehkot mwahu, mendahte ma e inenen tikitik.

[Nting tikitik kan me mi pah]